1 Hein ike-24 he andew zutun he vulan, midtiǥum is menge Israilihanen su ebpuasa zan. Migkukumbalà sikandan te saku wey mibpen-evuwan dan is ulu zan su ibpeehè dan is kedlalew zan. 2 Wazè dan ipetampu is kenà menge Israilihanen. Midhitindeg dan ne intug-an dan is menge salè dan wey is menge salà te menge kepuun dan. 3 Wazà sikandan med-engked he edhitindeg seled te tetelu he uras dutun te kemulu zin pa ebesahan diyà te kandan is Kesuǥuan te Nengazen he Megbevayè dan. Ne seled te tetelu he uras is kedtug-ana zan te menge salè dan wey ked-ezapa zan te Nengazen he Megbevayè dan. 4 Is duma he menge Levihanen nemenhitindeg diyà te heǥezan, is nenigudu medtawag te Nengazen he Megbevayè dan. Iyan sikandan ensi Jeshua, Kadmiel, Bani, Shebania, Buni, Sherebia, Bani, wey si Kenani. 5 Is menge Levihanen he nengumew para te ked-azap iyan ensi Jeshua, Kadmiel, Bani, Hashabnea, Sherebia, Hodia, Shebania, wey si Petahia. Ke sikandan te, “Hitindeg kew ne zeliǥa niw is wazà pidtemanan he Nengazen he Megbevayè niw!”

Ne migkaǥi is menge etew te, “He Nengazen, ereg he edeliǥen is kegkemekeǥeǥehem nu! Is kegkemekeǥeǥehem nu lavew pa te egkekaǥi zey. 6 Iyan ke zà Nengazen! Mibeelan nu is langit, tanà, daǥat, wey is langun he netaǥù kayi. Ebeǥayan nu te untung is langun he menge linimbag nu, ne ed-ezapen ka te menge velinsuǥuen diyà te langit.

7 “Iyan ka, Nengazen he Megbevayà mibpilì ki Abram, ne impeǥawas nu sikandin puun te Ur, he sakup te Babilonia. Ne migngezanan nu sikandin te Abraham. 8 Neehè nu he mepezumdumahan sikandin kenikew, ne nenangdù ka ziyà te kandin he ibeǥey nu ziyà te menge kevuwazan din is tanà te menge Canaanhen, Hitihanen, Amorihanen, Pirisihanen, Jebusihanen, wey menge Girgasihanen. Ne midtuman nu is insaad nu ziyà te kandan, su metazeng ka.

9 “Neehè nu is ked-antus te menge kepuun dey ziyà te Ehipto. Nezineg nu is kebuyù dan te tavang diyà te kenikew hein diyè sikandan te Zaǥat he Meriǥà. 10 Mibaal ka te menge singyal wey menge egkein-inuwan he menge vaal he nekesuǥat te hadì te Ehipto, wey te langun he menge upisyal zin wey menge etew zin. Su netuenan nu he midaagdaag dan is menge kepuun dey. Ne taman en guntaan kemulu egkevantug is ngazan nu. 11 Midluwisan nu is nezalandalan he tanà diyà te zizalem te zaǥat diyà te etuvangan te menge etew nu su wey zan duen igkevayà. Iyan, midlened nu mulà is menge kuntada zan he edal-as kandan. Neiring sikandan te vatu he inlegdang diyà te meseleg he wahig. 12 Emun maandew egiyahan nu sikandan pinaaǥi te mekepal he ǥapun he egkeiring te tukud, ne emun mezukilem pinaaǥi te regreg he egkeiring te tukud, su para meteyawi is ibayè dan.

13 “Puun te langit nenaug ka pehendiyà te Buntud he Sinai ne nekidlalag ka kandan. Mibeǥayan nu sikandan te hustu he menge penurù wey meupiya he menge suǥù wey menge sulunuzen. 14 Impenurù nu kandan is mehitenged te ed-ul-ulahan dan emun Andew te Kedhimeley. Ne pinaaǥi te suluǥuen nu he si Moises midsuǥù nu sikandan he tumana zan is menge suǥù, menge sulunuzen, wey menge penurù nu. 15 Hein egkevitil sikandan, mibeǥayan nu sikandan te keenen he ebpuun te langit. Ne hein egkemezahan sikandan, impeinum nu sikandan te wahig he ebpuun diyà te vatu. Migkeǥiyan nu sikandan he selezi zan wey engkena zan is tanà he impenangdù nu he ibeǥey nu kandan. 16 Piru haazà is menge kepuun dey nehimu he mepelevawen, mesinupaken, wey kenà metinumanen te menge suǥù nu. 17 Kenè dan egkesuat he ebpemineg te menge lalag nu, ne midlipatan dan dà is egkengein-inuwan he mibeelan nu ziyà te kandan. Nehimu sikandan he mesinupaken, wey nekidsukulà sikandan kenikew pinaaǥi te kebpilì te pengulu he ebpelikù kandan diyà te kegkeuripen diyà te Ehipto. Piru mepineseyluwen ka he Megbevayà, beliǥeǥawen ka, iipengen ka, kenè ka pepeuken, wey nepenù ka te kebmahal. Umbe wazà nu sikandan iselikwey. 18 Minsan mibaal sikandan te ledawan he vaka, ne ke sikandan te, ‘Iyan heini ed-ezapen he mibpeǥawas kenitew puun te Ehipto.’ Utew subra is kedsumpelita zan kenikew! 19 Piru tenged te zekelà he hizu nu kandan, wazè nu sikandan bey-ani ziyà te sibsivayan. Wazè nu iawà sikan is mekepal he ǥapun he egiya kandan emun maandew, wey sikan is regreg he edtayew te edhipenawan dan emun mezukilem. 20 Imbeǥey nu kandan is meupiya he Mulin-ulin nu he iyan ebpenurù kandan. Wazè ka med-engked he ebpekaan kandan te ‘manna’, ne mibeǥayan nu sikandan te wahig he egkeinum dan ke egkemezahan dan. 21 Mibeǥayan nu sikandan te menge kinahanglan dan seled te 40 he tuig te ziyà sikandan te sibsivayan. Umbe kenà kurang is menge kinehenglanen dan. Wazà mezaan is menge visti zan wey wazà lupangi is menge paa zan te kedtulung dan kedhipanew.

22 “Impezaag nu kandan is menge ginhedian, menge nasyun, wey is menge meǥinged diyà te menge tanà he nekeelingkus kandan. Mid-aǥew zan is tanà he Heshbon he iyan edumala zutun si Hadì Sihon, wey is tanà he Bashan he iyan edumala zuen si Hadì Og. 23 Impeiring nu te menge vituen diyà te langit is menge kevuwazan te menge Israilihanen su impemahabet nu. Ne mid-uwit nu sikandan diyà te tanà he impenaad nu ziyà te menge kepuun dan he edselezan dan wey ed-engkenen dan. 24 Midseled dan iyan dutun ne mid-angken dan. Mibpengelinteuwan nu he mezaag dan is menge Canaanhen he meǥinged dutun he tanà. Imbeǥey nu kandan is menge Canaanhen ragkes en is menge hadì dan su para meveeli te menge etew nu is egkesuatan dan te ebaal ziyà te kandan. 25 Mid-aǥew te menge etew nu is binerengbeng he menge inged wey is selebpeten he menge tanà. Mid-aǥew zan daan is menge valey he nezengkuuran te meupiya he menge azen, menge teheb, menge pemuleey te paras, menge pemuleey te ulibu, wey zuma pa he ebpemeǥas he menge kayu he utew mahabet. Migkaan sikandan ne nahantey zan ne mibmeupiya is lawa zan. Nelipey sikandan tenged te utew nu kebpurungi kandan.

26 “Piru minsan pa te iyan haazà, midsupak dan wey nekidsukulà kenikew. Mid-iniyuǥan dan is Kesuǥuan nu. Mibpenhimetayan dan is menge ebpeneuven nu he ed-umew kandan te kedlikù diyà te kenikew. Utew subra is kedsumpelita zan kenikew! 27 Umbe, imbeǥey nu sikandan diyà te menge kuntada zan he midlisedlised kandan. Piru hein edlislisezen en sikandan mibuyù dan diyà te kenikew te tavang, ne mibpemineg nu ǥihapun sikandin diyà te langit. Ne tenged te zekelà he hizu nu kandan, mibeǥayan nu sikandan te menge pengulu he ebpekepeǥawas kandan puun te ǥehem te menge kuntada zan.

28 “Piru emun ebmeupiyè en is kebpekesavuk dan ne ed-uman dan en maan ebaal te mezaat diyà te etuvangan nu. Ne ebey-anan nu sikandan diyà te ǥehem te menge kuntada zan su para meveyveyai sikandan. Ne emun ebuyù en maan sikandan te tavang diyà te kenikew, ne ebpemineǥen nu sikandan diyà te langit. Ne tenged te hizu nu kandan layun nu sikandan edlibriya. 29 Mibpetizeenan nu sikandan he med-uman dan medtuman te Kesuǥuan nu, piru mibmepelevawen sikandan ne wazè dan tumana is menge suǥù nu. Wazè dan sunuza is menge suǥù nu he iyan ebpekeveǥey te meupiya he untung duen te edtuman kayi. Tenged te kesinupaken dan mid-iniyuǥan ke zan, ne kenè dan egkesuat he ebpemineg kenikew. 30 Tenged te kebmahala nu kandan mahabet en he menge tuig is midlavey te kebpelavey nu, ne mibpetizeenan sikandan te Mulin-ulin nu pinaaǥi te menge ebpeneuven nu. Piru wazà sikandan mebpemineg, umbe imbeǥey nu sikandan diyà te menge etew he nekeelingkus kandan. 31 Piru tenged te zekelà he hizu nu kandan, ne wazè nu sikandan bey-ani etawa wazà nu sikandan purungi zèdeeti, su hihizuwen ka wey veliǥeǥawen he Megbevayà.

32 “Sikew is Megbevayè dey, mekeǥeǥehem ka wey utew egkein-inuwi. Edtumanen nu is paaǥi nu te kebpekid-uyun wey ibpeehè nu is gaǥew nu. Ne ǥuntaan, kenè nu isipa he kenè key kenikew edtevangan kayi te kemereǥenan dey. Nekebmereǥen key is langun he menge etew nu, ragkes is menge hadì dey, is menge pengulu zey, is menge memumuhat dey, is menge ebpeneuven kayi te kenami, wey is menge kepuun dey, nekebmereǥen puun pa te timpu te kedlisliseza kenami te hadì te Asiria ne taman en guntaan. 33 Metazeng is mibeelan nu te kedsilut kenami. Metinumanen ka ziyà te kenami, piru menge mekesesalè key mulà. 34 Is menge hadì dey, menge pengulu zey, menge memumuhat dey, wey is menge kepuun dey, wazà medtuman te Kesuǥuan nu. Wazè dan seǥipaa is menge suǥù nu wey menge petizaan nu. 35 Minsan duen dan keugelingen he ginhedian, wey nekesaǥad sikandan te utew nu kandan kebpurungi, wey minsan mibeǥayan nu sikandan te meluag wey selebpeten he tanà, wazà gihapun sikandan mebpenilbi kenikew wey wazè dan iniyuǥi is mezaat he menge ulaula zan. 36 Iyan heini hinungdan ke maan is menge uripen key ǥuntaan kayi te tanà he imbeǥey nu te menge kepuun dey, ne kayi zan mekekaan te menge abut kayi wey zuma pa he meupiya he menge pruduktu kayi. 37 Ne ǥuntaan, is dekelà he menge abut kayi te tanà, ne iyan ebpekezawat duen is menge hadì he impahadì nu kenami tenged te menge salè dey. Ebeelan dan diyà te kenami wey ziyà te menge uyaǥen dey is egkesuatan dan te ebaal, ne utew key nekebmereǥen.”

38 “Ne tenged dutun, midhimu key is menge Judio te sevaha he melig-en he kebpekid-uyun. Insurat haazà ne mibpirmahan te menge pengulu zey, menge memumuhat dey, wey menge Levihanen.”