1 Is nehuna he mibpirma iyan si Gubirnedur Nehemias he anak ni Hacalia, wey si Zedekia.

2-8 Is menge memumuhat he mibpirma iyan ensi Seraya, Azaria, Jeremias, Pashur, Amaria, Malkia, Hatush, Shebania, Maluc, Harim, Meremot, Obadias, Daniel, Gineton, Baruc, Meshulam, Abia, Miamin, Maazia, Bilga, wey si Shemaya.

9-13 Is menge Levihanen he mibpirma iyan ensi Jeshua he anak ni Azania, Binui he ebpuun diyà te pemilya ni Henadad, Kadmiel, Shebania, Hodia, Kelita, Pelaya, Hanan, Mica, Rehob, Hashabia, Zacur, Sherebia, Shebania, Hodia, Bani, wey Beninu.

14-27 Is menge pengulu he mibpirma iyan en si Parosh, Pahat Moab, Elam, Zatu, Bani, Buni, Azgad, Bebai, Adonia, Bigvai, Adin, Ater, Hezekia, Azur, Hodia, Hashum, Bezai, Harif, Anatot, Nebai, Magpiash, Meshulam, Hezir, Meshezabel, Zadok, Jadua, Palatia, Hanan, Anaya, Hoshea, Hanania, Hashub, Halohesh, Pilha, Shobek, Rehum, Hashabna, Maasea, Ahia, Hanan, Anan, Maluc, Harim, wey si Baanah.

28 Is duma he menge etew ziyà te Israel, ragkes is menge memumuhat, menge Levihanen, menge vantey te menge ǥemawan te valey te Nengazen, menge perekanta, menge suluǥuen diyà te valey te Nengazen, wey is langun he nekidsivayà te kenà menge Israilihanen he meǥinged diyà te Israel su edtuman mulà te Kesuǥuan te Megbevayà, ragkes is menge esawa zan wey is menge anak dan he zuen dan en hanew, 29 nesevaha key te kebpenangdù duma te menge pengulu zey he edtumanen dey is Kesuǥuan he imbeǥey te Megbevayà pinaaǥi te suluǥuen din he si Moises. Nenangdù key zaan he edewaten dey is rawak te Megbevayà emun kenè dey egketuman is insaad dey he ed-ikulen dey is langun he menge suǥù wey menge sulunuzen he imbeǥey te Nengazen he Megbevayè dey. 30 Midsaad key he kenè dey edtuǥutan is menge anak dey te kebpengesawa etawa kebpeesawa te kenà menge Israilihanen he ed-ubpà kayi te Israel. 31 Midsaad key zaan he emun ebelegyà heini is kenà menge Israilihanen te trigu etawa minsan hengkey he klasi te velegyà, dutun te Andew te Kedhimeley etawa zuma he segradu he andew, ne kenè dey ebpemesahan. Kada ikepitu he tuig, ne kenè dey ebpemulaan is tanè dey, wey kenè dey edsukuten is utang te zuma.

32 Midsaad key zaan he edtumanen dey is suǥù he ebeǥey key kada tuig te heepat he gramu he pelata he para te vuluhaten diyà te valey te Megbevayè dey. 33 Ne iyan egkepeveyaan kayi is para te supas he ibpemuhat diyà te etuvangan te Megbevayà, menge pemuhat he edtutungen wey menge pemuhat he para gasa he andew-andew is kebpemuhata zuen, menge pemuhat he para te menge Andew te Kedhimeley, para te Pista te Kebpuun te Hayag, wey zuma pa he menge pista, wey para te zuma pa he menge pemuhat he segradu iring te pemuhat he para idlumpiyu, he velukas te menge Israilihanen tenged te menge salè dan. Egemiten daan haazà he selapì para te zuma pa he menge kinehenglanen diyà te valey te Nengazen he Megbevayè dey.

34 Sikami is menge Israilihanen, ragkes is menge memumuhat dey wey is menge Levihanen, midripa key su para metueni zey ke hentei he menge pemilya is kinahanglan he ed-uwit te idtetavun he para idtavun te tinuig he menge pemuhat diyà te pemuhatà para te Nengazen he Megbevayè dey, sumalà te ingkesurat diyà te Kesuǥuan.

35 Midsaad key zaan he kada tuig ed-uwiten dey ziyà te valey te Nengazen is egkehuna he egkeraǥun dey ziyà te vevesukè dey wey is egkehuna he veǥas te menge pinemula zey. 36 Ne ed-uwiten dey zaan diyà te menge memumuhat he ebpenilbi ziyà te valey te Megbevayè dey is maama he kinekekayan he anak dey, ragkes is kinekekayan te menge vaka zey, menge kerehidu zey, wey menge kambing dey, sumalà te ingkesurat diyà te Kesuǥuan.

37 Midsaad key pa he idata zey ziyà te menge memumuhat, diyà te budiga ziyà te valey te Megbevayè dey, is kineupiyahan he klasi te herina wey zuma he menge halad he para gasa. Ed-uwiten dey zaan is kineupiyahan he menge prutas dey, wey is kineupiyahan he veǥu he vinu, wey lana he ulibu. Ed-uwiten dey zaan diyà te menge Levihanen is ikepulù te menge abut dey, su iyan sikandan ebpengulikta te ikepulù diyà te langun he menge inged he zuen duen menge vevesukà. Emun ebpengulikte en te ikepulù is menge Levihanen, 38 eduma kandan is memumuhat he kevuwazan ni Aaron. Ne is ikesepulù he vahin dutun te egkekulikta zan ed-uwiten dan diyà te budiga ziyà te valey te Megbevayè dey. 39 Is menge Israilihanen, ragkes en is menge Levihanen kinahanglan he ed-uwit te menge halad he trigu, beǥu he vinu wey lana diyà te budiga he zutun idtaǥù is menge gelemiten diyà te valey te Nengazen wey zutun ed-ubpàubpà is menge memumuhat he ebaal te vuluhaten, wey is menge vantey te menge ǥemawan te valey te Nengazen, wey is menge perekanta.

Umbe, midsaad key he kenè dey ebey-anan is baley te Megbevayè dey.