1 Si Zelofehad, duen din menge anak he vahi he iyan ensi Mala, Noa, Hogla, Milca, wey Tirza. Heini si Zelofehad anak ni Hefer wey apù ni Gilead. Si Gilead anak ni Makir wey apù ni Manase. Si Manase anak ni Jose. 2 Midhendiyà heini he menge vahi te gemawan duen te Tulda he Edtelevukaayan ne midhitindeg dan diyà te etuvangan ni Moises, ni Eleazar wey te menge pengulu, wey te langun he menge Israilihanen. Migkaǥi sikandan te, 3 “Minatey is amey zey diyà te sibsivayan he wazè din anak he maama. Piru minatey sikandin kenà tenged te midsunud sikandin ki Kora te nekidsukulà te Nengazen, kekena, tenged te keugelingen din he salà. 4 Id-awè en be is ngazan din diyà te pemilya te Israel tenged te wazè din anak he maama? Beǥayi key zaan te tanà iring te nezawat te menge kezuzumahi zey.”

5 Umbe, migkaǥi ni Moises diyà te Nengazen haazà is hangyù dan. 6 Ne migkeǥiyan sikandin te Nengazen te, 7 “Benar is egkeǥiyen te menge anak he vahi ni Zelofehad. Kinahanglan he ebeǥayan nu sikandan te tanà duma te menge kezuzumahi te amey zan. Iveǥey nu kandan is para pezem te amey zan.

8 “Keǥiyi nu is menge Israilihanen he emun ebpatey is sevaha he etew he wazè din anak he maama, kinahanglan he iyan ibpepengevilin is anak din he vahi. 9 Emun wazè din anak he vahi, ne ziyà ibeǥey te menge suled din he maama. 10 Ne emun wazè din suled he maama, ne ibeǥey is tanè din diyà te menge anggam din diyà te amey zin. 11 Emun wazà suled he maama te amey zin, ne ibeǥey is tanè din diyà te kinemegegetan he kezuzumahi zin, ne haazà iyan ebpekaangken duen. Kinahanglan he edtumanen heini te menge Israilihanen su velaud en heini he sulunuzen, sumalà te insuǥù ku ziyà te kenikew Moises.”

12 Migkaǥi is Nengazen diyà te ki Moises te, “Tekezeg ka ziyà te vuntud he Abarim ne pentawa nu is tanà he ibeǥey ku te menge Israilihanen. 13 Ne emun egkeehè nu en heini, ne ebpatey ke en iring te suled nu he si Aaron. 14 Su hein nekidsukulà kedì is menge Israilihanen diyà te serebseb diyà te sibsivayan he Zin, midsupak niw ki Aaron is suǥù ku te kebpaahà te kegkewaǥas ku ziyà te menge etew.” (Heini he serebseb iyan is Meriba Kadesh he ziyà te sibsivayan he Zin.)

15 Migkaǥi si Moises diyà te Nengazen te, 16 “He Nengazen, Megbevayè ka he iyan ebpuunan te untung te langun he etew, deyzey ke ebpilì ka te etew he ebpekepengulu kayi te menge etew, 17 he ebpengulu kandan duen te tebek, su para kenà meiring is menge etew nu te menge kerehidu he wazà duen ebantey.”

18 Umbe, migkaǥi is Nengazen diyà te ki Moises te, “Pesuǥui nu si Josue he anak ni Nun, is sevaha he etew he ed-ulinan te Mulin-ulin, ne izampè nu is palad nu ziyà te ulu zin te ked-urdina kandin he pengulu. 19 Ipehitindeg nu sikandin diyà te etuvangan ni Eleazar he memumuhat wey ziyà te langun he menge etew ne ipetueni nu kandan he mibpilì nu sikandin he ilis kenikew. 20 Ne iveǥey nu kandin is duma he keǥehem nu su para pezumdumahi sikandin te langun he menge Israilihanen. 21 Pinaaǥi ki Eleazar egketuenan din is egkesuatan ku pinaaǥi te kegamit ni Eleazar te beveraan he Urim diyà te etuvangan ku. Pinaaǥi kayi egkeǥiyahan ni Eleazar si Josue wey is langun he menge Israilihanen te ereg he ebeelan dan.”

22 Ne mibeelan ni Moises haazà is insuǥù kandin te Nengazen. Mibpesuǥuan din si Josue ne impehitindeg din diyà te etuvangan ni Eleazar he memumuhat wey te langun he menge etew. 23 Ne sumalà te insuǥù te Nengazen kandin, indampè din is menge palad din diyà te ki Josue ne impetuenan din he si Josue is ebpekeilis kandin.