1 Migkaǥi is Nengazen diyà te ki Moises te, 2 “Keǥiyi nu is menge Israilihanen he kinahanglan he mebpemuhat sikandan kayi te kedì te menge pemuhat pinaaǥi te hapuy diyà te midtelaan he timpu. Heini he menge pemuhat iyan keenen ku. Ne is kehemut kayi ne ebpekepenunuat kedì. Umbe keǥiya nu heini ziyà te menge Israilihanen, ke sikew te, 3 ‘Iyan heini menge pemuhat pinaaǥi te hapuy he ibpemuhat niw ziyà te Nengazen: dezuwa he kerehidu he senge-tuig is keǥurang dan he wazè dan sazir. Pemuhat heini he edtutungen kada andew. 4 Sevaha is ibpemuhat niw emun meselem ne sevaha zaan emun mahapun. 5 Edlepikan heini te pemuhat he para gasa he zezuwa he kilu he meupiya he kelasi te herina ne midsehuǥan te senge litru he lana te mibevayu he ulibu. 6 Iyan heini pemuhat kada andew he edtutungen, he insuǥù dengan keniyu te Nengazen diyà te Buntud he Sinai. Is kehemut kayi he pemuhat te pinaaǥi te hapuy ne ebpekepenunuat te Nengazen. 7 Ragkes daan kayi is pemuhat he inumen he idragkes te kebpemuhata te kada kerehidu, he senge litru he vinu, he pemuhat diyà te Nengazen, he id-itis diyà te segradu he lugar para te Nengazen. 8 Ne iring ded kayi is beeli niw ziyà te ikezuwa he pemuhat niw he kerehidu he ibpemuhat niw ke mahapun. Lepiki niw zed heini te pemuhat he para gasa wey pemuhat he inumen. Pemuhat heini he edtutungen he ebpekepenunuat te Nengazen is kehemut din.’

9 “Emun Andew te Kedhimeley, pemuhat kew te zezuwa he kerehidu he tig senge-tuig is keǥurang dan he wazè dan sazir, he edlepikan te pemuhat he inumen wey pemuhat he para gasa he heepat he kilu he meupiya he kelasi he herina he midsehuǥan te lana. 10 Iyan heini pemuhat he edtutungen kada Andew te Kedhimeley, he gawas en duen te andew-andew he pemuhat ragkes is pemuhat he inumen he zuma kayi.

11 “Diyà te kada egkehuna he andew te vulan ne pemuhat kew ziyà te Nengazen te pemuhat he edtutungen. Is ibpemuhat niw zezuwa he turiti he vaka, sevaha he meǥurang en he meemahan he kerehidu, wey pitu he meemahan he kerehidu he tig senge-tuig is keǥurang dan. Is langun kayi kinahanglan he wazè din sazir. 12-13 Lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is idlapik te kada sevaha he turiti he vaka, heepat he kilu is para te meǥurang en he kerehidu, ne zezuwa he kilu is para te kada nati he kerehidu. Menge pemuhat heini he edtutungen, is kehemut kayi ebpekepenunuat te Nengazen. 14 Is kada pemuhat he turiti he vaka edlepikan te pemuhat he inumen he zezuwa he litru he vinu. Ne sikan is meǥurang en he kerehidu edlepikan te senge litru wey tengà he vinu. Ne is kada sevaha he nati he kerehidu edlepikan te senge litru he vinu. Iyan heini binulan he pemuhat he edtutungen he ibpemuhat niw kada egkehuna he andew te vulan seled te tivuuk he tuig. 15 Pemuhata niw zaan is Nengazen te sevaha he meemahan he kambing he pemuhat he para idlumpiyu. Beeli niw heini gawas duen te andew-andew he pemuhat he edtutungen wey zuen te pemuhat he inumen he zuma kayi.

16 “Silibraha niw is Pista te Kedlavey te Belinsuǥuen te ike-14 he andew te egkehuna he vulan. 17 Ne sunud he andew zutun ebpuun is pitu he andew he pista. Ne seled kayi te pitu he andew he pista ne kenè kew kaan te supas he zuen din tapey. 18 Duen te egkehuna he andew zutun te pista, ne tiǥum kew te ked-azap te Nengazen, ne kenè kew terebahu keniyan he andew. 19 Pemuhata niw is Nengazen te pemuhat he edtutungen he zezuwa he turiti he vaka, sevaha he meǥurang en he meemahan he kerehidu, wey pitu he nati he menge kerehidu he tig senge-tuig is keǥurang dan. Heini is langun kinahanglan he wazè dan sazir. 20 Dutun te kebpemuhat niw kayi, lepiki niw heini te meupiya he kelasi he herina he midsehuǥan te lana–heenem he kilu zutun te herina is idlapik niw zuen te kada sevaha he turiti he vaka, heepat he kilu is idlapik niw zuen te meǥurang en he kerehidu. 21 Ne tig-dezuwa he kilu is idlapik diyà te kada sevaha he nati he kerehidu. 22 Pemuhat kew zaan te meemahan he kambing he pemuhat para idlumpiyu para mepesaylu kew te menge salè niw. 23 Ipemuhat niw heini he id-uman duen te kada-andew he pemuhat he edtutungen kada meselem. 24 Heini he pemuhat, ipemuhat niw he pemuhat pinaaǥi te hapuy he keenen te Nengazen. Beeli niw heini kada andew seled te pitu he andew. Is kehemut kayi he pemuhat te pinaaǥi te hapuy ne ebpekepenunuat te Nengazen. Ipemuhat niw heini he id-uman duen te pemuhat he edtutungen wey pemuhat he inumen he ibpemuhat niw kada andew. 25 Ne emun ikepitu en he andew, ne tiǥum kew en maan te ked-azap te Nengazen, ne kenè kew terebahu zutun he andew.

26 “Diyà te egkehuna he andew zutun te Pista te Kedraǥun, ne emun timpu en te kebpemuhat niw ziyà te Nengazen te veǥu he neraǥun niw he trigu, tiǥum kew te ked-azap te Nengazen ne kenè kew terebahu zutun he andew. 27 Pemuhat kew te pemuhat he edtutungen: he dezuwa he turiti he vaka, sevaha he meǥurang en he meemahan he kerehidu wey pitu he meemahan he nati he kerehidu he tig senge-tuig is keǥurang dan. Is kehemut kayi he pemuhat ebpekepenunuat te Nengazen. 28 Duen te kebpemuhata niw kayi, lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is ilapik te kada turiti he vaka, heepat he kilu is para te meǥurang en he kerehidu, 29 ne zezuwa he kilu is ilapik niw ziyà te kada sevaha he nati he kerehidu. 30 Pemuhat kew zaan te sevaha he meemahan he kambing su wey kew mevelukasi tenged te menge salè niw. 31 Ipemuhat niw heini zuma zuen te pemuhat he inumen, iuman heini zuen te ibpemuhat niw kada andew he pemuhat he edtutungen wey pemuhat he para gasa. Kinahanglan he haazà he menge uyaǥen wazà duen igkesawey.