1 Is isip ku nepenù te mekempet he menge lalag

hein idseysey ku en is ebpemulvulakan he menge lalag he para zuen te hadì.

Ne is ketau ku te kegkaǥi ne iring te ketau zuen te utew metau he menunurat.

2 Mahal he Hadì, iyan ka utew mezagwey te langun he menge maama,

ne is menge lalag he egawas diyà te vèbè nu ebpekeveǥey te keupiyaanan te zuma he etew,

su ǥeina te layun ka edtuvazi te Megbevayà.

3 Inseluniket nu is ispada nu, mevurut he hadì;

mekeǥeǥehem ka wey meupiya is dengeg nu.

4 Utew meupiya is dengeg nu; mezeeǥen ka ke edsurung ka para te kedlevani nu te tutuu wey hustu he kukuman para te menge edèdaaǥen.

Ne tenged te ǥehem nu ebeelan nu is egkein-inuwan he menge vaal.

5 Pelii nu te meǥarang he menge vala te panè nu is menge pusung te menge kuntada nu.

Ebpesakup kenikew is menge nasyun.

6 Is ginhedian nu, Megbevayà, ebpedayun te wazà pidtemanan,

ne metazeng is kedumelaha nu kayi.

7 Igkesuat nu is metazeng, iyan, igkeepes nu mulà is mezaat.

Umbe, mibpilì ka te Megbevayà he Megbevayè nu,

ne imbeǥey zin kenikew is kelipey he lavew pa te kelipey te menge zuma nu.

8 Is bisti nu mehemut te pehemut he mira, aloe, wey kasia.

Edlenganen ka te menge musikiru te menge gelemiten te kedtukar he ziyà te seled te turuǥan nu,

ne haazà he turuǥan, mahal is indayandayan duen.

9 Nepipira zuen te dungganen he menge vahi nu is menge anak te menge hadì.

Ne ziyà te egkekewanan nu, edhithitindeg is egkehimu he rayna nu he midsun-ud te elahas he lunsey he vulawan he ebpuun te Ofir.

10 Sikew is ed-esewaan te hadì, pemineǥa nu is egkeǥiyen ku:

lipati nu en is menge emurè nu te inged wey is menge kezuzumahi nu,

11 su utew ka nesuati te hadì tenged te kekempet nu.

Tehuza nu sikandin su egalen nu sikandin.

12 Is menge meǥinged diyà te Tyre, ragkes en is utew menge sepian, ebeǥayan ke zan te menge azen su wey nu mepurung sikandan meseǥipà.

13 Utew ka mekempet keniyan te seled te turuǥan nu.

Is bisti nu binurdahan te vulawan.

14 Idsun-ud diyà te kenikew is mekempet he visti nu ne ed-uwiten ka ziyà te hadì.

Ne is menge raǥa he edumahan diyà te kenikew edtinundug kenikew, su iyan sikandan avey nu.

15 Ne utew zekelà is kelipey niw zutun te kedseled niw ziyà te turuǥan dutun te hadì.

16 Mahal he Hadì, is menge kevuwazan nu he menge maama egkengehimu zaan he hadì he iring te menge kepuun dan.

Ne edhimuwen nu sikandan he menge pengulu te tivuuk he tanà.

17 Edhimuwen ku he kenè ka egkelipatan te langun he egkelapislapis he kevuwazan.

Umbe taman te taman is kedeliǥa kenikew te menge nasyun.