1 Is Megbevayà iyan ebpengalang kenitew wey iyan ebeǥey kenitew te zesen.

Ne layun sikandin andam he edtavang emun timpu te kelised.

2 Umbe, kenè kiw egkahandek minsan pa ke egkehuyung is tanà ne egkengetempag is menge vuntud ne egkengeulug diyà te zizalem te zaǥat,

3 minsan pa ke ebpurung ebpemaǥel is daǥat he iyan igkengehuyung te menge vuntud.

4 Duen wahig he ebpekeveǥey te kelipey ziyà te inged te Megbevayà, kes segradu he ubpeey te Utew Lavew he Megbevayà.

5 Kayi he inged ed-ubpà is Megbevayà, umbe kenà heini egkezeetan.

Kenà edlanganlangan is Megbevayà para te kedtavang kayi he inged.

6 Egkengeheratan is menge nasyun; egkengehuyung is menge ginhedian.

Tenged te kulehian te Megbevayà henduen be te egketunew en te kegkahandek is menge etew kayi te tivuuk he kelibutan.

7 Duma tew is Nengazen he Mekeǥeǥehem.

Iyan sikandin Megbevayà ni Jacob, ne iyan sikandin eputè tew.

8 Hengkayi kew, ahaa niw is menge bineelan te Nengazen, is egkengein-inuwan he menge vaal zin kayi te kelibutan.

9 Ibpeengked din is menge tebek kayi te tivuuk he kelibutan.

Ebpemedtìen din is menge panà wey menge vangkew, ne idrapug din is menge kelasag.

10 Migkaǥi sikandan te, “Engked kew en he ebpetebtebekà.

Ne kilelaa a keniyu is Megbevayà.

Ebentuǥen a te menge nasyun kayi te tivuuk he kelibutan.”

11 Duma tew is Nengazen he Mekeǥeǥehem.

Iyan sikandin Megbevayà ni Jacob, ne iyan sikandin eputè tew.