1 Duen daan neehè ku he heepat he kerwahi he midlepew puun te pid-elangan te zezuwa he vuntud he brunsi. 2 Is nehuna he kerwahi eguyuzen te meriǥà he menge kudà, is ikezuwa eguyuzen te meitem he menge kudà, 3 is iketelu eguyuzen te meputì he menge kudà, ne is ikeepat eguyuzen te kevangan he menge kudà. Ne pudu mezesen haazà is menge kudà. 4 Mid-insà a zuen te velinsuǥuen he nekidlalag kedì te, “Datù, hengkey is ibpesavut kayi te menge kerwahi?” 5 Midtavak haazà is belinsuǥuen, “Iyan heeyan heepat he mulin-ulin diyà te langit he migawas puun te etuvangan te Nengazen te kedtuman te ebpeveelan kandan kayi te tivuuk he kelibutan.” 6 Sikan is kerwahi he eguyuzen te meitem he menge kudà, midhendiyà te zizaya. Sikan is kerwahi he eguyuzen te meputì he menge kudà, midhendiyà te edsenlepan. Ne sikan is kerwahi he eguyuzen te kevangan he menge kudà, midhendiyà te zivavà.

7 Heini is mezesen he menge kudà edsikadsikad en su egkesuat dan he ed-elingkus te tivuuk he kelibutan. Migkaǥi sikan is belinsuǥuen diyà te kandan te, “Sigi, elingkusa niw en is tivuuk he kelibutan.” Umbe mid-elingkus dan is tivuuk he kelibutan. 8 Ne mibensag is Nengazen kayi te kedì te, “Tengtengi nu is menge kudà he ebpehendiyà te zizaya. Ibpehimeley zan is Mulin-ulin ku keniyan he lugar.”

9 Migkaǥi is Nengazen kayi te kedì te, 10 “Kuwaa nu is menge pelata wey menge vulawan he inggasa eni Heldai, Tobia, wey Jedaya. Ne hendiyè ka diritsu te valey ni Josia he anak ni Zefanias. Sikandan is heepat, nekelikù en puun te kegkevihaǥa kandan diyà te Babilonia. 11 Ne peveeli nu he kuruna sikan is menge pelata wey menge vulawan. Ne ikuruna nu haazà diyà te ulu te lavew he memumuhat he si Josue he anak ni Jehozadak. 12-13 Ne keǥiyi nu sikandin, he siak, is Nengazen he Mekeǥeǥehem, migkaǥi a te, ‘Is etew he migngezanan te Subpang ed-uswag is kebpekesavuk din ne iyan sikandin ebangun te valey ku. Ebeǥayan sikandin te zengeg pinaaǥi te kegkahadì din ne ebpengulu sikandin. Ne zuen memumuhat he edhitindeg diyà te avey te pinuuwè din te kedhadì ne egkeuyun sikandan is dezuwa.’ 14 Haaza is kuruna kenà id-awà diyà te valey ku su tedeman haazà ki Heldai, ki Tobia, ki Jedaya, wey ki Josia he menge anak ni Zefanias.”

15 Is menge etew he ebpuun diyà te meziyù he menge lugar edhengkayi te Israel ne ed-uǥup dan ebangun te valey te Nengazen. Emun egkeulaula en heini, ne egketuenan niw he iyan is Nengazen he Mekeǥeǥehem midsuǥù kedì te kebpenudtul kayi ziyà te keniyu. Egkehitavù iyan heini emun ebpurungan niw ebpezumdumahi is Nengazen he Megbevayè niw.