1 Duen migkaǥi te Nengazen diyà te ki Zacarias hein ikeepat he andew te vulan he Kislev (he iyan ikesiyam he vulan te tuig), dutun te ikeepat he tuig te kedhadì ni Darius. 2 Nehitavù heini hein midsuǥù te menge etew he ziyà te Betel si Sharezer wey si Regem Melec, duma te menge etew zan. 3 Su wey zan hengyui is menge memumuhat diyà te valey te Nengazen wey is menge ebpeneuven he insai zan is Nengazen ke kinahanglan pe be is kedseengseeng wey kebpuasa zan dutun te ikelima he vulan he paaǥi te kedtedemi te kegkerundus te valey te Nengazen, iring te layun dan ebeeli seled en te mahabet he menge tuig. 4 Ne iyan heini migkaǥi te Nengazen he Mekeǥeǥehem diyà te ki Zacarias: 5 “Keǥiyi nu is langun he menge etew te Israel ragkes en is menge memumuhat, he is kebpuasa zan wey kedseengseeng dan te kada ikelima wey ikepitu he vulan seled te kepituwan en he tuig wazè dan himuwa para kediey. 6 Emun egkaan dan wey ed-inum, ne ebeelan dan heini para te keugelingen dan he kelipey. 7 Iyan daan heini menge lalag he impekaǥi ku zengan te menge ebpeneuven, dutun te timpu he meuswaǥen pa is Jerusalem wey mahabet pa is menge etew kayi ragkes is menge inged diyà te peliǥuy zin, wey ragkes is Negev wey is menge mibuntud-buntud diyà te edsenlepan.”

8 Migkaǥi en man is Nengazen diyà te ki Zacarias te, 9 “Iyan heini migkaǥi ku ziyà te menge etew ku: ‘Iveǥey niw is metazeng he kukuman. Ipeehè niw is keupiya niw wey kebpekedhihizuwè niw. 10 Kenè niw dèdaaǥa is menge valu he vahi, is menge ilu, is menge lumelengyawà, wey menge pubri. Kenè kew med-isip te mezaat diyà te minsan hentei keniyu.’

11 “Piru wazè dan medseǥipà te migkaǥi ku. Mezesen is kedsupak dan wey kenè dan ebpemineg. 12 Impemezesen dan is gehinawa zan iring te vatu, ne wazè dan mebpemineg te Kesuǥuan wey te menge lalag he impekaǥi te Mulin-ulin ku pinaaǥi te menge ebpeneuven dengan. Umbe siak, is Nengazen he Mekeǥeǥehem, utew a nepauk. 13 Ne ǥeina te wazè dan mebpemineg te migkaǥi ku, ne kenà a zaan ebpemineg emun ed-umawen e zan. 14 Iring a te eribpures he mibpeyapat kandan diyà te menge lugar he wazè dan keenu meveyai. Neewaan dan is meupiya he tanè dan, ne nehimu heini he mekevulungbulung.”