1 Iyan heini menge lalag te Nengazen:

Migkaǥi is Nengazen he edsilutan din is menge inged he Hadrac wey Damascus, su kinahanglan he edtengteng wey edangep diyà te Nengazen is langun he menge etew lavew en is menge tribu te Israel. 2 Edsilutan daan te Nengazen is Hamat he sikbit he inged te Hadrac wey te Damascus, wey ziyà te menge inged he Tyre wey Sidon, minsan duen ebilidad te menge meǥinged kayi. 3 Mibangun is menge meǥinged diyà te Tyre te verengbeng, wey midtambù sikandan te pelata wey vulawan he henduen dà te midtambù sikandan te tanà su utew heini zekelà. 4 Piru egkuwaan te Nengazen is menge azen dan ne idtimbag din diyà te zaǥat. Ne egkevinsulan is tivuuk he inged dan.

5 Egkaahà heini te menge meǥinged diyà te Ashkelon ne egkahandek sikandan. Utew egkesekiti is menge meǥinged diyà te Gaza, wey iring din ded daan is menge meǥinged diyà te Ekron su egkaawà is midseriǥan dan. Ebpatey is hadì diyà te Gaza, ne kenè en egkeubpaan is Ashkelon. 6 Is Ashdod, ed-ubpaan te menge etew he nekedseselekawà is kepuun. Edezeetan te Nengazen is impehivantug te menge Filistihanen. 7 Kenè en sikandan egkaan te usa he zuen din pa lengesa wey menge keenen he imbandu is kegkeena zuen. Is egkesamà kandan, ed-isipen te Megbevayè tew he menge etew zin, ne egkehimu en sikandan he zuma te menge etew te Juda. Is menge meǥinged diyà te Ekron, egkehimu he zuma te menge etew te Nengazen iring te menge Jebusihanen dengan. 8 Ebpengelangan te Nengazen is baley zin su wey kenà mezezeeti te menge edsurung. Wazè en edaagdaag te menge etew zin, su ebentayan din sikandan.

9 Migkaǥi is Nengazen te, “Ugyab kew tenged te kegkelipey is menge meǥinged diyà te Zion, he iyan is inged he Jerusalem, su ebpekeuma is hadì niw. Metazeng sikandin wey mezeeǥen. Kenà sikandin mepelevawen ne ebpekeuma he ed-untud te nati he asnu. 10 Id-awè ku is kebpetebtebekà. Id-awè ku is para te tebek he menge kerwahi wey menge kudà te Israel wey Juda. Is menge panà he para te tebek ne ebedtien ku. Is ebpekeuma he hadì, egkaǥi ziyà te menge nasyun he engkezi zan en is kedtebek. Edhadì sikandin puun te sevaha he zaǥat taman te sevaha pa he zaǥat, wey puun te Wahig he Eufrates taman te kineziyuan he vahin te kelibutan.”

11 Migkaǥi pa is Nengazen te, “Mehitenged keniyu te menge Israilihanen, ibpelingkawas ku is menge nevihag keniyu. Iring sikandan te etew he in-ulug diyà te kalut he wazà duen wahig. Ibpeǥawas ku sikandan tenged te kebpekid-uyun ku keniyu he midlig-enan pinaaǥi te lengesa. 12 Sikiyu is menge nevihag he ebperateng he mekelingkawas, likù kew en diyà te melig-en he menge lugar. Ǥuntaan egkaǥi a ziyà te keniyu he idlikù diyà te keniyu he edtekepen is naawà diyà te keniyu. 13 Egemiten ku is Juda wey Israel he iring te panà. Edhimuwen ku is menge etew ziyà te Zion he iring te ispada he idsiwer ku, ne edezeetan dan is menge etew ziyà te Grecia.”

14 Ne ebpaahà is Nengazen diyà te zivavew zan. Ne egkivelat is besut te panè din iring te kilat. Ne ibpezaǥing te Nengazen he MEGBEVAYÀ is trumpita; ne ebpekeuma sikandin duma te vagyu he ebpuun diyà te zivavà. 15 Ebpengelangan te Nengazen he Mekeǥeǥehem is menge etew zin. Bà dan dà edtekutaki is menge vatu he idlempawes kandan te menge kuntada zan. Egkaan dan wey ed-inum dan te kedsilibra te kezeeǥan dan. Ed-ugyab sikandan he henduen be te egkengelangut. Egkepenù is getek dan te inumen iring te yehung he egkepenù te lengesa he ibpirik diyà te purù te menge suyuk te pemuhata. 16-17 Dutun he andew edlibriyen sikandan te Nengazen he Megbevayè dan he iring te menge kerehidu zin. Mekempet wey mezagwey sikandan he edtengtengan diyà te tanè dan. Iring sikandan te mahalen he menge vatu he ed-ilak-ilak diyà te kuruna. Is dekelà he sebpet dan ebpekeveǥey te zesen diyà te menge vetan-en dan.