1-2 Migkaǥi en maan is Nengazen he Mekeǥeǥehem diyà te ki Zacarias te, “Utew ku ingkeipeng is Jerusalem. Ne tenged te zekelà he ipeng ku kayi he inged, utew ku nepeuki is menge kuntada zin. 3 Edlikù a ziyà te Zion, kes inged he Jerusalem, ne ed-ubpà a ziyà. Ne egngezanan is Jerusalem te Metinumanen he Inged wey egngezanan heini is buvungan ku te Buvungan he Segradu. 4 Ed-uman en ebpememinuu ziyà te menge pelasa te Jerusalem is menge meǥurang he ebpenutuked en tenged te utew zan kegkeǥurang. 5 Ne egkeeneb te eguǥusà he menge vatà is menge pelasa.”

6 Migkaǥi pa is Nengazen he Mekeǥeǥehem, “Kela ke egkeisip te nesamà he menge etew ku he mereǥen en is kegkehitevua kayi, piru kayi te kedì kenà heini mereǥen. 7 Edlibriyen ku is menge etew ku he mibihag pehendiyà te menge tanà diyà te edsilaan wey edsenlepan. 8 Ed-umanan ku sikandan ed-uwita ziyà te Jerusalem ne ibpeubpè ku zutun. Ne egkehimu en maan sikandan he menge etew ku ne egkehimu a he Megbevayè dan he metinumanen wey metazeng.”

9 Migkaǥi pa is Nengazen he Mekeǥeǥehem, “Heini he menge lalag migkaǥi zengan te menge ebpeneuven hein timpu te kebeeli te pundasyun te valey ku. Ne ǥuntaan te neuman niw heini mezineg, mebpekelig-en kew su wey niw mepasad is kebangun te valey ku. 10 Hein wazè pa mepuuni is ked-umana kebenguna te valey ku, melised is kebpekesavuk niw ragkes is kepekesavuk te menge uyaǥen niw. Wazà meveyazi is menge etew he edterebahu wey menge uyaǥen he migamit te kedterebahu, wey mekulbà is kedhiphipanew ziyà te minsan hendei su midhimu ku he mekedtetebek is menge etew. 11 Piru ǥuntaan, siak is Nengazen he Mekeǥeǥehem, egkaǥi a te kenè ku en heini ebeelan diyà te keniyu te nengesamà. 12 Ke ebpemula kew ne zuen kelinew. Ebpemeǥas is menge paras, duen egkeraǥun diyà te tanà, ne zuen en dehemug. Heini is langun, ibeǥey ku ziyà te keniyu te egkengesama, ne egkaangken niw heini. 13 Sikiyu is menge etew te Juda wey Israel, midrewakan kew te menge etew ziyà te zuma he menge nasyun. Piru edlibriyen ku sikiyu ne egkehimu kew he tuvad diyà te kandan. Umbe kenè kew mahandek, kekenà, pekelig-en kew.”

14 Migkaǥi pa is Nengazen he Mekeǥeǥehem, “Hein midhimu te menge kepuun niw he mepauk a, nekehukum a he edsilutan ku sikandan wey kenè ku egkehizuwan. 15 Piru ǥuntaan nekehukum a he ibpelaus ku is kebaal te meupiya ziyà te Jerusalem wey Juda. Umbe kenè kew mahandek. 16 Iyan heini ereg he ebeelan niw: Keǥiya niw is tutuu ziyà te kada sevaha keniyu. Iveǥey niw is metazeng he kukuman diyà te menge hukmanan niw he para te keupiyaanan te langun. 17 Kenè kew pelanu te mezaat diyà te iring niw he etew, wey kenè kew penangdù te tarù. Su igkeepes ku is langun kayi he menge vaal.”

18-19 Migkaǥi en maan is Nengazen he Mekeǥeǥehem diyà te ki Zacarias te, “Is kebpuasa ziyà te ikeepat, ikelima, ikepitu, wey ikesepulù he menge vulan, egkehimu he melipayen he timpu para te menge etew te Juda. Umbe mahala niw is tutuu wey kelinew. 20 Mahabet he menge etew he ebpemuun diyà te nekedseselekawà he menge inged is ebpemenhendiyà te Jerusalem. 21 Is menge meǥinged diyà te sevaha he inged, ebpenginggat diyà te sevaha pa he inged he egkaǥi te, ‘Edhendiyè key te kedsimba wey kedhangyu te tuvad te Nengazen he Mekeǥeǥehem. Hendini kew en, duma kew kenami!’

22 “Mahabet he menge etew he ebpemuun diyà te gehemanen he menge nasyun is edhendiyà te Jerusalem te kedsimba wey kedhangyù te tuvad. 23 Dutun he timpu, sepulù he etew he ebpuun diyà te nekedseselekawà he menge nasyun wey kineǥiyan is edhendiyà te sevaha he Judio he egkaǥi te, ‘Ipezuma key kenikew, su nezineg dey he nekiduma keniyu is Megbevayà.’ ”