IPRU
KUIMP TEPA IK KɄⱠ
Ya Buk Ei Nga Puⱡ Ei:
Kraist elim kuimbal moⱡpa, wamp mbʉ kʉn anggelo mbʉ nga morum. Wote, elim ruk ting ila moⱡpa, Got kʉn, wamp mbʉ kʉn moⱡpa, wote Got nga wamp poⱡ ti uⱡ ei, tʉpa ora ndurum.
Ya Buk Ei Nam Ndi Rurum:
Mon ei, wu nam ei ndi, mon rurum, tʉn pili napʉtmʉn. Wamp mat ndi, Pol ndi, mon rurum nʉk pʉtmʉn. Mon rurum ila wu ei ndi, nimba mel, wu Timoti, tʉn nga ʉngʉn.
Mon Ropa Nam Ngurum:
Jura mondpa pili wamp kʉⱡ, Buk Wingti ila ik pʉtmʉn. Wote, en enim nga uⱡ unt nga etʉng uⱡ mbila, int purmʉn nʉk pʉtmʉn. Ei nga, Kraist ronduⱡ mondʉk piling nimba, mon ei ropa ngurum.
Ui Nant Ila Rurum:
Wote Pol ndi, mon ei rurum ndam, Rom kona ila moⱡpa, ei Kraist metʉng ei kʉn, mbuldung orunga pana 61 mba 63 ila kʉⱡ rurum. Wote, wu nam ti ndi, rurum ndam, Jerusalem manga wingti ei rok kit mondrʉng ui ei, A.D. 70 ila unt kuimp tepa mon ei rurum.
Ik Ronduⱡ: Ipru 1:3
Got nga uⱡ eng nui mbʉ pora, kangʉm kʉn etpa rʉⱡang purum. Uⱡ ei ndi, kangʉm ei, Got nga uⱡ eng nui mbʉ pora, elim kangʉm morum ei mel tʉn tʉpa ora ndonʉm. Elim nga ik ei, ronduⱡ minal petʉm ei ndi, mel mbʉ pora, etpa ronduⱡ mundrum. Wote, tʉn wamp mbʉ nga uⱡ kit wak rui uⱡ ei, etpa pora ndupa, elim muⱡ kona Got wu ronduⱡ pi, ei nga ki mbo orunga, wu nuim mumuk oⱡa orunga ei morum.
IK PENG KɄⱠ
Rump
1. Got kangʉm ndi, ik nimba tʉn ngurum
2. Got ndi, tʉn rukʉr titim ei, uⱡ mam ti itim
3. Jisas ndi, Moses tʉpa mana ndurum
4. Got nga wamp muⱡ ti kona
5. Tʉn wamp mbʉ, mondʉp pilpʉn ronduⱡ mundʉp muⱡmin
6. Tʉn nga mondpa pili ronduⱡ ei, ambuⱡpʉn gi ndʉmin
7. Melkisendek ni, wu pris kumbal murum
8. Jisas ei, tʉn nga wu pris kuimbal morum
9. Mʉi kona wamp mbʉ ndi, Got nga mʉi paka rondrʉng
10. Unt kalk tindiⱡim mundrʉng uⱡ ei ndi, kapⱡa iti nʉtʉtʉm
11. Mondpa pili uⱡ ei nga puⱡ ei
12. Got ti, tʉn nga tipam ti
13. Tʉn nga wamp ʉngʉnʉl mbʉ, numan minal ngʉmin
1
Got Kangʉm Ndi, Ik Nimba Tʉn Ngurum
1 Unt kor nga, tʉn nga anda kouwʉmʉn Jura wamp morung ui ei kʉn, ui ou ndupa, Got ndi, ik mat painui wu mbʉ nga keta ila nimba ekit nduⱡnga pʉtʉng. 2 Wote akup, ui pora nimba enim ila, Got ndi, elim nga kangʉm ei nga keta ila, ik nimba tʉn ngonum. Wote, ui pora nim kʉn, kangʉm ei ndi, mel mbʉ pora, elim rʉp itangga nimba tʉpa mundrum. Wote, kangʉm ei ndi, muⱡ mʉi raⱡ mim itim. 3 Got nga uⱡ eng nui mbʉ pora, kangʉm kʉn tepa rʉⱡang purum. Uⱡ ei ndi, kangʉm ei, Got nga uⱡ eng nui mbʉ pora, elim kangʉm morum ei mel, tʉn tʉpa ora ndonʉm. Elim nga ik ei, ronduⱡ minal petʉm ei ndi, mel mbʉ pora, etpa ronduⱡ mundrum. Wote, tʉn wamp mbʉ nga uⱡ kit wak rui uⱡ ei, etpa pora ndupa, elim muⱡ kona Got wu ronduⱡ pi, ei nga ki mbo orunga, wu nuim mumuk oⱡa orunga ei morum.
Got Kangʉm Ei Ndi, Anggelo Mbʉ Pora Tʉpa Mana Ndupa Morum
4 Got ndi, kangʉm mbi ou kai ti ngurum. Uⱡ ei ndi, anggelo mbʉ nga mbi mbʉ ropa mana ndupa, elim oⱡa orunga Wu Nuim ei morum. 5 Unt Got ndi, Jisas kundpa, nimba mel,
“Nim na nga Kangʉm ei, akup na nim nga Tipanʉm ei,” nitim.
Aldpa Got ndi, nimba mel,
“Na nim nga Tipam ei mor, nim na nga kangʉm ei muⱡi,” nitim.
Ik ei, Got ndi, anggelo ti, kundpa ni nʉndʉtʉm mon. 6 Wote Got ndi, elim nga kangʉm kumina tenda ei, mʉi kona ila ngumba mana ndupa, nimba mel,
“Got nga Anggelo mormin mbʉ ndi pora, wu ei nga mint mbi paka rundeing,” nitim.
7 Wote Got ndi, elim nga anggelo mbʉ kundpa, nimba mel,
“Kona kʉpkʉ mel nimba, wote elim nga kongun kindmant wamp mbʉ kundpa, ndip anmbil mel kapⱡa,” nitim.
8 Wote Got ndi, kangʉm kundpa, nimba mel,
“Nuim Got Wu Nuim Mumuk ei, rʉk rʉk molkʉn mint pukʉn! Nim nga wamp tʉpa mumuk rui uⱡ ei kʉn, uⱡ kʉn kai mbʉ kʉn, nokundkʉn moⱡʉn mint pin,” nitim.
9 Wote Got ndi, kangʉm kundpa, nimba mel,
“Nim uⱡ kun kai mbʉ numan ngukʉn, uⱡ kit mbʉ numan ngui nganggʉrʉn. Ei nga, Got ei, nim nga Got ei ndi, wamp wei mbʉ kelpa, nim mbi ropa tʉpa ambuⱡpa pʉl kopung ei, nim kʉn oi ndurum,” nitim.
10 Aldpa Got ndi, kangʉm kundpa, nimba mel,
“Wu Nuim ye! Unt kuimp tepa nim ndi, mʉi mim itin. Wote, nim nga ki raⱡ ndi, muⱡ ei itin. 11 Muⱡ mʉi raⱡ pora ninggil, wote nim rʉk rʉk molkʉn mint pin, muⱡ mbal na, ti ping norum ni mel, muⱡ mʉi raⱡ ping nomba. 12 Nim ndi, kʉnʉng mat na ti, ambulk mʉkʉp rorʉn uⱡ ni mel, muⱡ mʉi raⱡ ambulkʉn mʉkʉp ruin. Wal pʉki unt nga na kat, mundʉk kelik, kont kat yant tʉk etmin. Uⱡ ni mel, nim ndi, muⱡ mʉi raⱡ i ku itin. Wote, nim rʉk rʉk molkʉn mint pin. Nim nga ui ti pora ni nanʉmba, mon,” nitim.
13 Unt Got ndi, kangʉm kundpa, nimba mel,
“Nim tʉp na nga ki mbo orunga mundamba kʉn, nim nga el rui wamp mbʉ, nim nga kʉmp puⱡ ila muⱡeing,” nitim.
Wote Got ndi, elim nga anggelo tenda ti, ik ei mel kundpa, ni nʉndʉtʉm mon. 14 Anggelo mbʉ namba mel? Muⱡnga ei ndi, anggelo mbʉ nga, Got elim kindmant kongun endʉtmʉn. Got ndi, wamp mat etpa rukʉr tʉtʉm wamp mbʉ, tʉk rapʉndʉk etmin.