1 Xijan kuu xa n‑taꞌu tniu Pilato xa chirrión ñɨɨ jani koio soldado Jesús. 2 N‑ka kidavaꞌa soldado ɨɨn corona tnuyɨkɨ, te n‑ka dakeé‑s dɨkɨ‑ia. N‑ka dandukutu‑s‑ia daꞌma tndee. 3 N‑ka kuyatni‑s nuu‑ia te n‑ka jaꞌan‑s:

—¡Viva!, se kunxaꞌnu ka nuu ñayiu Israel.

Te n‑ka jani‑s nuu‑ia.

4 N‑kee Pilato ɨnka vuelta. N‑jaꞌan‑s:

—¡Kundeꞌa koio! N‑kineꞌe‑r se yaꞌa, xa kutnuni ini koio‑n xa ñatu niꞌi‑r ni ɨɨn kuechi mee‑s.

5 N‑kee Jesús. Ñuꞌu corona tnuyɨkɨ dɨkɨ‑ia, te niꞌno‑ia daꞌma tndee. N‑jaꞌan Pilato nuu se Israel:

—¡Kundeꞌa koio‑sɨ! Naa‑s yaꞌa.

6 Na n‑ka xini dutu ka taxnuni xiꞌin policía‑s Jesús, n‑ka kana xee‑s:

—¡Katakaa‑s! ¡Katakaa‑s!

N‑jaꞌan Pilato:

—Mee‑n kandeka koio‑s juaꞌan, te katakaa koio mee‑n‑sɨ. Chi mee‑r, ña niꞌi‑r ni ɨɨn kuechi‑s.

7 N‑ka jaꞌan se Israel:

—Ka jandixa mee‑da tnuꞌu n‑chidotnuni Moisés. Jaꞌan tnuꞌu jan xa io xa kuú se yaꞌa, chi jaꞌan‑s xa kuu‑s Daꞌya Yɨɨ Ianyuux.

8 Na n‑teku Pilato tnuꞌu yaꞌa, te n‑yuꞌu ka‑s. 9 N‑ndɨu‑s palaciu ɨnka vuelta, te n‑xijan tnuꞌu‑s nuu Jesús:

—¿Ndexu vaa‑n?

Ko ni ɨɨn tnuꞌu ña n‑jaꞌan Jesús.

10 N‑jaꞌan Pilato:

—¿Ma jaꞌan‑n nuu‑r a? ¿Ña kutnuni ini‑n xa kuaꞌa‑r xa taꞌu tniu‑r xa dayaa ñaꞌa‑s a? ¿Te kuaꞌa‑r xa taꞌu tniu‑r xa katakaa ñaꞌa‑s a?

11 N‑jaꞌan Jesús:

—Nux ña n‑kida Ianyuux xa taxnuni‑n n‑kuu, te ma kuaꞌa‑n xa kada ñaꞌa‑n ni ɨɨn. Xijan kuu xa se ndeka ñaꞌa mee‑r vaxi nuu‑n, kaꞌnu ka kuechi n‑kida mee‑s dada mee‑n.

12 Nde hora ijan n‑juini Pilato xa dayaa‑s Jesús, ko n‑ka kana xee se Israel:

—Nux dayaa‑n se yaꞌa, duꞌa ñatu jandixa‑n César, se kuu emperador ñayiu romano. Jaꞌan se yaꞌa xa se kunxaꞌnu ka kuu‑s, te duꞌa xini uꞌu tnaꞌa‑s xiꞌin César.

13 Na n‑teku Pilato tnuꞌu yaꞌa, n‑taꞌu tniu‑s xa kandeka koio soldado Jesús jɨꞌɨn. Te nukoo Pilato nuu kidandaa‑s kuechi ñayiu. Ñayiu ka jaꞌan tnuꞌu griegu danani ijan Empedrado, te ñayiu ka jaꞌan tnuꞌu hebreu danani ijan Gabata. 14 Te kɨu ijan kuu kɨu xndaxio tuꞌa ñayiu, xa kax koio‑i ndeyu viko Paxcua. Kaa x‑uu kuu. N‑jaꞌan Pilato nuu se Israel:

—¡Kundeꞌa koio! Naa se kunxaꞌnu ka nuu‑n yaꞌa.

15 N‑ka kana xee se ijan:

—¡Na kuú‑s! ¡Na kuú‑s! ¡Katakaa‑s!

N‑jaꞌan Pilato:

—¿Ka juini‑n xa katakaa‑r se kunxaꞌnu ka nuu‑n a?

N‑ka jaꞌan dutu ka taxnuni:

—Mee‑s, ña kuu‑s se kunxaꞌnu ka. ¡César kuu idini se kunxaꞌnu ka nuu‑da!

16 Xijan kuu xa n‑xiaꞌan Pilato Jesús nuu dutu ka taxnuni nuu ñayiu Israel, xa katakaa koio soldado romano Jesús.

17 Ndido mee‑ia curuxi‑ia, juaꞌan‑ia nuu nani Yɨkɨ Dɨkɨ Ndɨyɨ. Ñayiu ka jaꞌan tnuꞌu hebreu danani ijan Gólgota. 18 Ijan n‑ka xatakaa‑s‑ia nuu curuxi. N‑ka xatakaa‑s uu ka seyɨɨ xiꞌin‑ia tuku. Ɨɨn‑s n‑takaa curuxi lado kuaꞌa‑ia, te ɨnka‑s n‑takaa curuxi lado datni‑ia. Meꞌñu uu se ijan n‑ka xatakaa‑s Jesús. 19 N‑taꞌu tniu Pilato xa kadavaꞌa ɨɨn seyɨɨ letreru xa tenee‑s dɨkɨ curuxi. Jaꞌan letreru jan: “Jesús, se ñuu Nazaret, se kunxaꞌnu ka nuu ñayiu Israel.” 20 Xijan kuu xa n‑ka kaꞌu kueꞌe ñayiu Israel letra jan, chi yatni yuñuu Jerusalén kuu nuu n‑ka xatakaa‑s Jesús. Tnuꞌu hebreu, xiꞌin tnuꞌu latín, xiꞌin tnuꞌu griegu, n‑kidavaꞌa‑s letreru jan. 21 Xijan kuu xa dutu ka taxnuni nuu ñayiu Israel, n‑ka jaꞌan‑s nuu Pilato:

—¡Maxku kadavaꞌa‑n: “Se kunxaꞌnu ka nuu ñayiu Israel”! Kadavaꞌa‑n: “Se yaꞌa n‑jaꞌan xa kuu‑s se kunxaꞌnu ka nuu ñayiu Israel.”

22 N‑jaꞌan Pilato:

—Xá n‑chidotnuni‑s tnuꞌu n‑jaꞌan‑r, te duꞌa kendoo.

23 Na n‑ka xatakaa soldado Jesús, n‑ka tnɨɨ‑s daꞌma‑ia, te n‑ka dakexio nuu tnaꞌa‑s. Koon soldado, te koon nuu yuku daꞌma‑ia. Daꞌma dijun‑ia du. Ko daꞌma jan n‑xio nɨɨ, ñatu n‑xo ndɨku. 24 N‑ka jaꞌan soldado ɨɨn‑s nuu ɨnka‑s:

—Maxku ndata‑ro daꞌma dijun de. Na tava‑ro suerte, nuu ndeda‑ro na niꞌi daꞌma de.

Te duꞌa n‑xetnaꞌa tnuꞌu Ianyuux n‑ka chidotnuni seyɨɨ xá n‑kuu kueꞌe kuia. Jaꞌan tnuꞌu Ianyuux: “N‑ka dakexio nuu tnaꞌa‑s daꞌma‑r, te n‑ka tava‑s suerte xaxeꞌe daꞌma‑r.” Te duꞌa n‑ka kida soldado romano, hora n‑ka xatakaa‑s Jesús.

25 Te yatni xeꞌe curuxi Jesús, n‑xo nujuiin dɨꞌɨ‑ia xiꞌin kuꞌu‑ña. María, ñadɨꞌɨ Cleofas, xiꞌin María Magdalena tuku. 26 Na n‑xini Jesús xa ijan nujuiin dɨꞌɨ‑ɨa xiꞌin se dakuaꞌa‑ia, se xemani‑ia, n‑jaꞌan‑ia nuu dɨꞌɨ‑ia:

—Ñadɨꞌɨ, kada‑n kuenda xa daꞌya yɨɨ‑n kuu‑s.

27 Dada n‑jaꞌan‑ia nuu se dakuaꞌa‑ia:

—Kada kuenda xa dɨꞌɨ‑n kuu mee‑ña.

Te kɨu ijan ni, se ijan, se dakuaꞌa‑ia, n‑xeka‑s‑ña veꞌe‑s.

28 Te na n‑yaꞌa ntdaa xaꞌa, te naꞌa Jesús xa xá n‑daxinokava‑ia tniu n‑xiaꞌan Ianyuux. Xa na jɨn tnaꞌa tnuꞌu Ianyuux n‑ka chidotnuni seyɨɨ xá n‑kuu kueꞌe kuia, n‑jaꞌan Jesús:

—Yichi‑r ndute.

29 Ijan nukoo ɨɨn tndoꞌo chitu ndute vinagri. N‑ka dandoyo soldado ɨɨn daꞌma vita xiꞌin vinagri. N‑dukundee‑s daꞌma jan dɨkɨ ɨɨn vara yutnu nani hisopo, te n‑ka tenee‑s daꞌma jan yuꞌu‑ia. 30 Na n‑tɨꞌu Jesús vinagri jan, n‑jaꞌan‑ia:

—¡Xá n‑daxinokava‑r tniu‑r!

N‑nune dɨkɨ‑ia, te n‑xiꞌí‑ia.

31 Kɨu ijan kuu kɨu ka kida tuꞌa ñayiu Israel, xa kax koio‑i ndeyu viko Paxcua. Kɨu kaxi‑i ndeyu jan, kuu kɨu ndetatu ñayiu Israel. Yo kaꞌnu kɨu kuu. Se Israel, ñayo‑s n‑ka juini xa kuitakaa ka ndɨyɨ nuu curuxi kɨu ijan. Xijan kuu xa n‑ka xijan‑s nuu Pilato, xa kaꞌnu koio soldado yɨkɨ dichi Jesús, xiꞌin yɨkɨ dichi uu ka se n‑ka xatakaa‑s, xa nuneꞌe koio‑s ndɨyɨ, te kaneꞌe‑s‑yɨ jɨꞌɨn. 32 Xijan kuu xa n‑ka xee soldado nuu xtuu curuxi. N‑ka xaꞌnu‑s yɨkɨ dichi se n‑ka xatakaa‑s kiꞌna nuu hora n‑ka xatakaa‑s Jesús. Dada n‑ka xaꞌnu‑s yɨkɨ dichi ɨnka se n‑ka xatakaa‑s. 33 Ko na n‑ka xee‑s nuu n‑takaa Jesús, n‑ka xini‑s xa xá n‑xiꞌí‑ia, te ñayo‑s n‑ka xaꞌnu yɨkɨ dichi‑ia.

34 Ko ɨɨn soldado, n‑tuu‑s yutnu io punda deen yɨkɨ naꞌa Jesús, te n‑xatu nɨñɨ‑ia xiꞌin ndute. 35 Se n‑xini xaꞌa, jaꞌan ndaa‑s xa duꞌa n‑kuu. Xandaa jaꞌan‑s, te naꞌa‑s xa jaꞌan‑s xandaa. Jaꞌan‑s xa jandixa koio mee‑n tuku. 36 Te n‑yaꞌa xaꞌa, xa n‑xetnaꞌa tnuꞌu Ianyuux n‑ka chidotnuni seyɨɨ xá n‑kuu kueꞌe kuia. N‑ka chidotnuni‑s: “Ni ɨɨn yɨkɨ‑ia ma kaꞌnu koio‑s.” 37 Dɨuni n‑ka chidotnuni‑s: “Kundeꞌa koio ñayiu se n‑ka datnukueꞌe‑i.”

38 Te io ɨɨn seyɨɨ nani José. Se ñuu nani Arimatea kuu‑s. Jandixa‑s Jesús, ko yo naꞌi jandixa‑s‑ia, chi yuꞌu‑s nuu se Israel. N‑xijan‑s nuu Pilato, xa juejoon‑s xa kaneꞌe‑s yɨkɨ kuñu ndi Jesús, xa jɨn chinduxi‑s‑ia. N‑xejoon Pilato, te n‑xeꞌen José, te n‑nuneꞌe‑s yɨkɨ kuñu ndi Jesús nuu curuxi. 39 N‑xeꞌen Nicodemo tuku. Nicodemo kuu se n‑xitoniꞌni Jesús ɨɨn xakuaa. Neꞌe‑s uu diko oꞌon kilo yuku ua, yuku nani mirra xiꞌin yuku nani áloe. 40 Xndeka‑s yɨkɨ kuñu ndi Jesús, n‑ka duku niꞌna‑s‑ia daꞌma xiꞌin yuku ua. Duꞌa kida ñayiu Israel, hora chinduxi‑i ndɨyɨ.

41 Yatni nuu n‑ka xatakaa soldado Jesús, io ɨɨn jardín. Ijan n‑xio ɨɨn yau kava xee, nuu ta kɨnduxi ka ni ɨɨn ndɨyɨ. 42 Kɨu ijan kuu kɨu ka kida tuꞌa ñayiu Israel, xa kax koio‑i ndeyu viko Paxcua, te katuu yau kava jan yatni nuu n‑ka xatakaa soldado Jesús. Xijan kuu xa, ijan n‑ka kuxi José, se ñuu Arimatea, xiꞌin Nicodemo, yɨkɨ kuñu ndi Jesús.