1 Alipipai, aeꞌ andaiwaꞌma ipaꞌ ukup mogamogahepama hiahaom amamba. Esis bafasapa hiasi Israel sape lafela ilagw agwamba gwaliꞌas sagafiꞌi eaꞌ hiasi safeꞌ boꞌwagah asasigahi sowala sambo naoh embel akwahimi* Eks 13:21-22; Eks 14:22-29 2 sawisa ilagw gwaloma naoh embel sagafiꞌi. Amamba mondolaꞌwaifa sogofaꞌ baptais sape sisihis saloma Moses sailana sagafeꞌ.* Eks 16:35 3 Eaꞌ esis hiasi saꞌ gwaꞌaisi isimba God nagasoꞌasasi,* Eks 17:6; Nam 20:11 4 saꞌ embel ambalemba God nagasoꞌasambeli. Ahoꞌ, saꞌ embela otam amamba God nagasoꞌasami nafeꞌ nagalomasi. Otam amamba nondolaꞌwaifa Krais atona.* Nam 14:26-30; Hi 3:17; Ju 5 5 Apaꞌ owaꞌ, God nandaiwaꞌma hiasi sagape laꞌafena esisi. Isimba atis deiꞌ sasa sowala hiꞌalas itap anamba wafigima fataupigima.* 1 Ko 10:11; Nam 11:4,34

6 Eaꞌ hiahaom amamba hiami mataga mindihimbaꞌmapa siꞌi anef ikwafa apaꞌ motolom mogogawama apaꞌ ina aꞌ kowolapa ukup pipila hiahaom awami siꞌi esis fowaꞌ, owaꞌi.* Eks 32:6 7 Ipaꞌ ina kowolepa pila wale basoꞌamunai siꞌi isimba anis fowaꞌ sandaꞌam, owaꞌi. Baibel nagaꞌi esis naꞌamba naꞌi, “Amam nematawa sape sandaꞌ gwaꞌaisi embel saꞌas sosafel salemb atin sandaꞌ kwalaꞌap kindeꞌiaf saꞌoh.”* Nam 25:1-9

8 Apaꞌ wapani owaꞌi mondaꞌ waf afamba awafi soꞌa waulafia siꞌi isimba anis fowaꞌ sandaꞌam, ama nemaf atetef esis 23,000-pelais sagaꞌ dolamas hiꞌalas.* Nam 21:5-6 9 Eaꞌ apaꞌ ina mososaefa God mogwambana siꞌi isimba anis fowaꞌ sagagwambana ma uguf awagufi fahasa esis higilagalas, owaꞌi.* Nam 16:41-49; Hi 3:11,17 10 Ipaꞌ ina aꞌ ukup awep piꞌi diga wandafugai peloma God siꞌi isimba anis fowaꞌ sandaꞌmanam God, ma ensel anamba naha epes sagagaꞌii nafiꞌi nahas sagagaꞌ hiꞌagalas, owaꞌi.* 1 Ko 10:6; 1 Pi 4:7

11 Hiahaom amamba hiami magatagama esisi, amamba siꞌi ikwafa apaꞌ epes deiꞌ magape nogota ataꞌe felefeleꞌma taꞌi hiꞌigilatai. Amamba siꞌi ikwafa apaꞌ mogatoloma solawaipa, naꞌamba mondaꞌ waf awafi siꞌi esis. 12 Eaꞌ iꞌi epen ami nigaꞌi anin atin laꞌifin nagalutu banagani, anin aꞌ nendape solawain andeandeꞌ. Naꞌamba newa ma waf awafi.* 1 Ko 1:9 13 Gwamba maina nagatagama ipeꞌi, amamba ina anom daiam, owaꞌatin. Amamba eaꞌ naꞌamba atin siꞌi gwamba hiani nagatagama epes hiasi. God naila basef ananifi endilisifi nandaꞌ hiahawes ananisi datima. Anen ina atiasi niꞌi ahoꞌma anin gwamba netagama ipaꞌ nikilaꞌ banagami ipeꞌimi, owaꞌatin. Nemaf afamba gwamba nogatagamepa, God nondaꞌ anoꞌw ufiaꞌwa notopalopepa pegalutu banagepa.* 1 Jo 5:21

14 Ipaꞌ alipipai endilisi aeꞌipai, ipaꞌ pekwaha waf afamba pagailafa wale anamba basoꞌamunaii pewaꞌ alafugaha anen. 15 Ipaꞌ pegegawai, deiꞌ aꞌipipa. Ipaꞌ atipa pewawaloga basef ifimba aeꞌafi.* Mt 26:26-28 16 Kap apamba aman nugumafi lotuwi nogofaloꞌmapi, apamba naꞌamba. Apaꞌ manifela Goda kap apamba pakolasa apaꞌ magaloma esimbel Kraisi. Endilisi atis bret atamba apaꞌ magawalotai, atamba takolasepa magaloma alop Kraisi.* Ro 12:5; Ef 4:16 17 Bret eaꞌ atotota. Amamba mihimbaꞌmapa amam nematawa hiapai mape siꞌi alop atotop. Deiꞌ main, apaꞌ hiapai mandaloma maꞌ bret atotota atamba.* Lev 7:6

18 Ipaꞌ ukup ataꞌ pendapoma esis Israel. Epes isimba sagaꞌ gwaꞌaisi mafis sondolali ma God belita atambai sandakolas saloma Goda belita atamba.* 1 Ko 8:4 19 Basef kofagefa dokoꞌ agaꞌipipafi faꞌi main? Gwaꞌaisi mafis mais sondololima wale basoꞌamunai endilisisi? O, wale anamba basoꞌamunai endilisinai? Aeꞌ agaꞌias naꞌamba? Owaꞌatin.* Diu 32:17; Re 9:20 20 Aeꞌ aꞌias aꞌi hiahaom esis sogololama Godi sondolalima wale basoꞌamunai, ina sondolali ma God, owaꞌatin. Aeꞌ andaiwaꞌma ipaꞌ pendakolas pegaloma wale anamba basoꞌamunai, owaꞌi.* 2 Ko 6:15-16 21 Ipaꞌ ina peaꞌ embela kap Dembinaii poloma kap wale basoꞌamunai wapani, owaꞌi. Eaꞌ ina peaꞌ gwaꞌaisi belita Dembinaii soloma gwaꞌaisi belita sondolali ma wale basoꞌamunaiatai wapani, owaꞌi.* Diu 32:21 22 Apaꞌ ina aꞌ mondaꞌ maol mondaoꞌoma mogaloma wale basoꞌamunai mondaꞌ okom Dembinai aoma apaꞌ, owaꞌi. Apaꞌ ina aꞌ miꞌi apaꞌ banagipai mikilaꞌ Dembinai, owaꞌ.* 1 Ko 6:12

23 Ipaꞌ paꞌi, “Andeandeꞌma mondaꞌ hiahaom mamimami hiami.”

Isimba endilisi, apaꞌ ina aꞌ amamba hiami matopalopapa, owaꞌatin. Ipaꞌ paꞌi “Andeandeꞌma mondaꞌ hiahaom mamimami hiami.”

Apaꞌ ina hiahaom hiami mandaꞌapa mataga banagepa ma hapif, owaꞌatin.* Ro 15:2 24 Ipaꞌ ina aꞌ ukup pepoma ipaꞌ atipa pindumafuma pepe andeandeꞌ, owaꞌ. Ipaꞌ ukup pendapoma anis daias wapani ma petopalopas sogape andeandeꞌ.

25 Ambegw hiami mafisim sagatalom stowai, amamba ipaꞌ pendaꞌam. Ina aꞌ nomonas sope hiahias pihahaliꞌmam naꞌanaꞌa, owaꞌi.* Sam 24:1

26 Deiꞌ main, “Itap apaꞌe paloma hiahaom hiami hiꞌalam amamba Dembinaii atom.”* Lu 10:8

27 Iꞌi anin epen owaꞌ nogahapifa Kraisia nefalepa niꞌi pefeꞌ peloman pegaꞌ gwaꞌaisi ma piꞌi pegafeꞌma, daoꞌ andeandeꞌ. Pefeꞌ peaꞌ gwaꞌaisi hiasi anin nandandombasa nagasiꞌipasi. Ipaꞌ ina aꞌ nomonas sotagamepa hiahias pihahaliꞌanas naꞌanaꞌa, owaꞌi.* 1 Ko 8:7 28 Apaꞌ iꞌi anin epen niliꞌ niꞌipipa nigaꞌi, “Mafis isimba sondolalima wale basoꞌamunaisi”, daoꞌ ipaꞌ apegawa basef ananifi ina peaꞌas, owaꞌi, hapaisi. Ipaꞌ pindaꞌi uwahipigama epen inimba. 29 Aeꞌ ina aꞌi pemeꞌ malogof fagape ukup ipeꞌipi nomoni pilas, owaꞌ. Aꞌi pindaila malagol gagape okom nomon epen inimba nagaꞌipipai. Naꞌamba anin epen daian niꞌi, “Aeꞌ agape wahifiwai. Deiꞌ maina okom anin epen owaꞌ banagania mogasindiꞌamona aeꞌ?* 1 Ti 4:4 30 Iꞌi aeꞌ inifela Goda egaꞌas, deiꞌ maina anin epen nesopama aeꞌ ma egaꞌ mafis isimba aganifela Godasi? Naꞌambai aeꞌ andaiwaꞌ.”* Kl 3:17

31 Deiꞌ egwa basef epen inimbai. Iꞌi ipaꞌ piꞌi pegaꞌ gwaꞌaisi embel mais a pendaꞌ hiahawes mamahisa, pendaꞌasa pegasaꞌma agol Godi atogol luꞌwagol.* Ro 14:13 32 Ipaꞌ aꞌ ukup pendapoma epes hiasi hiꞌindalas, esis Juda soloma esis owaꞌ Judaisia, eaꞌ soloma amam nematawa sios isimba Godi. Eaꞌ ipaꞌ ina aꞌ pendaꞌ anef waf fendaꞌ esis sogowama waf awafi, owaꞌi.* 1 Ko 9:20-22 33 Siꞌi aeꞌ wapani, andaꞌ hiahawes hiasi ma egatopalopa epes hiasi ma ukup pigaꞌi waf buꞌwafi hiafi aeꞌ andaꞌafi. Aeꞌ ina andaꞌas atopalopa aeꞌ imafi aeꞌ atowe, owaꞌ. Andaꞌasa agatopalopa amam nematawa hiasi ma God nofaꞌas nokwahomas waf awafi sogotanimai.