4
Ŋgar to tamtoghon to Krisi igham di tinim paghu
1-2 Tovenen sawa to Krisi ineep izi taan, ye imbaad pataŋani ve iyamaan yabyabuuŋ ila tini, leso iuul ghiit. Yam tovene paam. Agharaat gham ve asaŋan pa badooŋ pataŋani. Leso ataghon ŋgar to Krisi tonowen. Pasa, tamtoghon to ighaze imbaad pataŋani pa Krisi iza ve iyamaan yabyabuuŋ ila tini, ye isob pa ŋgar samia wa. Tovenen sawa to ye ineep izi taan, ŋgar to lolo muŋgina irau igham pooz pani muul maau. Ye pale itaghon Maaron lolo. Ro 6:2+; 2Kor 5:15; Ga 5:24; 1Pe 2:21
3 Ŋgar samsamia naol to yes kankanooŋa lolodi igham padi, yam agham di iraua. Aghita. Muuŋ, lolomim ipazaagh gham pa ghamuuŋ ŋgar samsamia naol. Sawa tonenen, matamim samia animale ŋgavuun, ve aghunghun le awaghamgham, aluplup gham pa ghanghaniiŋ ve ghunghunuuŋ toman oroor tiina, ve ambesmbees pa maaron kaaromŋa to tutuuŋ to Maaron iŋgalsekin ghiit padi. Ro 13:12+; Ep 4:20+
4 Ve aazne, nditamim tighita gham ve tigham ŋgar naol. Pasa, yam ala toman di ve yamŋa alup gham pa ghamuuŋ ŋgar samsamia naol tonowen muul maau. Tauto tipiyaav saveeŋ samsamia naol payam, ve tiveleg gham. 5 Eemoghon muri, yes pale tiyoon ila Ŋgeu Tiina mata, ve tivotia ŋgar to tighami izi taan ne pani. Ye igharaat tau, ve isasaŋan sawa to iŋgabiiz tamtoghon tisob ve ighur atia padi. Yes to tineep matadi iyaryaar, ve yes mateeŋa paam. Mbaŋ 10:42; 2Tim 4:1; Yems 5:9
6 Maaron ighaze tamtoghon toni tineep matadi iyaryaar tinimale ye tau. Pughu tonene to tamtoghon toni to timaat wa, sawa to tineep matadi iyaryaar, tilooŋ varu poia.* Ataam to muuŋ Maaron tamtoghon toni tilooŋ varu poia, nene saveeŋ mbuaaŋ toni katindi to tisavia Mesia. Yes to tighur ila saveeŋ mbuaaŋ tonowen, Maaron ighita di ighaze yes tighur ila to Mesia. Ve ila ghurla todi tonowen, ye ighita di ighaze tineep deŋiadi ila mata. Tovenen sawa to timaat, ye igham anunudi tineep matadi iyaryaar. Ve aazne, Mesia izi inim taan wa. Tovenen sei to ighaze ighur ila to Krisi, ve imaat, Maaron pale igham anunu ineep mata iyaryaar paam.
Yes timaat pasa, tamtoghon tisob to taan to tigham sosor, Maaron ighur atia padi. Eemoghon ila uraat to Avuvu Patabuaŋ, aazne anunudi tineep matadi iyaryaar. Ro 6:23, 8:10; 1Pe 3:19
Tagharaat tauud ve tagham uraat to Maaron ighuri inim nimaad
7 Aazne, sawa to mbeb tisob tilaledi, nene inim igharau wa. Tovenen agham ŋgar pooi, ve aŋgin taumim pooi. Leso iuul gham pa suŋuuŋ tiam. Ro 13:12+
8 Ve mbeb tiina to ilib pa mbeb tisob, nene ŋgar to lolood pa tauud. Tovenen azuaria gham le ataghon katin ŋgar tonene. Pasa, ŋgar to lolood pa tauud, nene igham ghiit tapul sosor naol to tamtoghon tigham pait, ve lolood imaagh padi. Np 10:12; 1Kor 13:4+; Kol 3:14
9 Ŋgar to ghamuuŋ poian loomba irau ineep ariaŋa ila lolomim. Ayasiil pani malep. Ro 12:13; Hib 13:2
10 Maaron ireirei uraat ve ŋgar popoia naol naol pait itaghon tau poia toni. Tovenen sa uraat ma ŋgar to ye ireii payam, aŋgin poiani ve agham anoŋa toni ivot. Leso awaulan gham, ve anim mbesooŋa popoia to Maaron. Ro 12:6+; 1Kor 12:7+; Ep 4:11+
11 Tovenen ighaze ŋgeu eta le uraat pa ivotia Maaron aliŋa pa tamtoghon, ye isaav itaghon tau ŋgar toni malep. Isaav inimale Maaron tau isavsaav ila avo. Ve ighaze tamtoghon eta le uraat pa iuul tamtoghon, ye irau igham tapiri ila to Maaron ve igham uraat tonenen. Ighaze yam agham tovene, nene pale ŋgar tiam isob igham tamtoghon tipait Maaron pa tapiri ve poia toni ila Yesu Krisi iza.
Tapakur Krisi iza ve tapaiti pa tapiri, to aazne ve itaghoni taghoni gha ila. Onoon.
Ighaze tambaad pataŋani pa Krisi iza tagham ŋgar naol malep
12 Yam ndiran tiou, lolog payam kat. Onoon aazne, pataŋani tiina kat itoov ghurla tiam, ve ayamaana inimale yab ighan gham. Eemoghon pataŋani to ivot payam ne, ruŋamim iza pani ve agham ŋgar naol aghaze nene pataŋani ite kat ne malep. Pasa, pataŋani tovene igham Maaron tamtoghon toni katindi wa. Mbaŋ 14:22; 2Tim 3:12; 1Pe 1:6+
13 Lolomim poia. Pasa, aazne, yam alup toman Krisi ve ambaad pataŋani inimale muuŋ ye imbaada. Tovenen ayoon ariaŋa. Leso sawa to Krisi ipatooŋ tapiri ve iza tiina ivot ighazooŋ, ye pale igham gham lolomim poia le poia kat. Pil 3:10; Kol 1:24
14 Tovenen ighaze yam avotia Krisi iza ve ataghon ŋgar toni, ve tamtoghon tipiyaav saveeŋ samia payam ve tiveleg gham, ghoro tinimim iza pa poia to Maaron to iza tiam. Pasa sawa tovene, Maaron Avuvu to ipatooŋ Maaron tapiri ve poia toni pait, pale ineep kat toman gham. Mt 5:11
15 Eemoghon tiam eta irab tamtoghon imaat, iyub, isegeed saveeŋ sorok, ma igham ŋgar samia ite paam malep. Pasa, ighaze agham ŋgar tovene ve tiŋgal matamim pani, nene poia maau. [Ŋgar tovene igham mayaŋiiŋa pa Krisi ve iwaghamun iza.] 16 Eemoghon ighaze yam ataghon Krisi ve ambaad pataŋani pani, mayamim malep. Tinimim iza ve apait Maaron. Pasa, Krisi igham gham anim le wa. Tauto tiwaat iza payam tighaze yam Kristen. Mbaŋ 5:41; Pil 1:29
17 Sawa to Maaron iŋgabiiz tamtoghon toni ve ighur atia padi, tauto taza pani wa.† Petrus ighita ighaze pataŋani to yes Kristen timbaad di, ŋgara tovene: Aazne, Maaron iŋgagabiiz tamtoghon toni. Ve ighaze ŋgar todi deŋia maau, ye ipul pataŋani ivot padi pa ipasaluŋgan di. Leso sawa to Mboŋ Muri ve gabizooŋ tau ighaze ivot, yes pale tineep pooi. Eemoghon yes to tighur ila maau, ye ipul di tineep tovene le sawa to Mboŋ Muri, ghoro iŋgabiiz di ve ighur atia padi ve tilaledi.
Ve ye ighaze iŋgabiiz ghiit muuŋ. Le isob, ghoro iŋgabiiz yes pida paam Aghita. Ighaze ye igham tovene pa iit tamtoghon toni, pale igham sa ŋgar pa yes to tizorzoor varu poia toni? 18 Maaron aliŋa to timbooda, isaav tovene:
“Ataam to Maaron igham mulin ghiit, nene ipataŋan kat pa ndiran deŋiadi titaghoni.
Ighaze venen, pale vena pa ndiran samsamiadi to matadi iŋgal Maaron rita maau? Pale sa ŋgar ivot padi?” Np 11:31
19 Tovenen ighaze Maaron lolo pa yam ambaad pataŋani pa Krisi iza, yam aghur taumim ila ye nima, ve agham ŋgar poia irau sawa isob. Ye irau ipul muri payam maau. Pasa, ye to ighur gham, ve lolo ikis tamtoghon toni ariaŋa. Mbo 31:5; Lu 23:46; Mbaŋ 7:59
*4:6: Ataam to muuŋ Maaron tamtoghon toni tilooŋ varu poia, nene saveeŋ mbuaaŋ toni katindi to tisavia Mesia. Yes to tighur ila saveeŋ mbuaaŋ tonowen, Maaron ighita di ighaze yes tighur ila to Mesia. Ve ila ghurla todi tonowen, ye ighita di ighaze tineep deŋiadi ila mata. Tovenen sawa to timaat, ye igham anunudi tineep matadi iyaryaar. Ve aazne, Mesia izi inim taan wa. Tovenen sei to ighaze ighur ila to Krisi, ve imaat, Maaron pale igham anunu ineep mata iyaryaar paam.
†4:17: Petrus ighita ighaze pataŋani to yes Kristen timbaad di, ŋgara tovene: Aazne, Maaron iŋgagabiiz tamtoghon toni. Ve ighaze ŋgar todi deŋia maau, ye ipul pataŋani ivot padi pa ipasaluŋgan di. Leso sawa to Mboŋ Muri ve gabizooŋ tau ighaze ivot, yes pale tineep pooi. Eemoghon yes to tighur ila maau, ye ipul di tineep tovene le sawa to Mboŋ Muri, ghoro iŋgabiiz di ve ighur atia padi ve tilaledi.