Rau To Paulus Imbooda Ila To Yes Kolosia
Kolosi—Colossians
1
1-2 You Paulus. Maaron itaghon tau lolo, ve ighur ghou nanim mbaŋooŋa to Yesu Krisi. Yeru toŋvetaz toit Timoti nimbood rau tonene ilat to yam tamtoghon patabuaŋa to Maaron to aneep izi ndug Kolosi. Yam toŋvetaz to aneep tuŋia ila to Yesu Krisi, ve akis ghurla tiam ariaŋa.
Tamaan Maaron ighur poia toni iza tiam, ve iŋgin gham aneep pooi toman lolomim luuma. Onoon.
Paulus lolo poia pa ŋgar to yes Kolosia
3 Sawa isob to yeru nighur gham ila suŋuuŋ tiei, nipait Tiina toit Yesu Krisi Tama Maaron toman lolomai poia kat. 4 Pasa, nilooŋ varumim tighaze yam aghur ila to Yesu Krisi ariaŋa, ve aneep tuŋia ila toni. Ve lolomim pa Maaron tamtoghon toni patabuaŋa tisob, ve aghamgham poian di. 5 Ŋgar tiam tonanan, yam ataghoni pasa, yam awatag: Maaron ighur gham pa agham nepooŋ poia izi ndug sambam. Tauto aghurghur matamim pa nepooŋ tonowen ve asasaŋan. Sawa to tivotia saveeŋ onoon to varu poia payam, yam alooŋ nepooŋ tonenen saveeŋa. 1Tes 1:3; 1Pe 1:4
6 Saveeŋ to varu poia to ilat peria tiam, nene ighurghur anoŋa popoia naol tivotvot irau ndug tisob, raraate inimale tivotvot payam. Sawa inim mata to yam alooŋ poia to Maaron saveeŋa ve aghazooŋ pani, ve inim aazne, varu poia ighurghur anoŋa popoia tivotvot ila lolomim. Yo 15:5
7 Itaad ite Epapras to yeiŋa nimbesmbees pa Krisi ne, lolomai pani kat. Ye mbesooŋa poia eez to Krisi, ve tini imbees kat pa uraat toni. Ye igham naghomai, ve ipatoot gham pa saveeŋ onoon to varu poia. Kol 4:12; Plm 23
8 Ye ipaesia varumim payei ighaze Avuvu Patabuaŋ ipamundigin gham ve aghur lolomim kat pa Maaron ve tamtoghon paam.
Paulus ighason Maaron pa ipalot yes Kolosia
9 Tovenen sawa to nilooŋ varumim ve inim, yei nighurghur gham ila suŋuuŋ tiei. Sawa isob, nighason Maaron pa ipavonin gham pa ŋgar popoia tisob to tinim pa ye tau Avuvu, ve ipaghazoŋan gham pa ŋgar to ye lolo pani. Ep 1:17, 5:17
10 Leso laghooŋ tiam deŋia itaghon poia to Tiina toit Krisi ipatooŋa payam, ve ŋgar tiam isob ighami lolo poia. Ve yam pale agham uraat popoia naol naol tinim ghurla tiam anoŋa, ve ŋgar tiam ivotvot le awatag katin Maaron. Yo 15:16; Ep 4:1+; Pil 1:27
11 Maaron toit, ye ariaŋa ve iza tiina pa tapiri. Yei nighaze Maaron ipavonin gham kat pa tau tapiri, ve ipalot gham. Leso ayoon ariaŋa pa badooŋ pataŋani to naol ne, 12 ve apait Tamaan Maaron toman lolomim poia. Pasa, ye igham mulin gham, ve aazne yamŋa tamtoghon toni patabuaŋa asob izamim iyoon pa agham nepooŋ poia ila ye tau ŋguruba izi ndug sambam. Mbaŋ 26:18; Ep 1:11,18, 3:16
13 Muuŋ, ŋgar to ndoroom igham pooz pait. Ve aazne, Maaron ipas ghiit tavot pa ndoroom tapiri, ve ighur ghiit taneep ila Natu Yesu Krisi samba, leso tataghon pooz toni. Natu tonowen, ye lolo pani kat. Mbaŋ 26:18; 1Pe 2:9
14 Aghita. Iit to taneep tuŋia ila to Krisi ne, ye ipul tau imaat pa ireu sosor toit, ve ipas ghiit tavot pa samia tapiri. Ep 1:7+
Krisi iŋgin mbeb tisob
15 Onoon, iit irau taghita Maaron maau. Eemoghon uraat toman ŋgar to Natu Yesu Krisi, tauto ipatooŋ Tama Maaron ivot ighazooŋ pait. Yo 1:18, 14:9; 2Kor 4:4; Hib 1:3
Krisi imuuŋ pa mbeb tisob to Maaron ighur di, ve inim daba padi.
16 Pasa, Maaron ighur mbeb tisob tivot ila Krisi nima.
Mbeb to sambam, ve mbeb to taan. Mbeb to taghita di pa mataad, ve mbeb to taghita di maau ne paam.
Yes daba to tanepneep ila sambadi ne, ve mbeb pida to tapiridi ve izadi tintina ne paam. Inimale yes aŋela ve avuvu ariaŋadi naol naol paam.* Avuvu ariaŋadi iŋarua mbeb inimale navou, pughuun, yaŋyaŋa, ve mbeb pida paam.
Mbeb naol tonowen, Maaron ighur di tisob tivot ila Natu nima, ve tineep pa timbees pani. Yo 1:3,10; Hib 1:2; 1Pe 3:22
17 Sawa to mbeb eta ivot sone, Natu ye inepneep.
Ve ye moghon to ikiskis mbeb tisob tineep tuŋia ila inadi.
18 Ye inim daba pa lupuuŋ toni ve igham pooz padi. Ve yes tinimale ye anoŋa.
Ye to imundig pa mateeŋ muuŋ, ve inim pughu pa mundigiiŋ to yes mateeŋa.
Tauto iza ivot inim tiina le ilib pa mbeb tisob. 1Kor 15:20,23; Ep 1:22+
19 Tovenen Maaron itaghon tau lolo, ve ighur tapiri toman iza, ve ŋgar toni isob ineep ila to Natu. Kol 2:9; Hib 1:3
20 Koi to ineep ila iit, Maaron, ve mbeb tisob to sambam ve taan sosood, Maaron ighaze ipasobi, ve igham ghiit toman mbeb tisob tonowen ve tamuul tala to ye tau.
Pughu tonene to Natu siŋ toni imaliŋ izala ai pambarooŋ ve imaat. Leso ipasob koi tonowen le isob kat, ve itiŋa Maaron talup ghiit tanim ee moghon, ve taneep pooi. Ro 5:1,10; 2Kor 5:18+; 1Yo 2:2
Krisi ipasob koi to ineep ila Maaron ve yes Kolosia sosodi
21 Muuŋ, yamŋa Maaron irau alup gham maau. Koi ineep ila sosomim, ve aneep saguan saguan. Pasa, ŋgar tiam poia maau, ve aghur koi pani, ve aghamgham ŋgar samsamia naol. Ep 2:3,12
22 Eemoghon aazne, ye ipasob koi tonenen, ve yamŋa alup gham anim ee moghon wa. Pasa, ye ipul Natu izi inim taan, ve iyamaan yabyabuuŋ ila tini ve imaat. Tauto ireu sosor tiam. Leso sawa to igham gham ala ayoon ila Maaron mata, Maaron pale ighita gham ighaze yam tamtoghon toni patabuaŋa. Lemim sosor eta maau, ve lemim saveeŋ eta maau. Ep 1:4, 2:14+; Jud 24
23 Eemoghon yam irau akis ghurla tiam ariaŋa, ve ayoon tuŋia ila to Krisi. Ve ŋgar to saŋaniiŋ nepooŋ poia to Maaron ighaze igham pait, nene mbeb eta ighereb gham ve apuli malep. Varu poia to tisavia payam ve alooŋa, nene isavia nepooŋ tonowen, ve tivotia irau ndug tisob to tineep ila sambam paroŋania. Ve you paam, Krisi ighur ghou nanim mbesooŋa pani. Mk 16:15; Kol 1:6, 2:7
Paulus ipul tau pa uraat to Krisi
24 Onoon, aazne you nambaad pataŋani ve nayamaan yabyabuuŋ ila tinig pa nauul gham. Eemoghon lolog poia. Pasa, pataŋani naol to Krisi imbaad di, nene tisob sone. Tauto poia pa anag nauuli ve nambaad pida. Nene inimale you nimag to nauul lupuuŋ to Krisi. Pasa, lupuuŋ toni, nene inimale ye anoŋa. 1Kor 12:27; 2Kor 1:6+; Ep 3:13; Pil 2:17
25 Maaron inumeer ghou ve ighur uraat inim nimag pa nauul lupuuŋ to Krisi. Ve ye ighaze napatoot gham pa saveeŋ toni to naol ne, leso awatag katin ŋgar toni. Ga 2:7; Ep 3:2,7+
26 To muuŋ we, sawa to nditimbuud ve inim, ŋgar to you nasasavia ne, iyooŋ. Tovenen tamtoghon tikankaan pani. Eemoghon aazne, Maaron ivotia ŋgar yoŋgaaŋ tonene pa tamtoghon toni patabuaŋa ve ighazooŋ wa. Ro 16:25+; 1Kor 2:7; Ep 3:3-9
27 Ye igham tovene, leso yam to Yuda maau ne awatagi paam. Ŋgar yoŋgaaŋ tonene, mbeb poia kat, ve ipaghazoŋan ghiit pa Maaron tapiri ve poia toni. Ŋgar tonene iŋarua Krisi to aazne ineep ila yam lolomim.† Ŋgar yoŋgaaŋ to Maaron, nene vene: Ye ighaze igham mulin tamtoghon to ndug ndug ve ipatooŋ poia toni padi, ve Krisi ilup di tinim lupuuŋ ee moghon, ve ineep ila lolodi. Yes Yuda, ve yes to Yuda maau ne paam.
Ye ndamo payam, tauto yam asasaŋan sawa to ye igham mulin gham, ve yamŋa aneep ila Maaron ŋguruba izi ndug sambam. Ep 1:18
28 Tovenen yei nivovotia Krisi varu pa tamtoghon tisob, ve nipatoot di, ve nisavsaav ariaŋa padi. Leso tiwatag ŋgar popoia tisob to tinim pa Maaron, ve sawa to nighur di tila toni, ye pale ighita di ighaze yes tisob tiraua kat pa ŋgar to Krisi. Mt 5:48; Ep 4:13
29 Ŋgar tonene to ipapamundigin ghou, tauto nazuaria ghou kat, ve narab taug pa uraat tiou. Ve tapiri tiina to naghamghami ila to Krisi, nene ipalot ghou pa uraat tiou. Mbaŋ 20:20; 1Kor 15:10; Ep 3:7; Pil 4:13
*1:16: Avuvu ariaŋadi iŋarua mbeb inimale navou, pughuun, yaŋyaŋa, ve mbeb pida paam.
†1:27: Ŋgar yoŋgaaŋ to Maaron, nene vene: Ye ighaze igham mulin tamtoghon to ndug ndug ve ipatooŋ poia toni padi, ve Krisi ilup di tinim lupuuŋ ee moghon, ve ineep ila lolodi. Yes Yuda, ve yes to Yuda maau ne paam.