4
Suŋuuŋ to mboŋ
Mbouŋ to David
Ŋgeu to imuuŋ pa mbouŋ, irau isaav pa tamtoghon pa tirab gita ve timbou mbouŋ tonene
1 O Maaron, you nataŋ roran ghom.
Lolom isamin ghou, ve ulooŋ suŋuuŋ tiou. Pasa, pataŋani igham ghou ve leg ataam maau. Upas ghou navot pa pataŋani tonene.
Leso upaghazoŋan ghou ila tamtoghon matadi ughaze ŋgar tiou deŋia ila matam.
2 Oyai, yam to atatan ghou ve awaghamun izag, ŋeez o apul ŋgar tiam tonanan?
Yam aghur lolomim pa ŋgar soroksorok to le anoŋa maau, ve ataghon ŋgar kaarom. Ŋeez o apuli?
3 Yam awatag: Yes to lolodi ineep tuŋia ila to Yoova ve titaghon ataam toni, ye isia di tinim le wa.
Tovenen sawa to you nataŋ rorani, ye pale ighur taliŋa payou.
4 Amatughez pa Maaron, ve agham sosor muul malep.
Sawa to yam aneep ila inamim to ghenooŋ, neneeŋamim, ve matamim iŋgal taumim ve agham ŋgar pooi pa saveeŋ tonene.
5 Anumeer Yoova ve agham watooŋrau pani toman lolomim. Leso watooŋrau tiam deŋia ila mata.
6 Tamtoghon naol tikausim tighaze: “Oyai, ŋeez o tagham nepooŋ poia!”
Eemoghon you naghaze: “Yoova, lolom poia payei, ve upatooŋ taum payei.”
7 Yom ugham ghou tinig iza ve lolog poia kat,
ilib pa yes to aniiŋ ve vaen anoŋa katindi tivotvot ila uum todi. Pil 3:8
8 Tovenen you ateg izi, ve nazi nagheen le lolog imaagh.
Irau namatughez maau.
Pasa, Yoova, yom taum matam payou ve uŋgin ghou naneep pooi.