5
Suŋuuŋ to mboŋmaagh: Taghason Maaron pa iuul ghiit
Mbouŋ to David
1 O Yoova, ughur taliŋam pa aliŋag, ve ulooŋ taŋiiz tiou tonene.
2 Yom kinik tiou ve Maaron tiou.
Moghon moghon, suŋuuŋ tiou iŋaŋarua ghom.
Tovenen ughur taliŋam pa taŋiiz tiou tonene ve uul ghou.
3 Yoova, mboŋmaagh to naol ne, yom uloŋlooŋ aliŋag.
Ighaze ndugizau, you naghurghur ghasoniiŋ tiou ilat tiom, ve naghur matag payom pa uul ghou. Mbo 57:9, 88:13
4 Maaron, yom lolom pa ŋgar samia maau kat.
Ndiran samsamiadi irau tineep toman ghom maau.
5 Ve ndiran pakuruuŋa irau tiyoon ila matam maau.
Pasa, yom ughur koi pa tamtoghon tisob to tighamgham ŋgar samia. Ro 1:18
6 Yes to avodi kaarom, yom ureu di tilaledi.
Ve ndiran tombanooŋa ve yes to tirabrab tamtoghon le naghodi siŋ, yom lolom padi rita maau kat. Syg 21:8
7 Eemoghon lolom ineep tuŋia inim tiou ve uluul ghou itaghon saveeŋ mbuaaŋ tiom. Tauto you irau nalooŋ nalat rumai tiom.
You naroron payom, ve naput agheg payom ila rumai tiom patabuaŋ.
8 O Yoova, ŋgar tiom, nene deŋia moghon.
Ugham pooz payou, ve upatooŋ ghou pa ataam tiom, leso nataghoni kat.
Pasa, koiagŋa tighaze tiwaghamun ghou.
9 Saveeŋ onoon eta ivot ila avodi maau.
Ve lolodi igham pa ŋgar samia moghon tighaze tiwaghamun tamtoghon.
Yamadi tortoraaŋ saveeŋ. Avodi inimale naal to avo ikakaak.
Tisasavia saveeŋ ŋgoreeŋa naol pa titombaan tamtoghon ve tiwaghamun di. Mbo 12:1+; Ro 3:13
10 O Maaron, uvotia sosor todi ivot ighazooŋ, ve ughur atia padi.
Ŋgar samsamia to tighamgham di, upamuul di tila pa taudi ve iwaghamun di.
Moghon moghon, yes timamalaaŋ pa tutuuŋ tiom. Tovenen undiir di tilaledi.
Pasa, yes tizorzoor ghom, ve tighamgham didiaaŋ.
11 Eemoghon tamtoghon tisob to tiyooŋ ilat tiom, pale tinidi iza.
Yes pale timbou toman lolodi poia irau sawa isob.
Yes to lolodi ineep ilat tiom, yom uvool todi ve upoon di. Leso lolodi poia kat, ve tipait ghom.
12 O Yoova, poia tiom izaza to yes to titaghon katin saveeŋ tiom.
Yom lolom padi ve poia tiom inim sigeu padi.