74
Taŋiiz to yes Israela iŋarua Maaron pa rumai todi
Mbouŋ to Asap
1 O Maaron, pughu vena to upul murim payei kat?
Pale upul ghei nineep tovene itaghoni taghoni gha ila?
Yei sipsip tiom, ve yom ŋginiiŋ tiei.
2 Yei tamtoghon tiom. Muuŋ, yom usia nditimbumai tinim lem, ve uyondyood padi, ve ughamgham mulin di pa pataŋani todi.
Tovenen matam iŋgal ghei.
Ve matam iŋgal inam to nepooŋ to ineep izi lolooz Zion ne paam. Igham 15:16; 1Kor 6:20
3 Taum unum ve ulaagh ila ndug lolo ve ughita. Isami wa! Irau poia muul maau.
Koiamai tireu mbirisan rumai tiom patabuaŋ, ve tiwaghamun mbeb tisob to tineep ila lolo.
4 Ndug to muuŋ itiŋa taluplup ghiit ilooŋ ila, koiamŋa tilooŋ tila, ve tighami inim ledi, ve tilool toman aliŋadi tiina.
Ve tipayoon pilak todi iza tonowe, leso ipatooŋ di ighaze tilib payei wa.
5-6 Yes tiwaghamun Rumai Tiina tinimale yes to tigham nakavas todi ve tila su pa tiŋgor ai.
Ai popoiadi naol to tisap mbeb anunudi ila pa tipabood rumai tiom, tigham nakavas ve tipalpaal di,
ve tirabrab balagin di pa hama todi tintina.
7 Ve titun rumai tiom patabuaŋ, le yab ighan suvuni.
Tovenen taum inam to nepooŋ to izam inepneep ila, tiwaghamuni inimale mbeb sorok, le isami kat.
8 Yes tighaze titatan ghei ve tiwaghamun ghei kat.
Tovenen ndug tisob to taan tiei to tamtoghon tiluplup di ila, ve tisuŋsuŋ payom, yes titun di le tisob.
9 Aazne, yei nighita mbeb eta to ipatooŋ ghei ighaze yom unepneep toman ghei ne maau.
Ve propet eta ineep muul pa ipaghazoŋan ghei pa ŋgar tiom ne maau.
Ve tiei eta iwatag maau: Pale ŋeez o, pataŋani tonene isob?
10 Maaron, aazne koiamai tiŋiŋiŋ payom, ve tiveveleg izam.
Vena, pale upul di tigham tovene itaghoni taghoni gha ila?
11 Pughu vena to nimam ila murim, ve umbabatut ghei moghon?
Irau uul ghei maau?
12 Maaron, muuŋ ve inim, yom kinik tiei ve Volaaŋa tiei.
Ve yom ughamgham uraat tintina izi taan pa uul ghei.
13 Muuŋ, taum tapirim to uvalag te, le pida ila pa ŋas, ve pida ila pa waan.
Ve mbeb samsamia pida to tinepneep ila te lolo, yom urab balagin dabadi.
14 Leviatan paam, mbeb samia tiina to inepneep ila te lolo, yom urab balagin daba to naol ne,
ve ugham anoŋa, ve upan mbeb sagsagŋa to tineep ndug balim ne pani. * Yes Kanaana tighur ila tighaze mbeb samia tiina eez ineep ila te, iza Leviatan. Ye daba katindi, ve nagho inimale moot ma poghai, ma venen. Saveeŋ waaro pida, saveeŋ Leviatan iza to kinik to Isip. Tovenen ndiran ŋgara pida tighaze saveeŋ waaro tonene, nene saveeŋ palelaaŋ to iŋarua sawa to yes Israela timbut Te Kaviaaŋa, ve Maaron irab yes Isipa timatmaat. Igham 14:21; Mbo 89:9+
15 Ndug pida, yom ugham ya ivotvot pa taan ve ireer.
Ve ya tintina to ndug pida to tirereer irau sawa isob, yom ugham di timakmaak. Igham 17:6; Mbo 107:33+
16 Yom to ughur mboŋ ve ndag, ve uŋgin di.
Ve yom ughur ndag ve kaiyo tineep ila inadi. Mbnp 1:14
17 Yom ughur taan seŋgaŋa,
ve ughur sawa to ndug tuntunu, ve sawa to ndug yauŋa. Mbnp 8:22; Mbaŋ 17:26
18 Yoova, matam iŋgal saveeŋ velegiiŋ to koiamŋa tipiyaava payom.
Aazne, yes kankanooŋa to tiwatag ghom maau ne, tiwaghamun izam, ve tighita ghom unumale mbeb sorok.
19 Koiamai ŋgar todi inimale mbeb sagsag. Lolodi isamin tamtoghon eta maau.
Ve yei tamtoghon tiom tapirimai irau mbeb eta maau.
Tovenen upul ghei nila nimadi malep.
Lolom imaagh payei malep. Pasa, yes titatan ghei le nineep sami kat.
20 Muuŋ, yom umbua saveeŋ toman ghei ughaze yom pale unum Maaron tiei, ve yei ninim tamtoghon tiom. Matam iŋgal saveeŋ mbuaaŋ tiom tonenen, ve uul ghei.
Ughita. Aazne, taan tiei ivon pa ndiran samsamia to tiyoŋyooŋ ila ndoroom lolo, ve tisasaŋan pa tigham malmal pa tamtoghon.
21 Upul ndiran samsamia titatan tamtoghon, ve tipamayaŋin di malep.
Uul yes mbolaaŋa ve yes to tineep sami, leso tipait izam.
22-23 Maaron, yei tamtoghon tiom. Umundig ve uyoon payei lak!
Koiamŋa tipakur di toman aliŋadi tiina.
Ndag to naol ne, mboŋmaagh ila le rabrab izi, yes kankanooŋa to tiwatag ghom maau ne, tighamgham oroor tiina, ve tiveveleg ghom.
Lolom imaagh malep. Matam iŋgal ŋgar to tighamghami ne, ve ughur atia padi.
*74:14: Yes Kanaana tighur ila tighaze mbeb samia tiina eez ineep ila te, iza Leviatan. Ye daba katindi, ve nagho inimale moot ma poghai, ma venen. Saveeŋ waaro pida, saveeŋ Leviatan iza to kinik to Isip. Tovenen ndiran ŋgara pida tighaze saveeŋ waaro tonene, nene saveeŋ palelaaŋ to iŋarua sawa to yes Israela timbut Te Kaviaaŋa, ve Maaron irab yes Isipa timatmaat.