Maaron Saveeŋ Tooni Patabuyaaŋ Lukas 1

Vaaru Poia tau Lukas Iboode

Luk—Luke

Paesiiŋ to Lukas

1-2 O tiina tsiau Teopilus, Maaron igham uraat tiina ivot ila iit sosoon itaghon saveeŋ mbuaaŋ tooni. Saawe tau uraat tawe ivot imin maata ve ilam na, zeran siriv tilepleep, ve tighita pa matazi. Tauta tipariaaŋ uraat tana saveeŋa ve tigham uratoini. Zeran tawe tisinai poi payei pa uraat tana. Leso niwataghi paam. Ve tamtamon katini titoova to tibood duduŋai sinaiŋ tana ila rau. *

3-4 Yau tauvene paam. Saawe malau rig, nazuari ghau leso nawatagh katin uraat naol tana ila ta puughu ve ilam. Ve nabood sinaiŋ tana ila rau itaghon duduŋai gabua tau ivot na. Tauta aazne nayambaara ilat payo. Leso yo uwatagh ughe saveeŋ tau tipaduduuŋ ghom pani na, ene onoon mon. *

Aŋela ivot to Sakaria

5 Saawe tau kinik Erod iŋgin taan sirivu to Yudea, ŋeer ee to watooŋrau ilepleep, eeza Sakaria. I ileep ila ŋgun to Abia pa uraat to watooŋrau. Azaawa eeza Elisabet. I paam siŋ to Aron. 6 Yesuru tamtamon duduŋazi. Lezi sosor eta ila Maaron maata mako. Saawe isov, matazi kisin tutuuŋ to Ŋeer Tiina tomania tutuuŋ ŋgara, ve titaghon duduŋaini. 7 Eemon yesuru lezi natuzi eta mako. Pasaa, Elisabet, i uupa. Ve yesuru timin zolmana wa.

8-9 Saawe ee, Sakaria tomania zeetŋa siriv tau tileep ila ŋgun to Abia na, anazi tila tigham uraat ila Maaron naagho ila Rumei Tiina loolo. Zeran to watooŋrau, gabuazi tauvene: Saawe toozi to uraat ighe ivot, mako tipayooz mbuur. Leso itotoi sei tau pale ila itun naunauŋ tau vaazi poia na ila Maaron naagho. Saawe tana, tipayooz mbuur le Sakaria eeza ivot. 10 Tauvene saawe to tunuuŋ naunauŋ, i ileep ila Rumei Tiina loolo, ve igham uraat tana, ve eval tiina tileep muuri ve tisuŋsuŋ.

11 Sakaria ighamgham uraat, ve malau mako ve aŋela ee to Ŋeer Tiina ivot tooni, ve iyooz ila artaal ziige tau ila pa niima tapir. 12 Sakaria ighita aŋela tawe le irur ve roiŋ tiina ighamu.

13 Eemon aŋela isaav pani ighe: “Sakaria, uroi sov. Suŋuuŋ tsio, Maaron ilooŋa wa. Azuwam Elisabet pale aapo ve ipoop tamoot. Ve yo aat uwaat eeza Yoan. 14 I pale igham ghom tintinim ve lolom poia kat. Ve yo mon mako. Saawe tau tiina ipoopa, eval tiina pale tintinizi ve lolozi poia pani paam. 15 Pasaa, i pale eeza tiina ila Maaron maata. I irau ighun vaen ma yaa ariaaŋa mako. Ve saawe tau i ilepleep ila tiina aapo loolo ve ila, Avuvu Patabuyaaŋ pale izeeva. *

16 I pale igham tamtamon katini to Israel titoor ŋgar toozi imuul ila pa Tiina toozi Maaron. 17 Ŋgar tooni ve tapiri pale imin propet Ilia. Ve i pale imuuŋ pa Ŋeer Tiina, ve igharaat eez pani. Pale itoor zolmana ŋgar toozi imuul ila pa natuzŋa, leso tilup lolozi imin eemon. Ve igham yes zeran to taliiŋzizi titoor ŋgar toozi, ve titaghon ŋgar poia imin tamtamon duduŋazi. Leso igham tamtamon tigharaat tauzi ve tisaŋan saawe tau Ŋeer Tiina igham mulin zi.” *

18 Sakaria ilooŋ saveeŋ tane, ve ighason aŋela ighe: “Saa gabua pale imin ilaal payau leso nawatagh naghe saveeŋ tsio pale ighur anooŋa? Ughita, yau namin kooŋ ve azuwag imin olman tinazi wa.” *

19 Aŋela iyol aliiŋa ighe: “Yau Gabriel. Monmon nayozyooz ila Maaron naagho. I tauu imbaaŋ ghau nalam to nasavia gabua poia tane vaaru payo. *

20 Ve ulooŋ. Saveeŋ tsiau tane pale ighur anooŋa ivot itaghon saawe tau Maaron ighuru na. Eemon yo ughur ila mako. Tauvene avom pale ivool, ve irau usaav mako, lee saveeŋ tane ighur anooŋa.”

21 Sakaria ileep malau ila Rumei Tiina loolo. Tauvene eval tiina tau tileep muuri na tisaŋani le mako, ve tigham ŋgar naol pani. 22 Saawe tau ivot ilam toozi, i irau isavia saveeŋ eta pazi mako. Itotoi pa niima mon. Pasaa, aavo ivool. Tauta tighilaal tighe gabua eta aat ivot pani ila rumei loolo.

23 Sakaria ilepleep le saawe tooni to uraat isov, ve imuul ila pa nugh tooni. 24 Murei ra, azaawa Elisabet aapo. I ileep ila ruum loolo irau kaiyo liim imin ŋgozaaŋ tauu. 25 Ve maata iŋgal ighe: “Ŋeer Tiina ighita pataŋani tsiau, tauta loolo isaghatin ghau ve iuul ghau le aazne igham mayag ipit ila tamtamon matazi.” *

Aŋela ivot to Maria ve ipaes pani ighe i pale ipoop Yesu

26 Elisabet kaiyo tooni irau liim ve ee, ragha Maaron imbaaŋ aŋela Gabriel ila nugh Nasaret tau igheen taan sirivu to Galilaia. 27 Gabriel ila ivot to livaa mbiu ee, eeza Maria. I, tisiigho pa ŋeer ee wa, eeza Yosep. Yosep puughu tooni ivot ila to kinik David. *

28 Gabriel ila ivot to Maria, ve isaav pani ighe: “Maria, aaz poia! Ŋeer Tiina loolo payo, ve ipakur ghom, ve ileep tomani ghom.”

29 Maria ilooŋ saveeŋ tane le irur ve igham ŋgar naol ighe saveeŋ poia tau aŋela isavia pani na, puughu mindai?

30 Tauvene aŋela isaav pani muul ighe: “Maria, uroi sov. Pa Maaron loolo payo ve igham poghani ghom. 31 Ulooŋ. Yo pale apom, ve upoop tamoot. Natum tana, yo aat uwaat eeza Yesu. *

32 I pale eeza tiina kat, ve tiwaato tighe Maaron Tiina Tau Iliiv Zimaronŋa Tisov na Naatu. Tiina toit Maaron pale ighuru to igham pooz imin tiimbu David. *

33 Ve pooz tooni irau isov ne mako. I pale iŋgin Yakop paaghu tooni taghon taghon gha ila.” *

34 Aŋela isavsaav le isov, ra Maria ighasoni ighe: “Saveeŋ tsio tane pale anooŋa ivot mindai? Pasaa, yau livaa mbiu. Yeiru ŋeer eta nilup ghei soone.”

35 Aŋela iyol aliiŋa ighe: “Avuvu Patabuyaaŋ tomania Maaron Tiina Tau Iliiv Zimaronŋa Tisov na tapiri pale izaa tsio. Tauvene marani tau yo upoopa na, i pale patabuyaaŋ, ve tiwaato tighe ‘Maaron Naatu.’ *

36 Ve ulooŋ. Waghamliva Elisabet tau imin olman tinazi ve muuŋ tiwatwaato tighe uupa na, i paam aapo, ve kaiyo tooni liim ve ee wa. 37 Pasaa, Maaron, gabua eta irau ikeeka mako.” *

38 Tauvene Maria isaav pani muul ighe: “Poia. Yau besooŋa livaa to Ŋeer Tiina. I irau igham gabua ivot payau itaghon aliŋam.” Maria isavia saveeŋ tane le isov, ra aŋela ipuli, ve ila.

Maria ila ighita Elisabet

39 Saawe tana, Maria iburig ve ilaagh rekia mon ila ivot Sakaria gha Elisabet nugh toozi. Nugh tawe igheen ila taan sirivu to Yudea izala loloz. 40 Ila peria, ve malmali iloŋ ila ruum to Sakaria, ve igham ‘aaz poia’ pa Elisabet.

41-42 Elisabet ilooŋ Maria aliiŋa, ve naatu ipuul ve iyaat ila aapo loolo. Ra Avuvu Patabuyaaŋ ipavon Elisabet, ve ipaburigini gha isaav aliiŋa tiina ighe: “Maria, Maaron ipakur ghom ve ighur poia tooni tiina izaa tsio le uliiv zilivaa tisov. Ve natum tau apom pani na, Maaron pale ipakuru ve ighur poia tooni izaa tooni. *

43 Yau sei, ta Maaron tsiau tiina ilam igig ghau? 44 Saawe duduuŋ tau nalooŋ ugham ‘aaz poia’ payau, natug tau ileep ila apog loolo ne, ipuul toman tintini. 45 Poia to Ŋeer Tiina aat izaa tsio. Pasaa, yo ughur ila ughe saveeŋ tau i isavia payo na, ene pale anooŋa ivot.”

Mbouŋ to Maria

(1Sam 2:1-10)

46-47 Ra Maria ipait Maaron eeza tauvene:

“Yau napait Ŋeer Tiina toman lolog. Pasaa, i eeza tiina kat.

Maaron i Uleeŋa tsiau tau igham mulin ghau. Tauvene lolog poia kat pani. *

48 Yau besooŋa livaa tooni sorok. Leg ezag mako.

Eemon i maata iŋgalŋgal ghau ve igham poghani ghau.

Tauvene aazne ve ila, tamtamon pale tisavia poia to Maaron tau izaa tsiau ne. *

49 Pasaa, Maaron saksaki igham uraat tintiina payau.

I eeza patabuyaaŋ. *

50 Tamtamon tau tiroi pani ve titaghon ŋgar tooni na, i loolo isaghatin zi, ve iuluul zi. Ighamgham tauvene pa tamtamon to aazne, ve taghon taghon gha ila. *

51 Maaron niima ighamgham uraat tintiina, leso itotoi tapiri ivot ighazooŋ.

Tamtamon tau tipapait tauzi ezazi tighe yes tirao na, i ireu zi tighawaar. *

52 Ve yes daaba tau tapirizi tiina na, i izirziir zi pa niazi to ghamuuŋ pooz, ve itatan zi tizi timin kaut sorok.

Eemon tamtamon tau lezi ezazi mako na, i ipakur zi. *

53 Ve yes tau pitool zi na, i igham gabua popoia pazi, ve tighan le isooŋ zi.

Eemon kuaz tauŋa, i iziir zi tighau tila toman nimazi ŋginaaŋa mon. *

54-55 Muuŋ, i imbu saveeŋ tomania timbuunŋa tauvene: I pale loolo isaghatin Abaram ve paaghu tooni, ve iuul zi taghon taghon gha ila.

Tauta aazne, maata iŋgal besooŋa tooni Israel, ve iuul zi.” *

56 Maria ileep tomania Elisabet irau kaiyo tol ma vene, ra iburig imuul ila pa nugh tooni.

Elisabet ipoop Yoan

57 Elisabet saawe tooni to popaaŋ ivot, ve ipoop tamoot. 58 Ziiri waaro tooni tomania zeetŋa siriv tau ruum toozi igharau na, tilooŋ Elisabet vaaru tighe Ŋeer Tiina loolo isaghatini ve igham uleeŋ tiina pani. Tauta yesŋa Elisabet lolozi poia.

59 Tileep le mboŋ imin liim ve tol, ra zetazŋa tilam pa uraat to ravuuŋ marani tana waaro. Ve tighe tiwaat taama Sakaria eeza pani. *

60 Eemon tiina isaav pazi ighe: “Mako! Tawaat eeza Yoan.”

61 Yes tiyol aliiŋa tighe: “Ene poia. Eemon ziiri waaro tsio eta eeza tauvene mako.” 62 Tauta titotoi pa taama tighe tighita pale iwaat eeza sei?

63 Sakaria itotoi pazi gha tigham taper ilam, ve ibood saveeŋ tauvene: “I eeza Yoan.” Yes tau tileep tomani zi na, tighita gabua tana le tisov tirur. 64 Rekia mon Sakaria aavo pakia, yaama ibees, ve ipait Maaron eeza pa poia tooni.

65 Tauvene roiŋ tiina igham tamtamon tisov tau tileep tigharau zi na. Ve tisavia gabua isov tana vaaru irau taan sirivu to Yudea loloza. 66 Tamtamon tisov tau tilooŋ gabua tana vaaru, tigham ŋgar naol, ve tivasavo zi tighe: “Wai, marani tawe, murei pale igham saa?” Pasaa, tighilaal tighe i ileep ila Ŋeer Tiina niima wa.

Mbouŋ to Sakaria

67 Ra Avuvu Patabuyaaŋ izeev Yoan taama Sakaria, ve i ivotia Maaron aliiŋa imin propet ighe:

68 “Iit tapait Maaron pa poia tooni! I Tiina to iit Israela.

Pasaa, i ilam to iuul tamtamon tooni, leso igham mulin zi pa pataŋani toozi. *

69-70 I ighur leen Uleeŋa ariaaŋa ee. Leso igham mulin ghiit pa pataŋani toit, itaghon saveeŋ tau muuŋ i ivotia ila yes propet tooni patabuyaaŋa avozi.

Uleeŋa tawe ivot ila siŋ to besooŋa tooni David. *

71 I pale igham mulin ghiit ila koiaanŋa nimazi.

Leso taleep ila yes tau tighur koi pait na sambazi muul sov.

72-73 Muuŋ, Maaron imbu saveeŋ tomania timbuun Abaram, ve ipariaaŋa le iyaryaaŋ kat. Ighe:

Yesuru pale tivalupu zi timin eemon. Ve i pale loolo isaghatin Abaram tomania paaghu tooni, ve iuul zi pa pataŋani toozi taghon taghon gha ila.

Tauta maata iŋgal saveeŋ mbuaaŋ tooni patabuyaaŋ tawe, *

74 ve igham mulin ghiit ila koiaanŋa nimazi.

Leso taroi muul sov, ve tabees pani toman loloon poia, *

75 ve tataghon ŋgar tau patabuyaaŋ ve iduduuŋ mon ila i maata, le irau saawe toit to taan isov.” *

76 Ra Sakaria isaav pa naatu ighe:

“Natug, yo pale tiwaat ghom tighe propet to Maaron Tiina Tau Iliiv Zimaronŋa Tisov.

Pasaa, yo pale umuuŋ pa Ŋeer Tiina, ve ugharaat eez pani. *

77 Yo pale upaghazoŋai Maaron tamtamon tooni, leso tiwatagh eez tau i pale igham mulin zi ve ireu sosor toozi. *

78 Pasaa, Maaron toit, i loolo igheen toit ve loolo isaghatin ghiit kat.

Tauvene ghazooŋa to sambam pale izilam pait imin aaz isinaar izaa pa mboŋoozo.

79 Yes tau ndoroom ikau zi ve tileep ila mateegh yavyaava na, ghazooŋa tawe pale isul zi ve ipaghazoŋai zi.

Leso tataghon duduŋai eez to Maaron, ve taleep poia ila tooni.” *

80 Yoan itum imin olman, ve Maaron Avuvu tapiri igheen tooni ve ipaloti. I ila ileep izi nugh ŋginaaŋa le irau saawe tau ipaburigin uraat tooni ila yes Israela matazi. *