14
Avuavuꞌnanka-koo Tee Kumponing Bakaang Kara-siraꞌkoong Aaꞌnaꞌ Piaroriai
1 Tee tee enang piaanavung toꞌbii-antarariritaaꞌ teing avuavuꞌ Tanuaang-etaning kong-koo paararariaing, teing-koo deto basining aaꞌnaꞌ piarorima, baruꞌnooꞌ tee tarampee-koong. 2 Baa naning tee Kumponinge kara tasiꞌpaaꞌ meneng-koo sipui avumaung deekoꞌ tee, karoaing Kumponing-koo teie, teka nantoong-koo deeaꞌ, aiꞌ nantoonge tasiꞌpaavarupeuꞌ tee teeꞌ oovunara menenge karoko tanuaang-eta minkuvuma teing kapooꞌ bakuꞌnisining. 3 Teka tee naning tarampeearamaung tee, teie kara siraꞌpumaung nantoong iriꞌantavurima, tampara aarumo siong-koo arooꞌantavuri domang kuaaꞌantavurima. 4 Tee naning oovunara menenge karomaung tee baka puring-antavaramaung, teka tee naning tarampeearamaung teie tee puring-antavurimaung teing niiꞌning nariꞌ dootuuꞌarimaing. 5 Piamoi otong ning diiꞌ oovunara menenge kara-koo, teka baruꞌnooꞌ aaꞌnaꞌ piamoi otong diiꞌ tarampeerarima kara siraꞌkoo, aiꞌ tee naning Kumponing bakaang kara siraꞌpumaung tee deto basi tee-koo naning-koo oovunara menenge karomaung-koo. Aꞌnooꞌ naning kara-bereꞌ otoko deekoꞌ makosi teie pakuvuripeuꞌ teing niiꞌning nariꞌ dootuuꞌarimaing puring-anta-koo. 6 Diiꞌ mmaikoriꞌ ee, ning diiꞌanko mora oovunara menenge karompeuꞌ eeꞌnoko tokoonaꞌ kapooꞌ makensiꞌnung Kumponing-etaing oo-antamupeuꞌning naurampiaꞌ deekoꞌ, kapooꞌ bakuꞌnisi-koong noruꞌ amupeuꞌnung siraꞌderompiaꞌ deekoꞌ, napoꞌ karantamuko tarampeemarama puring-antarampiaruko deekoꞌ, eeꞌnoko kapooꞌkoo nau-antarampiaꞌ deekoꞌ, arekeeꞌ diiꞌ ninge pakurampipeuꞌ? 7 Tee-pinaꞌ kapooꞌ booꞌnanka otoromaung, aaꞌning kovi, tankovaniꞌ. Tenang niiꞌnaꞌ karoko arekeeꞌ kena-koong aurong tasiꞌpampipeuꞌ? 8 Eeꞌnoko piatooronuka˜ biikaang tuuviri niiꞌnaꞌ puumpupeuꞌ, arekeeꞌ teinge piatooronukai noruꞌaapeuꞌ tavuꞌkoo bokuvurimatomaung deekoꞌ? 9 Teeꞌ nariꞌ daka tampaꞌ sirakaꞌantavearuko karema dakaang menenge arekeeꞌ tasiꞌpaapeuꞌ? Daꞌ aaꞌ tamung doona-koo karemang. 10 Otorong karananka amutemuriiꞌ ootukunung kansiꞌkoo, eeꞌnoko kareaamainge kante tasiꞌpai otorong noruꞌamaang. 11 Teka ninge naninung kara tasiꞌpamparui dei tee naning ning karamumaatomaung damisimai ning-koo, eeꞌnoko ning damisimaie tee-koo, eeꞌnoko teeꞌ pakumeerearupeuꞌ. 12 Diiꞌ teeꞌ nariꞌke. Diiꞌ aaꞌnaꞌ piarorimaung nka-koo teing avuavuꞌnanka Tanuaang Meekunge amurimaing. Makosi, purintariaing nka-koo temuriiꞌ dootuuꞌnupoong naroꞌka puring-anta-koong.
Dootuuꞌkoo Oovunara Menenge Kareaamaing Napoꞌ Kara Bereꞌnaꞌ Besiꞌaavaing
13 Teeꞌkoo tee naning avuavuꞌ oovunara menenge kara-koong otoꞌevuing eentavaravaing napoꞌ tee kara bereꞌkoong iriꞌ nka-koo. 14 Ning oovunara menenge kunsimarama nkaang tanuaang narung kunsiaramaung, teka ninge noruꞌampaꞌ tee kapooꞌ minkuamaung. 15 Enang arekeeꞌ nkomaravaing? Tee aaꞌ kunsimaravaing nkaang tanuaang narung ninka, napoꞌ kunsimaravaing nkaang onou ninka. Eeꞌnoko kenamaravaing nkaang tanuaang narung ninka, eeꞌnoko napoꞌ kenamaravaing nkaang onou ninka. 16 Tenang dake Kumponing biraankeveko tanuaang narung ninka oovunara menenge, arekeeꞌ naning daꞌ ninka nariꞌ tamung otomaunge masikee-antarui “Masikung” tampupeuꞌ? 17 Bane dakaang eenta Kumponing-koo makosinaꞌ tampeinge, tee niiꞌnung naning paku-antaveaꞌ otong. 18 Ninge tampara tampamang Kumponing-koo, oovunara menenge karomaung-koo mmauꞌnamuꞌpie, diiꞌ divuꞌdampiri. 19 Teka dootuuꞌnupoong naroꞌarimanooꞌke namooraꞌnooꞌ sirapoꞌke kara-koo piamomaung, baruꞌ oovunara menenge karoma doong oꞌanta-koo piamoaung.
20 Mmaikoriꞌ ee, bakerariaing toireꞌ biikanaꞌ noruꞌkoo. Aꞌnooꞌ, orara matau-koo toireꞌpinaꞌ amakorariri otoriaing, teka petaaꞌdoriaing diikaang noruꞌkoo. Aaꞌperiaukaꞌ, “Oovunara menenge kara tee taaꞌniꞌanta pankaing Kumponing niiꞌanko otomaung-koong.” 21 Aiꞌ Kumponinge naunaua-antavuriiꞌnaang mauꞌurima Isireeli-nupoong-koo aaꞌpuuꞌ,
“Akoing-koo karoma karavarampaing nkaning, akoing biikaang karai. Teka bane teeꞌ nkoanko taaramaavaukaꞌnung.” (Aisaiaꞌ 23:11-12)
22 Daari Meekunge teeꞌ minkuvuioꞌ niiꞌke noruꞌampiri otong tee oovunung menenge kara tee taaꞌniꞌanta makosi, teing-koo masikaꞌanta otoꞌevoroining-koo deeaꞌ, teka teing-koo masikaꞌanta-koo kontevoromaing, teing koono-anta-koong. Eeꞌnoko teka tee tarampee tee masikaꞌanta-poꞌnupoong biikaang, masikaꞌanta-koo kontevoromaing biikaang deeaꞌ. 23 Aiꞌ dootuuꞌnupoong oosiarira ookara oovunara menenge kareaako tenang nantoong tamung masikaꞌanta otoꞌevoroaing teꞌ poropeuꞌ, porora aaꞌpaapeuꞌ, “Diiꞌ kanuꞌdaririning!” 24 Teka ookarai tarampeerariko naning damisimai, niiꞌnaꞌ naning masikaꞌanta otoꞌevuaung pora taaravuko tee ootukunung taaravupeuꞌning karai tooꞌpupeuꞌ tee, noruꞌ tante-antavuma. 25 Kapooꞌ bakaang makensiꞌnanka sirapoꞌ poꞌantavupeuꞌ eeꞌnoko miinge keemparara Kumponing daangampupeuꞌ aaꞌpuma, “Kumponing masikaꞌ diiꞌanko otong!”
Tampaꞌ Toosimariri Oꞌnori Dootuuꞌ Nko-koo Tampaꞌ
26 Arekeeꞌ, diiꞌ mmaikoriꞌ? Tenang dootuuꞌkoo naroꞌdarima avutevuꞌ nko-koo piaroriaing makosi, niiꞌnung kena ninka, niiꞌnung nau-anta ninka, niiꞌnung Kumponinge siraꞌnaare ninka, niiꞌnung oovunung menenge kara, niiꞌnooꞌ kara-bereꞌ ninka, teka ootukunung nkoverima teing niiꞌning dootuuꞌnupoong puring-antanaꞌ nkoveriaing. 27 Oovunung menenge kara otoko deekoꞌ makosi kenaankara deekoꞌ niiꞌnooꞌ beenaumo-koo basi oovunung menenge kareaapeuꞌ, eeꞌnoko doompeitaaꞌ, eeꞌnoko niiꞌnunge biikaang kara bereꞌevuriko. 28 Teka dootuuꞌkoo naroꞌarimaing-koo naning kara bereꞌumaung otoaruko deekoꞌ, makosi kareaavaukaꞌnung teing nantoong oovunung menenge kara-koo piavoromaing. Tamung biiꞌka kareaavaing Kumponing ninka. 29 Teing-koo nakaro-nupoong˜koo makosi, kenaanka niiꞌnooꞌ beenaumo kareaavaing, eeꞌnoko ookara baroromparirioꞌ. 30 Tenang niiꞌnung karoi otoko niiꞌnung-koo Kumponinge kara-siraꞌ tavoꞌkupeuꞌ naning baꞌnampari otomaung-anko, makosi tee tutunaꞌnung bakearavai. 31 Diiꞌ teing ookara batei otoꞌderuriaing diikaang kara minku-koo Kumponing-etaning tarampeerarima narunaꞌ narunaꞌ, ookara barerarira tampara aarumo siong-koo domang kuaaꞌantareeriaing. 32 Teing nakaro-nupoong biiꞌka bake-anta-koo makosi, niiꞌnooꞌ nempariai niiꞌnung batei-koo. 33 Aiꞌ Kumponing tee toosi-paaꞌkoong deeaꞌ, teka mooa-koong.
Ookara dootuuꞌnupoong osi kante-koo nkoarimanaꞌ teeꞌ nariꞌ nkorariiꞌnaang naurampimang. 34 Manikuꞌ teie, dooroomparimatoai dootuuꞌkoo naroꞌdarima. Teing kara-koo tauraꞌpariaꞌ. Teing tamung doonko otoroaing teeꞌ Moosesi-nung botoi minkuvui otoinaꞌ. 35 Kapooꞌ noruꞌkoo piavorora deekoꞌ biumatakaampi tanaꞌaariaing osia, aiꞌ manikuꞌkoo tee maimaiaꞌ dootuuꞌkoo meuꞌke kara-koo. 36 Arekeeꞌ? Diiꞌ ee okoraꞌnuka tee Kumponing bakaang kara? Aiꞌ diiꞌ nainge nkaveruꞌnunge tee Kumponing bakaang kara, niiꞌninge deeaꞌ ee? 37 Niiꞌnung naning eeꞌ noruꞌari dei, “Bakei nakaronara ning,” niiꞌnooꞌ, “Tanuaang-etaning avuavuꞌ otoꞌmemuing,” noruꞌuaing teie tee kapooꞌ ninge daarirerompimatomaung diiꞌanko tee eeꞌnara boto Ovoring-etaing. 38 Baa naning tee taraꞌoaꞌ taaravuaing tee napoꞌ naninge taaravuaukaꞌnunge. 39 Teeꞌkoo, mmaikoriꞌ, biaꞌdoriaing tarampeerari minku-koo, teka oovunung menenge kara poteveriaukaꞌ. 40 Teka oosirarimanooꞌke ookara kapooꞌ makosinaꞌ nkoveriaing narung mono-koo-nupoong pakureeritaaꞌ.