1 Teing ookara botovotonaaꞌnuka daiꞌnisinankai biikaning teing okovoroi otomaing tampaꞌ nariꞌ noruꞌaariai. Teeꞌ naueriaing niiꞌninge Kumponing orakaꞌ minkuaaꞌneeng bakaang kara nau-antavarampimaung ninka. 2 Teinge botovotonaaꞌnukai okovoromaing Karistooꞌ masikaꞌantavaamaing deekoꞌ eeꞌ noruꞌaavaukaꞌ: “Niiꞌke kara dimpaꞌevorompimatoai, aiꞌ niiꞌ tamung naroꞌka namaiaꞌ.” Teeꞌ noruꞌaavaukaꞌ, teka teing mintoompevurimaing Karistooꞌ masikaꞌantavaamaing, Kumponinge piaavurimaing deempariko bakei tampaꞌ masikaꞌ biikaang kara siompaavaing. Aing eeꞌ oroꞌ nau-antaveriaing iriꞌnarumperi.

3 Niiꞌnung naninge niiꞌnamuau kara nauvuriaing deekoꞌ, eeꞌnoko naroomparavaung tee ninka kara masikung niikaang Ovoring Jiisuuꞌ Karistooꞌketaing deekoꞌ eeꞌnoko naroomparavaung Kumponing sionaꞌ aarumo-koong nau-anta ninka deekoꞌ tee baka daangange poo-antavaramaung, kapooꞌ noruꞌuaung, tamung tataꞌ tutung-koo orakaꞌ piavomaung eeꞌnoko minkuminku tamung karananka-koo; 4 Temuriiꞌ aarumoi mamairo tavoꞌumaung, pokaka, daang-koong tuumpi, orakaꞌ noruꞌ eeꞌnoko okoꞌoko nantoong-koo. 5 Teing taaravarimaing teeꞌ nkoarimaung. Aming-koo, nnaꞌ tunsi muunanka deempariri niiꞌninge kara masikung nau-antavaariaruko. Daang eeꞌ noruꞌaamaung, “Dootuuꞌmariaing kapooꞌnanka mooniꞌ dovang narung nkavampiainaꞌ.”

6 Nka masikaꞌ aꞌnooꞌ naning kapooꞌ avutevuꞌ piavoaruko dei Kumponing-nung koontoꞌ aarumo kompui tampara otootoꞌ oovupeuꞌ. 7 Nka eeꞌ noruꞌampiai: “Niiꞌ aaꞌ pontoꞌmarima kapooꞌ kansiꞌkoo nkavampiri moriaꞌ, eeꞌnoko moompima kapooꞌ niiꞌnung nkavampiring meriaukaꞌ kansiꞌketa. 8 Teeꞌkoo enang taamang otoꞌmemuri eeꞌnoko baaronanka, teing ninka dotumariri oꞌnoriaing.” 9 Teka teing nantoong kavo mmauꞌ otoꞌevorooꞌnaang piavoromaing paara-anta meuꞌpaako baankaꞌke taaviꞌurimaung. Kanuꞌarima amutemuriiꞌ baike-antananka piavoromaung nantoong orari-anta-koo eeꞌnoko keraꞌanta-koo basi-antavaarimaing. 10 Aiꞌ orara aarumo amutemuriiꞌkoong okoraꞌ tee mooniꞌ karaaꞌ. Mooniꞌ karaaꞌaama niiꞌning nantoong tee kara masikaꞌantavampimaung-eta kentaamparira domang-koo baike aaꞌnaꞌ toraꞌpaamaung.

11 Nka daꞌ tee Kumponing bakaang naning avoꞌdaravaing tevete-ita; koong-antararavaing koontoꞌaape, Kumponing-nung masikung aarumo-aape, masikaꞌanta-aape, piaa-aape, eꞌmaniang-aape, dooroontoꞌaape. 12 Daꞌ bakei ivekaꞌdoai Kumponing-aape masikaꞌanta ninka deikooꞌkoo kuaꞌdaramatomaung-pinaꞌ tee domaang oparavaukaꞌnung nkaveainaꞌ, eeꞌnara domaang kompeeꞌnaang miruꞌduuꞌnung Kumponinge, eeꞌnaꞌ tampaꞌ siraꞌdaruꞌnaꞌ nantoonge taararaioꞌ. 13 Ninge eeꞌ botoramaang Kumponinge oomuresioꞌ, teie eeꞌnarai Domaang Okovenunge, eeꞌnoko Jiisuuꞌ Karistooꞌke napoꞌ oomuresioꞌ aaꞌnunge Poontiasi Pailatiꞌankoi avoroaꞌ tampaꞌ siraꞌparuꞌ bakaang miruꞌ: 14 Nkoveaing ookara kapooꞌ Kumponinge nauruuꞌning dake nko-koo botoramaang, domang kuꞌmiꞌdoaꞌ. Naninge daꞌ tuumpiruarupeuꞌnaꞌ otoaing Ovoring Jiisuuꞌ Karistooꞌ tavoꞌaravainooꞌke basi. 15 Tee eeꞌnara siraꞌparavaing bakaang batei masikung-koo, Kumponinge tampuainooꞌka. Tee biraankenung, ookara-koo iirakuta, ankaankanuka biikaang ankaankang, ovontunanka-koo Ovoring. 16 Tee narung booꞌpaaꞌ otootoꞌ okovosiꞌ, aaꞌnaꞌ araka sisisiisiꞌpoꞌnung ninka nariꞌ otomaung, teroita naning otoaꞌ oovuuꞌnung aiꞌ oovupeuꞌnung. Eeꞌnara ookarai domange tampaꞌ noruꞌaamatoai eeꞌnoko bakaang tare oparavaukaꞌnung otomatoai. Eeꞌ, teeꞌ nariꞌ.

17 Enang tee kansiꞌkoo kavokavoro-poꞌnupoong tee eeꞌ botoveriaing: Biiꞌka daangampariaukaꞌ. Masikaꞌantavariaukaꞌnung biikaang kapooꞌnanka oraruꞌkuaining-koo, teka Kumponing-koo masikaꞌantavariri otoroaing ookara kapooꞌ mmauꞌantavui makosinaꞌ amurimaung-koo dotumarimanaꞌ. 18 Naueriaing tampara nko-nko nkoaavaing, tampara nko-nko-koo maneeoroaing, avusiroꞌariai, biikaang kapooꞌnanka tankeeꞌeeaing niiꞌning ninka. 19 Teeꞌ nariꞌ nkoarima tee oosisiiaamaung damaꞌke opoꞌ kompaavaining koontoꞌ noruꞌaapeuꞌ. Naueriaing teeꞌ nkoariaing domaang imaꞌai kompaavainaꞌ temuriiꞌ domaang masikung.

20 Timoti ee, tareveai tee kapooꞌ Kumponinge masikaꞌantarui aruuꞌnung tare-koo. Dontaꞌdari otoai naampa Kumponing-nung deeaung-eta, avutevuꞌui minku-eta, daang noruꞌ pankaing tampaamaung-eta. 21 Aiꞌ teeꞌ minkuaama niiꞌninge bekoiꞌaamaung tee minkunaa masikung siompampimaung.

Tee biraanke tee daꞌkoo otomatoaing.

Masikung.