1 Ninge Paulaꞌke aung karavoto˜ daariamang, Jiisuuꞌ Karistooꞌkoong kara-okomui-nkai Kumponinge maromuuꞌnaꞌ nantoong nauaramaꞌnaang maraka-antamuruꞌnaꞌ bakaang domaang amuriiꞌnaang Jiisuuꞌ Karistooꞌkoo kuung oꞌnoriko. 2 Daꞌanko, Timoti-anko daariamang, daꞌ nnuring-pinaꞌ piaaramaung-anko. Biraanke eeꞌnoko mooa daꞌkoo otoaing Kumponing Neuma-itaing eeꞌnoko teieta Ovoring Jiisuuꞌ Karistooꞌ.

3 Ninge kunsimarama amutemuꞌkoo noruꞌdama Kumponing-koo tampara tampamaung, tee eeꞌnara tampaꞌ domange noruꞌmarama ninge mintoompevomaung, teeꞌ mmataraange nkoauꞌnaꞌ. 4 Bakei napoꞌ aaꞌnaꞌ daꞌ oo-koo piamomaung, ooramira dei tampaꞌ deeꞌmopeuꞌ, aiꞌ ninge tee norunoruꞌamaung dakaang taꞌdu tuuruuꞌnung tenang siꞌmeeretuꞌnang. 5 Napoꞌ noruꞌdankooꞌ daꞌ koontoꞌ baitorarakoꞌnaꞌ, tee eeꞌnamuriiꞌ baito teni daite Lois otoꞌevukoꞌ eeꞌnoko teni dauko Iunes. Enang tasiꞌpansi oꞌnong daꞌkoo eeꞌnung-koo otong tee temuriiꞌ baito. 6 Teeꞌkoo enang ninge noruꞌantaramaang maiaꞌ sipei dakaang nko-nko aaꞌnaꞌ nkoveaing tee avuavuꞌ Kumponinge aruuꞌnung kompei, eeꞌnarai aruuꞌnung teꞌmung ninge tankaꞌ panteꞌdantuꞌnaꞌmung. 7 Aiꞌ Kumponinge tee tanuaang avorompeꞌkoong amuriaꞌ, teka tee tanuaang purintoꞌkoong amuruꞌnung, piaa-koong eeꞌnoko toomoosiari otoꞌkoong.

8 Tee tee maiaꞌdoaukaꞌnung niikaang Ovoring siraꞌkoo; ning-koo teeꞌ, bane ning bakaang daiꞌnisi oꞌnoko. Makosi Kumponinge teeꞌ nariꞌ puring-antamureko daꞌ teeꞌ nariꞌ niꞌninka sisikeera kompampeainge tee tampara doorenang-koo. 9 Teie eeꞌnarai domamuruꞌ eeꞌnoko bokumuruꞌ meekaꞌmariri otoꞌkoo, kapooꞌ tampara nkoampiruꞌnung-koo deeaꞌ, teka tamung biraankemuriiꞌnaang baka marovuuꞌnung-koo. Tero aung kansiꞌ mmeꞌ nkoaravaruko-ita Kumponinge biraankemuriiꞌnaang bamuruꞌ tee-koo Jiisuuꞌ Karistooꞌkoo. 10 Eeꞌnoko enang tee biraankemuriainaꞌ siraꞌpuing Jiisuuꞌ Karistooꞌ niikaang domang-anta oroꞌantavura. Teie eeꞌnarai booꞌ bakaang iriꞌ opuraiꞌnange booꞌ puruꞌnavung eeꞌnoko domaang nkanavung taung sirakaꞌantamemuring tee doorenang tampara dooremurima. 11 Eeꞌnoko teie napoꞌ ning aung eeꞌnara doorenang tampara berempamaꞌnaang bamuuꞌ, ning kara-daanki, kara-okomui-nka eeꞌnoko kara-nau deeng-antamui. 12 Teeꞌkoo bamuuꞌnaꞌ tampaꞌ nkomaramaung-koo ninge sisikeera kuneꞌamaang. Nka tee maiaꞌmoaung, aiꞌ bakei tampaꞌ noruꞌansi oꞌnong tee naning ninge masikaꞌantavamaung, eeꞌnoko napoꞌ tampaꞌ noruꞌansi otong tee tee makosi ookaanka tare-koo bera doong asiranaꞌmung, aaꞌning: teing mankiꞌnanka avontuꞌning eeꞌnoko napoꞌ tee mankiꞌ eeꞌnarai ning bamui amuuꞌ, tampara kara nau-anta-koo. 13 Enang dake tee tee kara nau-antavaramanaꞌ paaravei nariꞌ nau-antaveriai, eeꞌnoko Jiisuuꞌ Karistooꞌkoo kuung otomatoai eeꞌnara masikaꞌantavema eeꞌnoko nantoong piaaverima. 14 Tareveaing tee kara masikung tee Tanuaang Meekunge niiꞌkoo otomatomaunge masikaꞌantaruma aruuꞌnung.

15 Dake noruꞌei otong teing teing ookara Eesia-nameensiꞌnupoong ning-eta mmariauꞌning. Teing-koo niiꞌnung Pisilas eeꞌnoko niiꞌnung Emosenis. 16 Kumponinge piaavuriaing Onesiporas bakanava-kooning, teie amutemuꞌpie boira-antamukoꞌ ning. 17 Tee tee maiaꞌoaꞌ ning ioꞌmai daiꞌmarioꞌ, teka tenang Roomaꞌ poraiꞌnange teie bakei aaꞌnaꞌ ning oo-koo piavora besiꞌmura peꞌnumuuꞌ. 18 Ovoringe kong-antavuaing tee piaa bakaang teꞌmung doong asiꞌnaꞌmung. Dake tampaꞌ noruꞌei otong avutevuꞌari tampaꞌ pakumuuꞌnaꞌ Epeses-namono-koo.