1 Aung aaꞌ tee, Jiisuuꞌke nanuma naning oovuuꞌ duta mutuu pontoꞌaruꞌnung. 2 Niiꞌke bakaninge barevare-nupoonge niaꞌampima aaꞌpampiruꞌ, “Nau-anta Pankaing ee, baie orara aarumo nkovuioꞌ aung duta mutuu pontoꞌaruꞌnunge? Baka aiꞌ baumararinge?” 3 Jiisuuꞌke makuꞌmurima aaꞌmuruꞌ, “Bakaang mutuu bakaang aarumo-koong deeaꞌ; baumararing beekaang aarumo-koong deeaꞌ. Tee mutuu otomaung Kumponinge bakaang iriꞌ siraꞌantavuuꞌnaang tee-koo naning-koo. 4 Niiꞌke nauꞌka ning botomuuꞌnung bakaang nko-nko nkoampiaing doong tankinuaruko. Muumuriiꞌnaang. Naning mintoomparavarupeuꞌ muunganang. 5 Ning kansiꞌkoo oꞌnoi ning kansiꞌnupoong araka-antanung.”

6 Teeꞌ minkuvuraiꞌnange Jiisuuꞌ kansiꞌkoo tutupaaꞌkura tutupaaꞌke metoꞌ nkovura duta sisiꞌuuꞌ, eeꞌnoko aaꞌpuuꞌ, 7 “Bera duuꞌdaravaing poonaruꞌkoo Siloam tampampimanaruꞌkoo.” Aung Siloam miruꞌnooꞌ “Boto-nisi”. Eeꞌnoko tee naning nanuraiꞌnange duuꞌparara ookuitaaꞌ toroaruꞌ.

8 Eeꞌnoko baꞌmarange eeꞌnoko teinge tero tee ooaakoꞌninge baꞌnampari mooniꞌ eentavuriko, aaꞌpauꞌ, “Aung ee tee deeaꞌ baꞌnampari mooniꞌ eentamurikoꞌnung?” 9 Narionge aaꞌpauꞌ, “Eeꞌ, tee eeꞌnara.” Niiꞌninge aaꞌpauꞌ, “A, tee deeaꞌ. Tee tee-pinaꞌ oroꞌ.” Eeꞌnoko tee baka aaꞌpuruꞌ, “Ning eeꞌnara.” 10 Aaꞌpauꞌ, “Nka dakaang duta arekeeꞌ banteing?” 11 Teie makuꞌurima aaꞌpuruꞌ, “Teie naninge miring Jiisuuꞌke metoꞌ nkovura nkaang duta-koo siꞌmuing. Siꞌmura naumuma aaꞌmuing, ‘Siloam-aape nanira duuꞌdaravaing.’ Eeꞌnoko nanamira duuꞌmarara namuꞌke ookansing.” 12 Eeꞌnoko teinge niaꞌaama aaꞌpauꞌ, “Areꞌ otong tee eeꞌnara?” Eeꞌnoko teie makuꞌurima aaꞌpuruꞌ, “Noruꞌampaung.”

13 Teeꞌpuriko tee, teinge nkavauꞌ Boto Keperuuꞌnavitu-anko tee naning. 14 Teꞌmung eeꞌnaꞌmung Jiisuuꞌke metoꞌ nkovura naning mutuu oo-antavuuꞌnaꞌmung Doong Uaanaꞌmung. 15 Eeꞌnoko teing Boto Keperuuꞌnukai napoꞌ tee tanaꞌaama aaꞌpauꞌ, “Arekeeꞌ nkorura tamparuꞌantaruinge?” Eeꞌnoko teie nauvurima aaꞌpuruꞌ, “Teie aaꞌ kansiꞌkoong metoꞌ nkovura duta-koo siꞌmuioꞌ oing duuꞌmarara tampaꞌ ookansing.” 16 Eeꞌnoko Boto Keperuuꞌnavitu-koonarioonge aaꞌpauꞌ, “Tee naning temuriiꞌ nkovuinung Kumponing-etaing deeaꞌ, aiꞌ Doong Uaanaꞌmung tampaꞌ tarevuaꞌ teeꞌ nkovuing.” Eeꞌnoko niiꞌnarionge aaꞌpauꞌ, “Arekeeꞌ orara aarumo nkovumaunge temuriiꞌ taaꞌniꞌanta iirakuta nkovupeuꞌ?” Eeꞌnoko teie karai pokapokaꞌantavuruꞌ.

17 Teketa tee Boto Keperuuꞌnukai napoꞌ niaꞌaama aaꞌpauꞌ, “Teie oo-antaruing deentarako niaꞌdampimang: Dake tee areꞌpepeuꞌ?” Teie aaꞌpuruꞌ, “Tee aaꞌ nakaronung.” 18 Nka tee, tee naning enang ookuuꞌnung tero naning mutuu pontoꞌaruꞌnung Juꞌkoong ovontunge masikaꞌantavaavarukoꞌ bera baumararing bokuaaretuꞌ. 19 Eeꞌnoko teinge aaꞌpaaretuꞌ, “Aung ee deeꞌke deuring? Aung ee tee duta mutuu pontoꞌaruꞌnung tamperemaung? Nka arekeeꞌ nkoarara enang ookuing?” 20 Baumararinge makuꞌurema aaꞌpuretuꞌ, “Neeꞌke noruꞌampesi otong tee neuring eeꞌnara duta mutuu pontoꞌaruꞌnung. 21 Eeꞌnoko neeꞌke noruꞌampeaꞌ arekeeꞌ nkoarara enang ookuinge. Eeꞌnoko napoꞌ noruꞌampeaꞌ baie duta oo-antavuinge. Teie baka naururipeuꞌ, tee matarama.” 22 Baumararinge teeꞌ minkuvuretuꞌ tero eeꞌ mauꞌaarioꞌ: Naninge Jiisuuꞌ tee Pakoꞌpariꞌniiꞌ tampuaing deekoꞌ bataꞌaavaing dootuuꞌnava-ita. 23 Teeꞌkoo eeꞌnaꞌkoo teeꞌ baumararinge aaꞌpuretuꞌ, “Niaꞌeriaing, baka naururipeuꞌ, tee matarama.”

24 Eeꞌnoko napoꞌ kemuꞌkanaꞌ bokuaara tee eeꞌnara naning mutuu pontoꞌaruꞌnung aaꞌpauꞌ, “Bameriaing Kumponinge taararuioꞌ kara masikung narung naumeriaing. Niiꞌke noruꞌampiri otong tee naning orara aarumo nkovumaung.”

25 Eeꞌnoko teie naninge makuꞌurima aaꞌpuruꞌ, “Tee orara aarumo nkovumaung aiꞌ tampara, ning noruꞌampaꞌ. Narung kapooꞌ noruꞌansi oꞌnong, ning tero mutuu eeꞌnoko enang ning tampaꞌ ookamaang.”

26 Teinge niaꞌaama aaꞌpauꞌ, “Aming kapooꞌ nkovuinge daꞌkoo? Arekeeꞌ dakaang duta oo-antaruinge?” 27 Teie makuꞌurima aaꞌpuruꞌ, “Tero naurampiko eeꞌnoko diiꞌke ee taarameriaꞌ? Aming-koo napoꞌ taara-koo piarorimang? Aiꞌ diiꞌ bakaning barevare-nupoong deentariiꞌnaang piarorimang?”

28 Teinge barakosiꞌaama aaꞌpauꞌ, “Daꞌ eeꞌnara bakaning-koong. Niiꞌ teing Moosesi bakaning barevare-nupoong. 29 Niiꞌke noruꞌampiri otong Kumponinge Moosesi karavukoꞌnaꞌ, eeꞌnoko aung naning noruꞌampiaꞌ areꞌ pouꞌnooꞌ.”

30 Eeꞌnoko teie naninge makuꞌurima aaꞌpuruꞌ, “Akokamuriiꞌ kara minkuering doma. Diiꞌke noruꞌeriaꞌ areketa pouꞌ, nka eeꞌnarai ning tamparuꞌantamuing duta. 31 Niiꞌke noruꞌampiri otong Kumponinge orara aarumo nkoaamaing taaravuriaung, eeꞌnoko teing nantoong masikaꞌantavaamaing eeꞌnoko marovurimanaꞌ nkoaamaing taaravurimaung. 32 Kansiꞌ pupuꞌaruꞌnooꞌketa minkunaa otoaꞌ naning duta mutuu pontoꞌaruꞌnung oo-antavuuꞌnung-koong. 33 Aung naning Kumponing-eta poarui dei kapooꞌ nkovuarupeuꞌ bakei.”

34 Teinge kara makuꞌaama aaꞌpauꞌ, “Diiꞌdaang orara aarumo-koo kuunge otori orakaꞌ pontoꞌdaruꞌnung daꞌ. Arekeeꞌ niiꞌ tautau-koo piaromaang?” Eeꞌnoko dootuuꞌnava pankava-ita bataꞌauꞌ.

35 Jiisuuꞌke tee taaravura dootuuꞌnava-ita bataꞌaioꞌ besiꞌuuꞌ, eeꞌnoko besiꞌukotaaꞌ oovura aaꞌpuuꞌ, “Dake ee tee Naning-naumpoꞌ Paning-etaing masikaꞌantavemang?” 36 Eeꞌnoko teie aaꞌpuuꞌ, “Ee pankaing, naumeaing masikaꞌantavampainaꞌ.”

37 Jiisuuꞌke aaꞌpuuꞌ, “Tee aaꞌ dake tero ooveing eeꞌnoko tee eeꞌnara naning enang kareremaang.” 38 Teie naninge makuꞌuma aaꞌpuuꞌ, “Ovoring ee, masikaꞌantaransing.” Teeꞌpura kinkinuuꞌ Jiisuuꞌanko, pankaing-antavuma.

39 Jiisuuꞌke aaꞌpuuꞌ, “Ning kansiꞌkoo eeꞌ simpeꞌkoo mouꞌnung: mutuunanka bantang-anta-koo eeꞌnoko teing banteai otoroining tamparimaing kaputuꞌanta-koo.”

40 Teeꞌpuioꞌ enang Boto Keperuuꞌnavitu-koo-narionge Jiisuuꞌ ninka otorokoꞌninge taaravaara niaꞌaama aaꞌpauꞌ, “Dake arekeeꞌ minkuemaang? Niiꞌ mutuunanka ee?” 41 Jiisuuꞌke makuꞌurima aaꞌpuruꞌ, “Diiꞌ mutuu siraꞌrariri tantariko dei tuumpi diiꞌkoo otoarupeuꞌ. Nka eeꞌnoko ‘Niiꞌ ookirining!’ tantariko enang tuumpi diiꞌkoo mmeꞌ otong.”