Sam Kranzpnu-pwx-nrade-pwx (44)
Drtwrgr Esz'tipe Kx Sa Nabzpekr
Nabz ne nqvi lr Kora kx nzyrbzlr mz kxrmailz ngr dzbe kxnzngrng.
Be Ngr Melrmqgung
1 Gct, xlrpekr nrpa ngr da kxetuting kcng tqalebzme mz melrmqgrng mzli kc bqnc,
Mz nzpi-krmlrle bagr mzli kc.
2 Nzayrplapx-krm lr mrkzbleng apule lxbi kc tzbolvzti mz nrlanc nyzm.
X petio-alzuq leplz nemqng mz drtc' nyzdr mz nzamnc-zpwx-krm nidr.
3 Melrmqgr lcng trnzaovxiolru enqmi rdrng mz toki r vea scdr x mz zmatq ngrdr esz'-krdr.
A' leplz nemqng nzaovxiong mz zmatq ngrm, mz nzxplr-krm, x mz nzmnc-krbzme badr mz nzaodu-krm nidr.
4 Gct, nim King rnge.
Nim kx rngi-batrp nzaovxio-krgr, nigr neidu lr Jekop.
5 Milxtxopekr enqmi rgrng mz nzxplr-krm.
X rnzlvzokr kxnzatrkatilr nigr mz zmatq ngr drtqm.
6 Murde trbrtiu drtwrnge popz' x toki r vea scnge
Nzarlapx-krdr ninge mz nzotangr.
7 A' ni-txpwzme kx arlapxle nigr mz enqmi rgrng,
Mz nzamyati-krbzme drtqdr.
8 Sa naglqlz-zvzkr nim.
X nzawi-krbzkr bam tqvzpe tqvzpe.
Enqmi Rgung
9 ?A' memule drtqm tqsatrpe-ngrmle bagr, trokatrpe-ngrnqu ncblo ngr vea negrng?
Mzli ka rlrtx-ngrpwzme mz enqmi rgrng nzamyati-krmlr drtqgr.
10 X ngi-batrpeme nzdwasz-krgr nidr,
X nztwz-krdr dztugrng amrlx.
11 X rlr-ngrbzme badr nznibq-krdr nigr mz nzapu-krgr sip,
X nzvzmilr nigr mz drtc' nyzdrng mz nzwz-nrbalqtr-krbzkr badr.
12 Apule kx amwabzme nigr badr mz narncbr kx topwzne,
Mz nzapusr-krm nigr brmrda.
13 Lr mrkzbleng kcng tzmnc-aepztrpqng bagr nznelvzlr nigr mz nzamyati-krmlr drtqgr,
X nzxtrnga-ngrdr nigr.
14 X neidu mz nrlc tulvzo nzobqszo-ngrdr nigr
Mz nzyrpalelvz-krdr nigr.
15 Aputr-zvzbo da kxtrka mz nzobqkr leplz lcng,
X drtqnge mya zvz.
16 Murde xlrx natq kxtrka kcng tzpimlr bange,
X mcx nzmnc-krm enqmi rngeng.
Vz-nqblq-zvzku Gct
17 Kxmule-esz' nzprtzmqng bagr da lcng
A' trmrbrtru mz drtwrgr nim x Nzesz'tikr Drtwrgu.
18 Kxmule-esz' traxtxpekru nim,
X o-zli-zvzkr nzti rm,
19 A' katrpzme nigr mz mq enqmi rgrng mz nzrnzbrti-krdr nigr, mz nzapu-krdr kuli kzpetong.
X nzaovxiolr nigr x kzdung nigr nzyrtzmqpeng mz gq.
Nzkrka'-krgu
20 Gct rgr, nzmu navecpx-lzbqmgr bam,
Mz nzangio-krgr gct kzble,
21 Tryc-kapqpwzu bam,
Murde obqplxq nabzgr.
22 A' mz nzngini-krgr doa nemqng, vz zvz nznibqti-krdr nigr,
Mz nzapusr-krdr nigr sip kcng tzmnc-nabung mz nzrnibqngr nidr. ✡ Rom 8:36
23 Kxetu rgr, bzkq esablqme. ?Memule tro-lxlvr-ngrpwe'u bagr?
Vz-anim, x bzkq pxtxpx-ngrn nigr.
24 Lxlvrm bagr,
Mz nzdcpxkr mz drtwrm nzetqkr drtqgr x nzkxpu-krgr.
25 Drtwrgr esz'tipe kx sa nabzpekr,
Mz nztangqgxlz-krmgr mz drtc'.
26 Gct, vz-anim x okatrp nigr.
Arlapx nigr murde aodu-zvzq nigr.