Sam Kranzpnu-pwx-nrade-nzlvqn (45)
Nabz Ngr Nzyrlzkr King Kc Tqmyalz-esz'ngr
Nabz ngr nivz kx nzyr nqvi lr Kora.
Natqngeng
1 King rnge, krlc nabz nenge kx nangr-ngrbo bam.
Nabznge esz'ngr natq kxmrlzting.
X nzngqpx-krm natq mz naonge
Apule nzyrlepx-krm lue mz butqbr.
2 Nzobq-krm lqngipx-esz'ngr.
X natq ngr nzamrlzngr ngqpx-zvzm mz naom.
Delc tqamrlz-zvz-kzngr Gct nim.
Nim King Kx Xplr
3 Nim ncblo kxmyalz-esz'ngr x xplr zlwz mz nzotangr.
Alvco toki r vea scm mz bxli rde kc mz nrkalom.
4 Murde kalr mz nzvo-krm mz vea na-aovxioq enqmi rmqng mz nzxplr-krm.
X nalolvz-amqngiq da kxtubq x leplz kxnzavzo-lzbqng mz zmatq ngrm.
5 X nipna scmqng natu x nalvctrng mz lomr enqmi rmqng,
X lr mrkzbleng amrlx namnclzbzng bam.
X Kxnzmcpx
6 Nzyrlqkr Gct lc nzngini-krm King tqyc tqyc,
Mz nzaclve-krm leplz nemqng mz nzmncngr kx tubq-esz'ngr.
7 Mrlzbz bam da kxtubq, a' px-ngrn da kxtrka.
Dekc Yawe, Gct rm, tqmcpxpe-ngrde nim mz nzmyaszlz-krm kztemqng.
X tqglqlz-ngrde nim,
Murde na-aelule nim tolo ngr nzabrtzngr. ✡ Hibru 1:8-9
8 Lrpzmqng nzaeluti zvz mz tolo kx mnrte mrlzvxi.
X ncblo sc tzayrnibzng gita bam
Murde na-aelalzmle drtwrm,
Mz nabz ma nyzm kx mzte luli-esz'ngr.
9 X olvi kc nangi kwin ngrm tutrpz mz nrlarm kxrtc, nzangrlopliti da kx nzwzngr mz gol kxpnapr.
Olvi lc nide kzdq inyx king kcng tzmncng ma nyzm.
Olvz Rm
10-11 Nim la nanginim Kwin. Lalztqm bange x aclvetio-lzbq.
Mzli kznike ncblo ngrm suti-zlwzngr drtwrde nim mz nzlqngivxikr mzpq,
Mnclzbz bade mz nzngini-krde King x Kxetu rm.
X bzkq matq-zlwzpe mz drtwrm trtem x kxnginimqng.
12 Kxmule-esz' lr Taea nzrkabzng da kxlqlwx bam,
A' bzkq nzbatrpzlr nzrnzlvzo-krm me pnz drtwr ncblo ngrm, kc tqngi king.
13 Mzpq lxngipx-esz'ngr mz nzprtr-krm ma nyz king.
X lrpzmqng nzkxsilvztitr gol.
14 Nim kc tqkq lrpz kxluli nzvzmibzlr nim mz king.
X kztemqng kx nzmnc-kamelrng nzvz-nqblqlr nim, mz nztutr-krbzmu mz mzte.
15 Mz nzprtr-krmu lc ma nyzde,
Drtwrmu elalzm x abrtz-zlwzamu.
Mrlxmqng
16 King rnge, doa ncblo kcng mztr namc mz nqvi lrm sa nangini-kzdr king, da kc tzwai melrmqdrng mzli kc.
X nangi-batrpzme nzaclve-atwrnr-krdr drtc' nyzm.
17 Nabz nenge sa narkatrpz nabztq mz leplz nzamatq-zvz-krdr drtqm,
X nzglqlz-krdr nim tqvzpe tqvzpe.