1 Eto Peter te John te embomeni ta degi ke ijio Temple ta simba ari embo okose te priests pepeni te enana Sadducees* Sadducees embomeni avo embo tapa pepehekari amo vasiri te mane erasora avo hotembeto ke ere ijiaherate na enana ta degi puvua. 2 Enana jo memenga te tapa puvua amita be amo Peter te John te na Bada Iesu na vasiri te erena ke avo ijie embo na vasiri te erari ke avo ahe poekihio enana ke aravo ingari uje ae eto haekea. 3 Eto iji vovunu humbuto tipura ta evora ikea. 4 Rate embomeni isapamane Peter te John te ta ke ingito jo haperekenu ambotani mahu amiga vahaita kaju eo ambotani tapa 5,000 ena.

5 Eto evito enana Judea embomeni ta tihi jigari embopo te embo nei pepeni te Judea ta ke pepeni harikari embomeni pepeni te na ke kasasi Jerusalem ta puvuto torukea. 6 Eto Priest okose javo Annas te Caiaphas te John te Alexander te enana ta javo vahai embomeni te na enana ga horukea. 7 Eto Peter te John te jage eo orohuta puvuto heteo ke einge eto ingia, “Ungo sovera amuta na eto javo amuta na ari emo eheve?” ainge eto ingio 8 eto Ahihi Otohu na sovera Peter ta ikenu humbuto ke mine ngahia eto einge ena, “Embomeni ta tihi jigari te embo pepeni te, 9 dago popora embo ta osaga humbuto ehere kojehija avoeto ungo dagota degi eto ere ingihevete? 10 Ke be avo ungota degi tambueto ano ingesova. Amo Iesu Nazareth embo avo ungo na ji atahu ta torueva eto God na ehei vasiri te erehija amita javo eto javo nei mane amina ehei kojeto ungo ta tihita eha heteto mihia. 11 Iesu amo bande gerikari koro avo embo na toari avo ehako bande ta atahu peni ehija. 12 Amo embo javo neite neite mihera rate embo na javo nei mane hotembasora, Iesu vahai amita javota hondate ari mihia.” 13 Eto embo okokose na Peter te John te ta sovera kito vani vini ea amita be amo Peter te John te school ta pambuto kiari umbae rate Iesu ga umoro ue sovera ari umbua avo embo okokose na kia.

14 Eto popora embo eo kojena avo amo ari be manera ainge eto embo okokose na ke asi uje ea rate popora embo kojena avo enana ga heteto mihinu kito ke toa. 15 Avoeto enana Peter te John te ke kasari bande ta eto ikeo arahata pahuo ke ungo oenga kasea. 16 Eto kaseto ke mine ara eto einge ea, “Embo emiga do aro, ari javotoho be ehera avo Jerusalem embomeni tapa na kehera avo eto enana na ari sapura ari ke avo mane aro embo tapa ingesora. 17 Rate Peter te John te ta ke hande ere ora avo eto kito haekasora avo eto enana Iesu ta ke hande ehako asora amo ngahia be aro kesora.” Ke ainge avo enana ta degi asora amo kasari ta ainge 18 eto jage eo puvuo enana ta ke te ahe poekari te Bada Iesu ta javo jigama ari te tapa toara ke eo 19 Peter te John te ke mine einge ea, “Dago God ta ke agi arote, o ungota ke agi aro avo ungo oenga sirikevu. 20 Dago do kehera eto do ingera avo ke hande asora rate toari ke avo mane asora,” ainge eo 21 enana okokose na ke ehako ngahia na eto eo arahata pambua. Eto enana okokose na enana ta degi do asora avo mana mana ea amita be amo embomeni tapa na ari avo kito be hotembeto God jakeka ea. 22 Eto popora embo kojena amita jua 40 mahu dembarira.

23 Eto Peter te John te arahata pambuto embomeni totoho ga embo okokose na ke do ea avo eo 24 ingito embo tapa hotembari vahai eto God ta degi pari einge ea, “Mamo God sovera isapamane te uhu te enda te eva te donda tapa avo inena a, 25 eto inena no Ahihi Otohu na dagota mama David no pure ari embo ta degi no ke avo ae einge kajena, ‘Eto enda embomeni tapa do eto God ta degi jujune asi ke kaseo, 26 enda ta kings te tihi jigari embomeni te aingeto God te amita Meni avo vahai amita degi isoro eagora,’ ainge David na kajena. 27-28 Eto eha amo ke be eto Herod te Pontius Pilate te Israel embomeni te enda nei embomeni te aingeto enana ta Hondate Ari Embo no Meni Iesu avo sapura rate enana tapa do uera avo inena hoi ta kito ke a, 29 avo eto, Bada, enana ke do ehera avo hotembeto no pure ari embomeni ta degi sovera ari ikejo hamo ngahia au no ke hande are. 30 Eto no ingeni jujurukejo no pure ari Meni Iesu ta javo Otohu ta aro embo kokojekihe ari javotoho te sovera te ururoro embomeni no ke avo be hotembare” 31 pari ainge ijio enana ta ke kasari bande avo vasiri ena. Eto Ahihi Otohu na embo tapa ta jo enetenu God ta ke sovera eto ea.

32 Eto jo vahai eto hotembari vahai eto donda oenga ira ae rate vahaita iketo humbuto hande mine ikara ea. 33 Eto enana apostel 12 na Bada Iesu ta vasiri te erari ke avo sovera eto ere ijiahera eto enana ta degi God ta hondate ari datoho mihahija. 34 Eto enana ta degi donda ambu embo irae amita be amo iji nei nei ainge donda embo na bande retemo enda retemo avo ombuto koro humbuto 35 apostel 12 ta ikeo humbuto hande donda ambu embo ta degi ikihahera. 36 Eto iji vahai Cyprus tiuka ta embo vahai javo Joseph Levi avo ambotani 12 na javo Barnabas ikea (javo amita be amo ‘Ke hande ari meni’) 37 amina enda amita avo ombuto koro humbuto ambotani 12 ta ikena.