1 Rate embo Ananias te amita ae Saphira te aingeto enana ta enda ombuto koro humbuto 2 huna jigito huna ikasora avo ke sokova asora avo ke kasea eto ivu na humbuto pambuto apostel ta ikihe koro nei irae ke ijie ahe ahe unu 3 Peter na amita ke sokova tapa kito ke einge ena, “Ananias, Satan na no jo enetehei koro tapa ikari ke sokova Ahihi Otohu ta degi erea. 4 Ke be amo enda nora ombuto koro humbasoa eto toasoa amo umo tohora, rate enda ombuto koro humbuto tapa ikasoa eto huna ikasoa amo umo tohora, rate umo do eto God ta degi ke sokova na koro tapa ikari ke ere? Umo ehea amo embo ta degi ae rate God ta degi ke sokova erea.” 5 ainge enu Ananias na ke avo ingito vurereketo veto pehihenu embo tapa kito joru ea.

6 Eto singapora na bo humbuto horeto Ananias ta hamo togeto humbuto pambuto kovea.

7 Eto three hours amita ambota ivu do ena amo ae na kiae puvunu 8 Peter na evohu amita degi einge eto ingina, “Ungo na enda ombuto koro umbeva emo tapa erevirete? Avo ejo ingone.” ainge enu “En, tapa aravora” ke mine enu 9 Peter na einge ena, “Ungo do eto God ta Ahihi Otohu eto kesi uje eheve? Umo singapora ta utu uruhu ta asavi bande apupu ta ere ingihete? Amita be amo ivu humbuto pambuto kovehera, ehako umo humbuto pambuto kovasora” ainge ijinu 10 evohu avo vurereketo veto pehenu singa bande jo ta horeto evohu pehenu kito humbuto pambuto ivu kovea engihi ai ta kovea. 11 Eto ekalesia te embomeni tapa te ke avo ingito joru peni vahai be ea.

12 Eto enana apostel 12 na embomeni ta tihi ta vasiri javotoho neite neite ere uahera. Eto ekalesia embomeni na jo vahai eto vahaita ‘Solomon ta Porch’ ta horukihahera, 13 eto osa ari embomeni avo embo nei nei ere koguahera rate enana ga vahaita horukari uje ae ue joru ere uahera, 14 rate embo nei nei na Iesu ke be ijie kaju uore ambotani peni vahai be ere uahija. 15 Ainge eto embo tapa na ambure embo humbuto degi ta besi tirito ikihahera amo Peter ta aririvo na ahurekau kojara ere ikihahera. 16 Embo isapamane da neite neite Jerusalem da engihita ambure embopo te ahihi sasapura na horari embo te tapa avo humbuto uore kokondikihahera.

17 Eto Priest Peni te amita pure vahai embomeni tapa Sadducees ta javo ta pure ere uahera na Iesu ta ambotani ta pure ere uahera avo ari haiteko mane avo eto osaga kito 18 Iesu ta ambotani humbuto tipura ta ikea. 19 Eto mumete tipura ta mihio God ta Anera na puvuto tipura ta bande bokiri hiriketo embo humbuto arahata iketo 20 ke einge ena, “Ungo temple pe ta pambuto heteto Vasiri Eha Iesu ta degi putuhua amita ke tapa embomeni ta degi hande evujo,” ainge ena. 21 Eto Anera ta ke agi eto iho vujenu temple jo ta horeto embomeni ahe poekea.

Eto Priest Peni te amita pure vahai embomeni te tapa Judea embomeni ta horukari javo Sanhedrin ta pure ere uahera eto jage eo Israel embo pepeni tapa vahai ta puvuo tipura embo umbara ikeo police na pambuto embo tipura ta ikari 22 avo pambuto kiae eto egerembeto puvuto ke einge ea, 23 “Dago pambuto tipura ta bande bokiri vahaikari mihia eto tipura ta bokiri simba ari embo mihia rate pe hiriketo jo ta horeto tipura embo irae mahu pambari kito puvera” ainge eo 24 ingito temple ta simba ari embo te Priest peni te na duru avo ingito amita be avo deire avo eto mine umbae uo 25 embo nei na puvuto duru nei avo einge enu ingia, “Ungo embo tipura ta ikeheva amo eha temple jo ta heteto embomeni ta degi ke ijie mihera,” 26 ainge enu ingito temple ta simba ari embo na amita pure embomeni ga pambuto Iesu ta ambotani humbuto puvua. Eto umbua amo andito pundurae teho humbuto puvua amita be amo embomeni na koro na teora joru eto teho humbuto puvua.

27 Eto humbuto puvuto Sanhedrin horukari embomeni ta tihi ta ikeo heteo Priest Peni na ke ngahia eto einge ena, 28 “Eto ungo na embo amita javo ta mane ahe poekasova aingeto ke ngahia na eto ijiera rate ungota ahe poekari na Jerusalem be enetehija eto ungo na embomeni ta degi embo avo dago na mahu tari ke ijie dago mine tasi ke ereva.” Ainge eo 29 Peter te ambotani nei na ke mine einge ea, “Dago embo ta ke avo mane agi asora te God ta ke avo agi asora. 30 eto embo amo ungona ji atahu ta teheve pehena amo ungotenau mamahamane ta God na Iesu pehena avo enu vasiri te erena. 31 Eto God na humbuto amita ingeni be ta ikehei arumbehei ungotena tihi jigihe orekaja ikehija eto iji eha emikote ungotena Israel embomeni na ari sapura avo Iesu ta degi aja to ijiroro Iesu na humbuto au irae asuja. 32 Ke emo, Ahihi Otohu avo God na amita agiari embomeni ta degi hande ikaguja amite nangote tapa ke erevi ere kogora.” 33 ke ainge eo ingito tumo peni vahai be eto embo taro pehaja ke ea 34 rate Pharisee embo vahai javo Gamaliel amo God ta ke pepeni ahe poekari embo eto embo tapa ta tunga humbari embo amina Sanhedrin horukari ta ereto Iesu ta ambotani arahata pambara ke enu pahuo 35 ke einge ena, “Israel embomeni ungo enana ta degi do asi uje ere ove avo be hotembevu, amo eingera. 36 Embo Theudas na ereto heteto na embo penira ainge eto amita ambotani tapa 400 umbuna rate teo pehenu amita ambotani amo sio sao nei do ae pambuo irae ena, 37 eto nei Judas Galilee embo amo embomeni ta heka humbari iji te amina ereto heteto amita ambotani umbuna rate teo pehenu amita ambotani sio sao pambua. 38 Avo eto ke erena embo evi tovujo pambare, eto enana ta ke ijiroro avo ungo haekaeheva 39 rate God ta ke avo ijiroro ungo na haekari inono ae ra amita be amo God ta degi isoro asova.” Ainge enu ingito ke be hotembeto 40 ambotani jage eo puvuo ituha na torue ehako Iesu ta javo mane ahe poekasova ainge eto ikeo pambua. 41 Eto Iesu ta ambotani na Sanhedrin toto tunga javotoho ue God jakeka ijie pambua, amita be amo enana Iesu ta javo sovera eto jigama uo God na enana ta sovera inono kito memenga ikena. 42 Eto iji tapa enana temple jo ta eto bande pe vahai vahai ta pahue Iesu amo God ta Meni amita duru hande ere uahera.