1 Eto dago peketo toto e nga ta tihi tambueto da Cos ta puvuto ai hetea eto pambuto iji nei da Rhodes ta puvuto heteto toto da Patara ai 2 e nga nei enda Phonecia ta pambasi unu kito ai pambua. 3 Eto pambuhumihe enda tiuka javo Cyprus ta kaina hena ta jorembeto puvuto enda javo Syria ta da vahai Tyre ta heteo donda umbaro veaja uo 4 dago ai veto ambotani hambuto enana ga hura vahai ai mihio enana ambotani ta jo ta Ahihi Otohu na ke enu enana joru eto Paul ta degi, “Umo mane Jerusalem pambasoa.” ainge ea. 5 Eto iji irae unu dago pambasi uo enana airi te meniundi te tapa da ahone ta pambuto eva hora ta paunge teteri eto dago tapa pari ea. 6 Eto dago pari eo irae enu mine peka eto enana egerembeto da ta pahuo dago e nga ta vihia. 7 Eto da Tyre toto e nga ta pambuto da Ptolemais ta puvuto namei kamei ga umoro 8 eto evito da Caesarea ta pambuto evangelist javo Philip hambuto amita bande ta pambuto evia. Eto Jerusalem ekalesia na embo tapa seven umbuo deacon eto Philip ga tapa pure ea. 9 Eto Philip ta iariri tapa nei heriso nei heriso amina jimbae teho mihie God ta peroveta eto God ta ke avo hande ere uahera. 10 Eto dago ai iji isapa mihio peroveta vahai javo Agabus na Judea enda ta eto puvuto 11 Paul ta pupuri bujeketo humbuto amita utu te ingeni te aingeto vahaiketo punduto ke einge ena, “Ahihi Otohu na einge eria, ‘Judea embomeni Jerusalem jo ta pupuri emita mamo einge eto tigito enda nei embo ta ingeni ta ikasora,’ ” ainge enu 12 dago ingito Paul mane Jerusalem pambaja enana te dago te tapa vahaita eto haekeo 13 Paul na ke mine einge ena, “Ungo do eto sisi sasi ijie nau jo ere kajiheve? Na nau hamo mahu ngahia ehija avo eto Jerusalem ta pambuto Bada Iesu avoembo punduto tipura ta ikaro horasona amo tehora o taro pehasora amo nau degi ta tehora.” ainge enu 14 dago amita jo ari haperekari inono ae enu ke einge ea, “Bada na amita uje do aisuja avo Bada na aisuja.”

15 Eto iji amita ambota amo Jerusalem ta pambasi nununga eto 16 pahue da Caesarea ta ekalesia embo nei uhoho amina dago humbuto embo Mnason amo ambotani mahu enda Cyprus embo avoeto amita bandeta evesi pambua.

17 Eto dago na Jerusalem ta puvuo namei kamei na dago osa osa ue pekea. 18 Eto evito Paul na dago ga James kesi pahunu ekalesia ta okokose tapa vahaita uo kito 19 Paul na peketo enana ta degi God na sovera Paul ta ikenu enda nei embomeni ta degi ari nei te nei te tapa do ena avo enu 20 ingito God jakeka eto Paul ta degi einge ea, “Namei kijo, Judea embomeni tapa thousands ainge amina Bada Iesu ta ke avo ke be ijie ambo ambo ere ora eto Judea embomeni ta ke pepeni mamahu mahu avo sapura ae javotoho na agi eagora, 21 rate enana duru ingera amo inena Judea embomeni enda nei nei ta iragora amita degi pambuto Moses ta ke pepeni avo Judea embo ta meni isasaraho ta hamo kakamba mane ara ehea eto Judea embo ta ari tapa avo mane ara ehea 22 amita duru avo ingito mihere umo puvea, avo enana ke ingito umo tasora 23 avo eto umo dainge eto hondate asora avo dagota ke asora avo agi ejo. Eto embo tapa nei heriso nei heriso amina God ta degi hae kaeto mihera 24 amiga pambuto hande ikejo tongopa irae ai. Eto o heveto hande ikasova amita mine amo koro no amina umote embo heriso nei heriso avoeto ombujo. Eto ainge ao enana na Moses ta ke agi ue siro tiukasora ari amo embomeni na kito duru mahu ingera avo sokova ke asora eto inena Moses ta ke pepeni avo jigama ari ke asora. 25 Eto enda nei embomeni na Iesu ke be ijie ambo ambo ue ke pepeni do agi asora avo dago na ke kaseto ahari ta kajihera amo indari enda ta God ingeni na eto pene ikari amo sapura avoeto mane indesora, eto nei amo orosa be avo mane indesora. Nei amo o orosa te mane indesora eto nei amo embo na mane tiha asora.” Eto ke avo eo irae enu 26 iji nei Paul na embo nei heriso nei heriso ainge humbuto pambuto Judea embomeni ta ari avo tongopa irae eto temple jo ta horeto enana ta ajirekari iji heka ena amo ajirekari iji tutumota o ingaro evekasuja avo Priest ta degi ke ena.

27 Eto ajirekari iji 7 tutumo asusumbihinu Judea embomeni enda Asia ta eto puvurari amina Paul temple jo ta kito peiketo humbuto embo tapa ta jo ta ke gagaha eto einge ea, 28 “Eto Israel embomeni, ungo hondate evu. Embo emina enda nei ta pahue Moses ta ke pepeni te ungotena Israel embomeni te ungotenau temple avo sokova ke eaguja, eto amina enda nei embo humbuto temple otohu ei ta horeto ehei sapura ehija,” 29 ke ainge ea amita be amo Paul na embo Trophimus da Ephesus embo amiga Jerusalem jo ta isa unu kia avo humbuto temple jo ta horari ke ainge eo 30 da embomeni tapa na tumo eto temple jo ta huheveto pambuto Paul jigito goruketo hambuto puvuto temple bokiri pe ahurekea. 31 Eto embomeni na Paul taro pehaja uo Roman isoro embo ta tihi jigari embo na Jerusalem embomeni na sio sao ari ke avo ingito 32 amita isoro embo te isoro kihi humbari embo te veto humbuto huheveto puvua. Eto embo na Paul toruo isoro embo puvutohuo kito toa. 33 Eto isoro ta tihi jigari embo na Paul andito chain heriso na pundurora ke embomeni ta degi ke eto einge eto ingina, “Embo amo amunure eto amita ari sapura deire?” ainge ijinu 34 embo na ke peni vahai ijie o a ijio embo okose amina Paul ta sapura avo eto ingari inono ae enu amita isoro embo ta enu Paul humbuto amita bande peni ai ta vihesi uo 35 embomeni na sio sao tasi uo Roman isoro embomeni na Paul oviribeto humbuto indiri ta vihio 36 embo isapamane na, “Paul tevujo pehai.” ainge ea.

37 Eto enana Roman isoro embomeni na Paul humbuto enana ta irari bande peni ta horasi uo Paul na isoro tihi jigari embo ta degi ke einge ena, “Na no degi ta ke asona amo aravorete?” ainge enu embo peni amina ke mine einge ena. “Ajae, umo Greek ke ingari ra 38 te Egypt embo vahai na amita tunga tiukari embo tapa 4,000 ainge humbuto gavana ta degi isoro asi degi ojagatambu ta pambuna umo embo aravo hotembehena rate umo Greek embomeni ta ke ingari rate umo embo avo manera.” ainge enu 39 Paul na ke einge ena. “Na Judea embora. Na nau aja na enda Celicia ta da Tarsus ai ingena avo eto na da okose amita embora. Avoeto na embomeni ta degi ke asona amo aravorete?” ainge enu 40 isoro embo peni na aravora enu Paul na indiri ta heteto ingeni na ahe ahe enu embomeni jamopo eo Paul na Judea embomeni ta ke na enana ta degi einge ena.