1 “Nau mamahamane te nau namei kamei te nau embomeni tapa nau ke ingivujo, eto na amunure avo ungota degi ke asona,” ke ainge ihiketo enu 2 embomeni na amita ke hajire ingito amo Judea embo ke hotembeto ke jamo jamo eo 3 Paul na ke einge ena, “Na Judea embora eto enda Celicia ta da Tarsus ai ta nau aja na na umbuna rate na da Jerusalem ei ta pajio embo Gamaliel na na ahe poekihaja eto ungotenau ohihi ta ke pepeni tapa Moses na kajena avo ahe poekena eto na ungo eagova ainge inono God osa ue ke agi uena. 4 Eto nanena embomeni Iesu ambo ambo ari degi ta pahuo osaga ikihe teo pepehekea. Eto nanena embo te evohu te humbuto tipura ta ere gosukihahena. 5 Eto na ke erena emo Priest okose te council embomeni na aro ungo ingari haitekora amo enana ta ahari da Damascus ta Judea embomeni ta degi Iesu ta ambotani chain na punduto humbuto pambuto Jerusalem ta ikano tara nanena ahari humbuto pambua.

6 Eto na degi ta pambuhumihe da Damascus auviho iji orohuta usasa pipiri ainge sariambu enu 7 enda ta veto gombuto ke einge ingia, ‘Saul, Saul, umo do eto nau degi ta osaga ikaroe?’ 8 ‘Bada umo amunure?’ ainge ene, ‘Na Iesu Nazareth embo nau degi ta osaga ikihe ere kogona,’ ainge enu 9-10 na ke einge eto ingia, ‘Bada na do ano?’ ainge ene Bada na, ‘Umo ereto da Damascus ta pambuto umo tapa do asoa avo God na mahu sirikehija avo au ingesoa.’ ke ainge ingia amo embo namote degi ta puvua amina ke do ena avo ingae rate usasa avo kia. 11 Eto na pambasi ereo usasa na tihi ta kajenu sapura enu nau namei kamei na ingeni ta jigito humbuto da ta pambua. 12 Eto embo vahai javo Ananias amo da Damascus ai ta mihie God jakeka ijie ungotenau ke pepeni avo agi uoi Judea embomeni na embo avo jakeka ere ijiahera. 13 Eto embo amo puvuto engihi ta heteto, ‘Namei, Saul ehako ki,’ ainge enu nau tihi hirikenu embo avo kon eto kia. 14 Eto embo amina nau degi ta ke einge ena, ‘Ungotenau ohihi ta God na amita uje tapa avo kioa umo humbija eto amina ehei inena amita pure ari embo javotoho Iesu kia eto ke hajire ingia. 15 Eto tapa do ehei kia eto ingea avo embomeni tapa ta degi ke hande asoa. 16 Avoeto umo mane simba asoa te ereto bapataito eto Bada ta javo ta jage ao amina no ari sasapura au irae aisuja.’ Ainge embo Ananias na enu ingito tapa agi ea.”

17 “Eto ai iji isapa mihimihe na Jerusalem ta egerembeto pambuto temple ta horeto pari ue mihie 18 bada ehure ta kiarako uo amina, ‘Umo sausau Jerusalem toto pambu. Inena nau ke eha ingea amina jo haperekehei ke hande ere oa amo embomeni na ingito tumo eto ke be mane asora avo eto umo pambu,’ ainge enu, 19 ‘Bada, ainge mane, na Judea embomeni ta God jakeka ari bande tapa ta horeto no ambotani andito humbuto toruena amo enana na kito osa eagora. 20 Eto no ke hande ari embo Steven tari iji te nanena Steven tari embomeni ta bo avo simba ue teo pehena amo javotoho ke ere ijiaehena,’ ke ainge eo 21 Bada na, ‘Umo enda hoi embomeni ta degi ikasona avoeto ikihena pambu’,” ainge ena. 22 Eto Paul enda nei embomeni ta pambari ke avo enu ingito embomeni na tumo peni vahai ue gagaha ijie, “Embo evi humbuto pambuto be tevu pehai,” 23 ainge gagaha ijie bo houketo jihihie oniho timbuto ji ta gosukeo ihajara enu embomeni na gagaha peni vahai be ijio 24 Roman ta isoro tihi jigari embo na ke enu Paul humbuto amita bande peni ta ikeo tihi jigari embo na Paul na amita ari sapura harikae ari ke hotembeto amita isoro embo na Paul esi na tara ke ena. 25 Eto puvuto ikeo mihie Paul na isoro embo vahai ta degi ke einge ena, “Ungo Roman embo esi na tasi ere ova amo court ta pehumba eto sapura hambae peiketo esi na tasi ere ova amo Roman embo ta ke pepeni rete?” ainge enu 26 isoro embo amo ingito joru eto amita tihi jigari embo ta degi pambuto ke einge ena, “Umo do asi hotembihe, embo amo Roman embora,” ainge enu 27 tihi jigari embo na joru eto pambuto Paul ta degi einge eto ingina, “Umo Rome ta citizen rete avo ke be na ejo ingone,” ainge enu Paul na, “En, na Roman embora,” ainge enu, 28 “Eto namote tapa enda nei embo rate koro peni vahai na ombuto Roman ta citizen ehena,” ainge enu Paul na, “Na aja na ingari ta eto Roman embo ehena.” ainge enu 29 isoro embomeni na ke avo ingito nei eto ingae toa. Eto tihi jigari embo na Paul amo Roman ta citizen avo chain na pundua avo eto joru ea.

30 Eto iji nei Roman ta isoro tihi jigari embo na Paul ta degi Judea embomeni na pehumba ea amita be avo kesi ke enu Priest okokose te Council te vahaita arumbeo Paul chain na pundua avo bujeketo humbuto pambuto ikenu hetena.