Babatiso nuwanuwatuna labui. Kabikabi ta meta Dius udiyedi ye laoma. Dius bodadi hekadi huya badobado waila unai se duidobi ede nuwadi kabaheꞌaꞌadi, na kabo se lau se tapwalolo. Yowane Babatiso tamowai ye hebabatisoidi kaniyona ede se nuwabui na yodi laulau yabayababadi se hekaiyawasidi yo se patuꞌuyo Yaubada unai (Maleko 1:4). Na Yesu hinage ye hededelau yona apostolo udiyedi bena tausunuma se hebabatisoidi, yodi nuwabui hekihekinoina (Mataiyo 28:19). Na kita yoda huya ta unai meta teina ta babatiso kaniyona ede, yo hinage ta mwalaesae ekalesiya bodadi udiyedi.

Bali meta kai hesau doha witi, unai pwalawa se gabu (Yowane 6:9,13). Yesu yona huyaena, bali maisana ye gagili na kabo witi. Unai bali meta tamowai nige monimonidi kadi pwalawa.

Basileiya meta wasawasa o gabemani hesau yona kabaloina tanona. Dimdim unai se wane kingdom o country. Yaubada yona basileiya hededehemasalahana hinage ku hasili.

BC meta kalina Dimdim unai ye laoma, na kaniyona ede before Christ, o huyana sola nige Yesu ye tubu tanoubu ta unai. 100 bc kaniyona ede bolimaina ne mulina ne unai kabo bolimai badodi 100 na kabo Yesu se labasi. Iyamo Yesu yona huyalabasi bolimaina tausonoga ye hineli wa musamusana ye laupwano. Unai Yesu yona huyalabasi bolimaina mamohoina ede 5 bc o 6 bc. ad hededehemasalahana hinage ku hasili.

Belesebulu meta Satani hesana hesau (Mataiyo 12:24,27). Hesa ta meta dagela tamowaidi Ekeloni magaina unai taumiya yodi yaubada Baala-Sebubu hesana, na tausonoga se kaimasi kaniyona nuwana numa kana tanuwaga. Na Dius tamowaidi hesa ne se hai se tolelaei Satani unai.

Beliyela meta Satani hesana hesau kalina Hebelu unai (2 Kolinito 6:15), na kaniyona ede, yababa, yo, nige yona namwanamwa saha hesau.

Bida yo biki: Aꞌa hededehemasalahana ku hasili.

Bosibosi meta buka ta unai kaiwa hesau hesana fig kulibuina. Papua New Guinea unai teina kaiwa fig meta nigele, na bosibosi ta hai, matawuwuna kaniyona se kamna doha hinage fig kaniyona. Iyamo kaiwa labui ne kadi kao udoi. Na kaiwa fig huyagwagwama unai luguna se ulu (Mataiyo 24:32) na bosibosi nige yona yaiulu, yo hinage bosibosi saliyana ye lohakalili na kabo fig, iya lohana gonowana ye sae 11 mita.

Fig lugudi lakilakidi, na kaniyodi lakidi doha waiwai gagilina, na se pulupululu na tumadi gagigagilidi se bado kalodiyena. Kaniyona ne se kamnakalili na tamowai se kaikaidi. Ma kidakidaidi se kaidi yo hinage se hekaimahanadi ye lau ee se pitali na se kaikaidi. Pitapitalidi ne kabo gonowana se bawa huyalohaloha na gonowana se kaikainauyaidi (1 Samuwela 25:18).

Buka Tabuna unai fig kaiwana meta Isalaela bodadi heyaheyasonidi (Luka 13:6-9), yo hinage tamowai yodi mauli namwanamwana heyaheyasonina (1 Kin 4:25, Maika 4:4).

Bwayabwaya Yesu yona huyaena, Dius yodi bwayabwaya nige bwatano unai duha se sala na lasi se tole na se wui, na yodi bwayabwaya meta duha lohalohana weku unai se tadi, kuduli dedekana unai (Mataiyo 27:60). Duha ne kedana gagilina na weku unai se buigudui. Duha ne kalonaena kabo tauboiboita hauhauna sinalena kabatolena se tadi doha kabakeno, yo hinage sinale kabatoledi duhadi gagilidi hekadi se tadidi duha lakilakina wa dedekana udiyedi. Tauboita yausi panenamwanamwadi (doha mulo yo aloi) udiyedi se heyausidi na kaleko posiposidi tupwadiyao lohalohadi udiyedi se sumadi na se toledi duha unai tauboita hauhaudi yodi kabatole ne unai (Yowane 19:39-40). Na yodi huyanuwadubu mayadaidi se gehe kabo sinale wa se tole kabatolena duhana gagilina hesau unai. Na ena kehadi hesau ye boita kabo duha kabaguduina wekuna wa se buihesuwala na tauboiboita wa hinage se tole duha kalona ne unai, meta kabatolena hesau unai se hekeno. Na taugogogogo hinage yodi kabikabi hesau: Huyana sinale hesau ye pwasagehe na ye pitali kabo weku unai lasi gagilina se tadi na tauboita wa siliyana unai se usaidi. Toletoletau hededehemasalahana hinage ku hasili.