Dagela tamowaidi: Siya meta nige Dius tamowaidi, yo hinage nige Yaubada tausunumaeina (Mataiyo 5:47).

Dalakama meta Giliki tamowaidi yodi moni hesau (Mataiyo 17:27).

Dawida meta Yaubada ye hetolo iya Isalaela tamowaidi yodi wasawasa helabuina, wasawasa Saulo mulinawai. Dawida yona huyawasawasa meta bolimai 40, nuwana bolimai 1010-970 bc, na iya wasawasa saesaekalilina Isalaela udiyedi. Wasana ta hasili 1 Samuwela 16 unai ye lau ee buka gehena, yo 2 Samuwela, 1 Kin, yo 1 Kolonikele bukadiyao maudoidi udiyedi.

Dawida natuna kaniyona meta tamowaina ne kana mumuga ede Dawida, iya nabada wa unai Dius yodi kin saesaena. Yesu yona huyaena Dius hesa Dawida Natuna se tole Mesaiya unai (Mataiyo 9:27).

Demoni (1 Kolinito 10:20) meta yaluwa yabayababana hededehemasalahana ku hasili.

Denali meta Loma tamowaidi yodi moni hesau (Maleko 6:37, 12:15).

Didiga kaniyona bagubagunana meta ginauli hesau kana kao ye namwakalili, doha kaleko se didiga o mahana yo nawalai yo kipwala se didiga (1 Kolinito 15:41). Na Buka Tabuna unai hedehedede didiga se tolelaei Yaubada unai se wane, Yaubada yona didiga. Teina luwana ne unai meta kana kao saesaena namwanamwana, yona gigibwali, yona bayao, yo yona gadosisi.

Yowane bukana unai didiga hedehededena meta “kana kao saesaena mamohoina” (Yowane 2:11).

Apostolo Paulo ye kuli meta tamowai Yaubada yona didiga se kabisapuli kaniyona ede se baꞌaya (Loma 3:23).

Dius tamowaidi meta Abelahama kana isimulitao. Hesadi hekadi meta siya Isalaela tamowaidi o Hebelu tamowaidi.

Yaubada Abelahama ye kaisunuwai yona tamowai, iya ma kana isimulitao maudoidi. Siya Yaubada se kaihelahui. Kabakitalobaidi bagubagunana meta pelitome (Genese 17:9-14). Na huyana Yaubada Isalaela tamowaidi Aikupito unai ye woyahepesadi na se lage Sinai kudulina unai, kabo hinage laugagayo yo kabikabi udoiꞌudoi ye moseidi se hemala kabakitalobaidi (Esodo 19:1-5, 20:1-19 yo hekadiyo).

Apostolo Paulo kabo ye hededehemasalaha meta nige gonowana tamowai hesau ye hedede bena iya Dius tamowaina kana siga Yaubada yona laugagayo ye miyawatanidi (Loma 2:25-29).

Hedehedede Dius meta Dimdim katakataina ta hekawalaeyama kalinadaena. Hesa Dius yona kabalaoma meta Giliki kalinadiyena Iudaios, kaniyona ede Yudeya tanona tamowaina.

Diyabolo: Hedehedede ta kalina Giliki unai ta hai na ta bui kalinadaena. Kaniyona meta tauhededeheyaheyababa yo taulauhegilu, na kana paisowa ede tamowai ye hegihegiludi Yaubada matanaena (Yobi 1—2, Hemasalaha 12:10) yo tanoubu ta unai ye nohoidi (Mataiyo 4:1-11). Hinage Satani yo Belesebulu hededehemasalahadi ku hasilidi.

Donki meta suisui lakilakina hesau. Isalaela tamowaidi donki se hepaisowadi na yodi bahebahe se usaidi, yo hinage tamowai se geluidi na se kadau (Luka 10:34, Maleko 11:7).

Dubu nuwanuwatuna Buka Tabuna unai meta Yesu Keliso yo Yaubada taukawamamohoiyeina bodadi, na nige yodi kabakoikoigogo numadi (Mataiyo 16:18, Apostolo 15:3 yo 20:17, yo hekadiyo). Ekalesiya bagubagunadi wa nige yodi dubu numadi se kabidi, na se koikoigogo Numa Tabuna bakubakuna unai yo yodi kabamiya numadiyao udiyedi (Apostolo 2:46, Loma 16:5). Yo hinage Paulo ye laulau Dius yodi sunago udiyedi ye lauguguya (Apostolo 9:20, 13:5, 14:1, yo hekadiyo).

Dudulai meta (1) tamowai yona laulau ye hetala. Tamowai dudulaina hededehemasalahana ku hasili.

(2) tamowai yona dudulai ye hetala, iya ede saha ye namwa mo taba ye hai o ye ginauli, yo yona gigibwali.