33
Bab-Jehováʼgi abonoleged danikid
1 Asiria-dulemar-dule-wiodimalad, gwen be wioledisulidi, ¡be duledar-wilesmar!
Asiria-dulemar-dule-yamodimaladi, gwen be yamoledisulidi, ¡be dule-wilesmar!
Be dulemar-obelosale, be bergumarmogoed.
Be dulemar-yamosale, be yamolemarmogoed.
2 Bab-Jehováʼye, wile be anmar-dake.
Ar anmar begi bendakleged edarbediid.
Bane-bane wakudaryalabali, anmarga be niga-ogannoged.
Suli-suli-itoged-ibagine, anmar-abonogega be gued.
3 Be-gayaburba mala-goledyob-goledbali,
dulemar gwakiar duurmakdedamalad.
Be-gangued be oyodele,
dulemar-yar-baid-baidgi-bukmalad aisakiddamalad.
4 We-dulemar-e-ibmar-nikadgi, e-isdarmalad ses-burwigana-bateyobi egi nonimaloed.
E-ibe bela ibmar-nuegan sunonimaloed.
5 Bab-Jehová-e-nug odummolegoed,
ar nibneggi negdakmaid.
Bab-Jehová, igar-innikigwad-imakega Sión-yala-imakmaid,
emarga-ibmar-nabir-guega imakmaid.
6 Bab-Dummadi, dobsuli-gudiguega anmar-imaked.
E-binsaed-nikadaed, degi, bela e-ibmar-wisid,
bela-bela bendakleged anmarga uksad.
Bab-Jehová-dobee-nanaedi, anmarga ibmar-nuedga gued.
7 Be nue dule-gandikmalad-gordidiid itomar,
ibiyobi neg-galimbaba binnasuli oimakdemala.
Neg-bogidik-saedgi-sunmakdimaladi,
bela-belad ogormakdemalad.
8 Dulemar bar igarba daklesulid, igar-ollo maid,
dulemar bar igarba iirmaksulid.
Na-ebo-igar-mesismaladi bichismalad.
Dulemar, dule-we-igar-maid-wismalad isdar dakdemalad.
Dulemargi bar binsaed-nika dasurmalad.
9 Bela dulemar bukib-binsaedbimalad,
Líbano-yala bela dinguded, e-dakleged bela yogguded.
Sarón-neba bela nega-dulesulidga naded.
Basán-yala, degi, Carmelo-yala, e-yeer-ara-ara-dakleged yogguded.
10 Bab-Jehová weyob soged:
“Emisgindi, an ibmar imakgwersunno.
Emisgindi, an-nug odummolesunnoed,
emisgindi, an-nug ogannolesunnoed.
11 Asiria-dulemar igar-amimaladi, unnila e-igarmar binsaledga gued,
igarmar-isganaga gued.
Ar an buu imakdogua, bergudoed.
12 E-sorda-bila-onomaladi, ikomar-sooyagi-gummaknaidyobi, gumaloed.
Bela burubi gumaloed.
13 ”Bemar, dikasuli-bukwamalad, an ibmar-imaksad, be nue itomar.
Bemar, itaka-bukmalad, an-gangued be dakmar.
14 Dule-isgumalad Sión-yalagi dobe itobukmalad.
Dule-isganamar dobedba wawanmakbukmalad.
Weyob sogbukwamalad: ‘¿Doa-anmar, soo-dule-obeloged-nagaba megoe?
¿Doa-anmar, soo-dummad-gege-bergued-duurmaksiid-nagaba megoe?’
15 Unnila dule-igar-innikigwadba-nanadiidbi, degi, napiragwadba-sunmakdiidbi, nibneggi mai guoed.
Dule ibmar-isganagi-mani-onodisulidbi, dule emarse-manigi-bakledisulidbi, nibneggi mai guoed.
Dule emar-gindakmaladba ibsadisulidbi, ibmar-isgana-imakleged dakbidasulidbi,
16 dule-weyob-daedi, nibneggi mai guoed.
Akwasaila-gandikmalad e-dukued-negga guoed,
masgullemalad ega uklegoed,
gobed ega gwen surguosulid.”
17 Isaías, Israel-dulemarga sogdebalid:
“Bemar-sunnagwad, rey-e-gangued-yeerdaklegoed be dakmaloed,
bemar-yala dungumai be dakmarbaloed.
18 Bemar dobee-itosadgi-binsadmardibe, na be sogdemaloed:
‘¿Bia wede mani-ebisged nade?
¿Bia wede mani-daked nade?
¿Bia wede nakuleged-neg-matusurmalad-dakdiid nade?’
19 Bar be we-dulemar-isgana dakosurmalad.
We-dulemar, e-gwabinduku-aku-itolemaladid,
e-sunmakedi, magar-itolesurmaladid,
ber oburagwar sunmakmaladid.
20 ”Sión-yala be dakmar,
ar a, anmar-ibamar-onoged-neggweburad.
Bemar-sunnagwad Jerusalén-neggwebur be dakmaloed.
A-neggwebur, bogi-meged-negad, nuesaale sobar siid.
Bipisaale e-abgamalad-suar ungosulid,
e-abgamalad-dubmar itirosurbalid.
21 Jerusalénʼgi, Bab-Jehová anmarga e-gangued oyogoed.
Diwar-dummagan-maiyob, degi, diimar-iirmakmaiyob guoed.
Ar a-diwargine, ur-gammi-nikamalad iirmakosulid,
degine, ur-gandikmalad egine iirmakosulid.
22 Ar ade, Bab-Jehová, anmar-idugedid.
Ar Bab-Jehová, anmarga dummadga negdakmaidid.
Ar Bab-Jehová, anmar-e-reyd.
¡E na anmar-abonogoedid!
23 ”Asiria-ulumar-e-dub nollomakded.
E-urmor-buar geg-nue-gwisgue egemakwichid,
degine, e-urmormar geg argaed.
E-isdarmaladi, degi, dule-muya-muyamaladse-bakale, ei ibmar atursamaloed.
24 Ar Bab-Dummad bela dulemar-Siónʼgi-mamaid-e-isgued osulogoed,
degine, bipisaale dule-gwensak sogosulid: ‘An uelleye.’ ”