34
Dulemar-yar-baid-baidgi-bukmalad sabsur-odurdaklegoed
1 Dulemar-yar-baid-baidgi-bukmalad, gayaburba-itogega wese be walikgudamar.
Dulamar, nue-bogimakar be itomar.
Napneg-naid, nue itogo.
Bela-egi-ibmar-bukwamalad, nue-itomarmogo.
Napneg-bipirmaknaidgi-bukmalad, bela itomogo.
Bela-napneggi-ibmar-sanmakedi, nue-itomarmogo.
2 Bab-Jehová, dulemar-yar-baid-baidgi-bukmaladse bela urwemaid.
Amar-sorda-bila-onomaladse bela urwemaid.
Bab-Dummad, bela bemar-obeloged sogmaid,
bela bemar-ogiloged sogmaid.
3 Dule-girgumaloedi, bela omiledoed,
e-muimar nunusaila yapatoed,
e-ablismar yalaganba suurmakdoed.
4 Niismar-mogir-imbaba-nanaid bar daklegosulid,
bela mogir atudoed.
Igi garda obipirmakledae, mogir deyob guoed.
Bela niismar-e-dakarmakmalad berguoed.
Uva-sapi-gagan-dinguddaedyobi, dakle naoed.
Higuera-sapigi e-san-dingusnai-daedyobi, dakle naoed.
5 Bab-Jehová weyob sogye:
“Bato mogir-imbaba, an-es-suid guagwar naid.
Be dakmalana, Edom-dulemargi es-suid igi-gwichigudani be dake,
ar an we-dulemar bela ogilogoye sogsad.”
6 Bab-Jehová-e-es-suid bela ablisbi naid,
sibad-omemar-ablisgi obagwar naid,
sibad-wawaad-senigana-ablisgi obagwar naid.
Bela e-es-suidgi e-gwallu darwagwar magaled.
Sibad-wawaad-machered-mirwa-gwallugi darwagwar magaled.
Ar Bab-Jehová, Edom-yargi Bosra-neggweburgi ibmar-durgan oburgwenaid.
Edom-yalagi ibmar-durgan yeer ogilonaid.
7 Moli-bebe-nikad-ursirmalad egi gwichigudmaloed.
Moli-bebe-nikad-sapingana, degi, moli-bebe-nikad-machergan egi gwichigudmaloed.
Edom-yalagi ablisbi bipirmaknai guoed,
e-napagi, e-gwallumarbi neg-ganai guoed.
8 Ar ade, Bab-Jehováʼga buged-imaked-iba gued,
buged-saed-birga gued, adi, Sión-yala bendaklegegar.
9 Edom-yar-e-dianmala baryaga binnidoed,
e-ukub, azufreʼyob uediki naguoed,
barya-uedikidyobi diopisuli napa naguoed.
10 Bane-bane barya uediki-ganaidbi guoed, gwen akinnosulid,
e-waa bupurmagwichidbi guoed.
E-yala degisadegu ollobi-nai guoed,
bipisaale, bar dulemar egi iirmakosurmalad.
11 Noomargii-daklemalad egi neg-egwannoed,
akwanuku-negga gudoed.
Egine, irmonmar e-uu sobdoed,
degi, sikwisichimar e-uu urbidoed.
Bab-Dummadi we-yala bela gagaoed,
degi, walagwen-ollobi-selenai imakoed.
12 Dule-nuga-nikamalad-sate guoed, yalaye bar bilegosulid.
Bela dule-gandikmalad bar daklegosulid.
13 E-reynegmargine ikomarbi bipirmakdoed,
e-neg-gandikmaladgi dakemar-sunnabi bipirmakdoed,
degi, gagan-iko-ikomaladbi engudoed.
Achu-sapur-uaya-gannagana-e-negga gudoed,
nuu-dummad-malisuigan-megega gudoed.
14 Nega-dulesulidganba ibmar-durgan-ursilimalad-bukwadi, achu-sapurmarbo atodoed.
Sibad-sapurmar, e-sordaganse gotemaloed.
Irmon agi ambikumarmogoed,
a-neggine signonimaloed.
15 A-neggine, irmonmar e-uu soboed,
degi, e-akwamar urbidoed.
E-sakan-urbali, nuekwa e-akwamar urboed,
nuekwa e-mimmigan akoed.
Agine, mulamar ambikumogoed,
abirgunar-abirgunar ambikumogoed.
16 Bab-Jehová-gardase be idako, agi be nue-absogo:
“Bipisaale we-ibmar-durgan gwen beosulid,
abirgin-abirgin egad-egad nikamaloed.
Ar Bab-Jehová-sunnagwad igar weyob uksad,
Bab-Dummad-Burba weyob oambikusad.
17 Ar Bab-Dummad ega negmar amisad, ega yala uksad.
Degisadegu, wemar we-yalagi bukwa gumaloed,
degisadegu, egi gudii gumaloed.”