57
Israel-dulemar ibmar-sobarmaladse gormalad
1 Dule-innikidaedi burgwemamaigusad,
dule gwen bai daksurmalad,
dule-bega-arbamalad-nuegan, burgwemamaigusad.
Ar dule aku itodamalad, ibiga dule-nuegan isgued-ular burgwiddamala.
2 Ar dule-igar-nuedba-nanaedi, nuedgi burgwemalad,
neg-uangi obunnomegisdamalad.
3 Bab-Jehová sogded:
“Bemar, ome-ina-isgana-imaked-mimmigan,
negsichigi-galagwensuli-gambanuchuganba-nanamalad-e-wagan, be anse walikgudamar.
4 ¿Doagi be dodoye sogmala?
¿Doaga be binnasur gaya-maa-maa-imake?
¿Doaga be gwabin buud-buud-imake?
¿Ar bemar isgued-mimmigansursi?
¿Ar bemar gakansamalad-wagansursi?
5 Bemar wag-ulu-sapi-urba, degi, bela sapi-dummagan-urba, galagwensuli guddamalad.
Bab-dummadsurmalad-e-nug-odummogega diangangi, degi, akwa-yaa-ollogangi burwigana be oburgwiddamalad.
6 Dian-akwa-swirimalad, begadga gumaloed.
We-akwa-swirigangi be bergudmaloed.
We-ibmar-asabinni, vino be eosmalad,
degi, ega be ibmar-gwag-uklemalad uksamalad.
Degite, ande we-ibmarmar-abinni, ¿bogi sigode? ¡Adi surbali!
7 Yar-matusulid-birigine, be-meged be omesisad,
yar-matusulidse be nakwisad,
agi bab-dummadsulidga ibmar-ogumakar-ukega be nakwisad.
8 Be-yawagak-daksiki, degi, e-suarmargine, bab-dummadyob-imaklemalad be nasiksad.
Be angi bangusad,
dule-baid-asabinni uka-swili be gwisgusad.
Be-meged-dummad-omesisadgine, be megisad.
Doamarbo be megbigusa, amarbo be igar nabosad.
Amarbo be megisgua, e-abgan be daksad.
9 Bab-dummad-Molocʼse be nanasad.
Ega be olivo-gwallu berbedii gusad,
be-ina-wawagan ega be omelosad.
Be be-nuggi-sunmakmalad dikasuli barmisad.
Amala, dule-burgwarmalad-burbase binsaed-amiega, be barmisad.
10 Bali-bali-nanaedba be yegus-inigwele,
degite, gwen be sogsasulid: ‘An wesegoye.’
Aka bur be gangusad.
A-ulale, gwen be galakussulid.
11 ”¿Doa be-ogwayisa?
¿Doa dobguega be-imaksa?
Emide, be an-yardakdiid.
Gwen be angi bar binsassurmalad.
Gwen bai be an-daksasurmalad.
¿Ar be an-dobsurmarsunde?
¿Ar an undar bogi-gudigusadba be deyob damarsunde?
12 Emisgi, an be-ibmar-imakedi an barsogoed,
gwen bega ibmar-nuedga guosulid.
13 Ar dule-be-bendakega be binnasuli gollalile,
we-ibmar-sobarmalad-bab-dummadyob-imaklemalad gwen be-bendakosulid.
Bela we-ibmarmala burwaba seledoed,
unnila buu-imakedgi yoggudoed.
Ar dule angi-bensuli guele, napaneg egadga guoed,
an-yala-islidikid na egadga suoed.”
Bukib-binsadimalad baisur-itoge imaked
14 Bab-Jehová sogded:
“Weyob sogdamaloed: ‘Igar-nudakmar, igar-nudakmar, igar-mesmar,
an-dulamar-idu igar-isgana nudakmar.’
15 Ar ade, ani an Bab-Dummad-degisadegu-maidid, an-nuga Isligwaledid, weyob an soged:
Ani an niba-maid, neg-isligwaledgi an maid,
degi, dulemar-bukib-binsadimaladgi, degi, gwage-eikwaa-imakmaladgi an burbar maibalid.
Adi, dulemar-gwage-eikwaa-imakmaladga niga-ogannogegar,
degi, dule-bukib-binsadimalad baisur-ito imakegar.
16 An degisadegu an-dulamargi gwisgudii guosulid,
degisadegu an amarse urwedii guosurbalid.
Ar degisulile, bela an dulemar-obinnisadi an-abin bergudo-itole.
17 Emar-isgued-ular, an ese ulusad.
An-urwedgine, an sabsur-imaksad.
An egi bangusgusad,
degi-inigwele, aka igar-isganaba bur nanadmalad.
18 E-damaladi, an daksad,
degi-inigwele, an ega nudakoed.
Idudii an guoed,
baisur-itoge an imakoed.
Degine, dule-ega-bukib-binsadimalad, 19 weligwaledgi weyob namakmalaga an imakoed:
‘Dikasuli-bukmaladga gwage-bogidik gusun,
degi, walikaa-bukmaladga gwage-bogidik gusun.’
An-dulamar an isgussulidyob-dakoed.
Ani, an Bab-Jehová-guedgi, deyob soged.
20 Ar dule-ibmar-isgana-imakmaladi, demar-arwemaiyob gued,
geg bogi meged.
Igi demar-arwemair, ibmar-isgana mie,
degi, ollimar-miardae,
deyob dule-isganamar gued.
21 An Bab-Dummadi soged:
‘Dule-isganamargala gwage-bogidikid sulid.’ ”