58
Mas-gunsuli-gudigued-Bab-Dummad-yeerdaked
1 Bab-Dummadi Isaíasʼga sogded:
“Gandikidba be binnasuli gole,
melle be bogguo,
gar-trompetaʼyob be binnasuli gole.
An-dulamarga e-nodiid be soge,
Jacob-waganga e-isgudiid be soge.
2 Ar bane-bane anse gordimalad,
dulemar igar-innikigwad-imakdiiyobi,
degi, An-Igar-Mesisadgi bangussurmalayobi,
An-Igar-Mamaid wisgubimalad.
Igar-inniki-imakleged anse egismalad,
ar anse walikgudabimalad.
3 Degi, ar anga weyob sogmalad: ‘¿Ar ibiga anmar mas-gunsuli bese-golega gudiguoe?
Ar bede aku-anmar-daked.
¿Ar ibiga anmar be-ular san-wiomarsunna?
Ar bede baisur anmar-dakbalid.’
”Bemar mas-gunsuli-gudigued-ibagi, mani-onogedgi be arbadamalad,
degi, dule-bega-arbamalad be sabsur-imakdedamalad.
4 Ar unnila bemar urwegala, degi, abin-abin-imakmalagala,
na sarsomalagala, be mas-gunsuli gudii damalad.
Ar be-itobi be an-abemalale, be mas-gunsuli-gudigued imakmardo.
Degi-inigwele, melle emi-imakedyobi be imako.
5 Weyob mas-gunsuli-gudiguedgi, ¿dule na dukin san-wiodii imakoye an sogsasi?
Nargammu-dopee-daklegedyobi, ¿nono-dullu-gudiguoye an sogsasi?
Gwage-naibid-oyogega, ¿wile-itoged-mor-yoi gudiguoye an sogsasi?
¿We be bimarsunde, mas-gunsuli-gudigued an yeer dakye?
Degi, ¿Bab-Jehová-iba-nued guye?
6 ”An-ular-mas-gunsuli-gudigued-iba an susadi, ¿igar-isgana obelogegarsursi?
¿Dule-sabsur-arbaega-imakleged onogegarsursi?
¿Dule-mesagwar-saledimalad bendakegarsursi?
Degine, ¿bela igar-isganaba-ebipiledimalad onogegarsursi?
7 Ar mas-gunsuli-gudiguedi, ¿dule-ukudmaada-gudiidga be-mas be ukegarsursi?
¿Dule-negsuli-gudimalad akwegarsursi?
¿Dule-morsatemaladga mor-ukegarsursi?
Degine, ¿melle be-gwenadgan-obanegarsursi?
8 Ar be weyob mas-gunsuli-gudigued imakele, igi-wakudar-dad-ibeler noardae, deyobi be guoed.
Boni-be-nikadi, yog-bega nugudoed.
Be-igar-inniki-imakedi bega igar egaoed,
gandikidba-an-yeerdaklegedi beba gudioed.
9 Be anse golele, an be-abinsaoed.
Be anse-bendakleged-egisele, an bega sogoed: ‘¡Wegi an gwichiye!’
”Dule-mesagwar-imaked-igargi be banguele,
dulegi-gwisgued-igargi be noele,
degi, yogasaar-emargi-gakansaedgi be banguele,
igi-negsichidgi neg-ibegwar-naddae, deyobi be-daedi naoed.
10 Dule-ukudmaada-gudimalad be bendakdele, degi, dule-ibmar-abesa-gudiidga be ibmar-ukdele,
igi-yoruku-neg-mee-dakledae, deyobi be-daedi guoed.
11 Ani an Bab-Jehová gusgu be-idudii guoed.
Nega-dinnaganba an bega mas-ukdii guoed,
an bega be-garmar ogannogoed.
Igi-dutugalu ogles-naidae, deyobi be guoed,
igi-ibe-aryomaidaedi, geg dii-bergue, deyobi be guoed.
12 Dikasurgus-neg-bibichismaladi gannar bemar soboed.
E-sailamar dikasurgus-mamaidi, ogannomaloed.
Be weyob bilemaloed: ‘Galu-matusurmalad-bibichisad-nudakmaladye,
negmar-bibichisad-gannar-sobmaladye.’ ”
Obunnoged-ibagi, obunnoged-igar
13 Bab-Jehová weyob soged:
“Obunnoged-ibagi be obunnodimalale,
gwen egi be nodisurmalale,
an-iba-islidikidgi be-itolegedba be ibmar-baigan-imaksulile,
be ani Jehováʼgine wergued amimaloed.
Weyob be obunnoged-iba-bimalale:
‘Weligwaled-ibaye.’
Degi, weyob be iba-islidikid-bimarbalile:
‘Bab-Jehová-nug-odummoged-ibaye.’
Be angine, wergued amimaloed.
Obunnoged-ibaga be bagagwar-gumalale,
mani-onogedgi-arbasulidgi be an-nug-odummomalale,
degine, walagwengi be-itolegedba-yogasaar-sunmaksulidgi be an-nug-odummomalale,
14 be angine, wergued amimaloed.
Neggwebur-e-dummaganga an be-imakmaloed,
degi, be-dad-Jacobʼba be ibmar-nikuoedgi be yeer itomaloed.”