1 Miaŋgö andöŋe Suepnöhök keu kun mötpiga kambu ketaŋi yeŋön köhöikŋanök saureŋ liŋet köla qetzei, mönö miaŋgö tandöktandök asuhui kewö jiget, “Anutu möpöseizin aleluya! Anutunöŋ amöt neŋguba neŋgömeiga yaŋgö buŋaŋi akzin. Anutuninan kukösum Toŋi aiga möpöseim waŋgiinga qetbuŋaŋambuk akza. 2  * Dut 32.43; 2 Kiŋ 9.7Anutunöŋ mönö keu ölŋaŋgö dop ambazip keuŋini kewöta diŋdiŋanök jim teköm neŋgimakza. Köna ketaŋi ambi serowilin aka mewö miaŋön ambazip gölme dop mem bölim eŋgiba malöhi, Anutunöŋ mönö yaŋgö keuŋi kewöta jim teköyök. Ambi miaŋön Anutugö nup meme ambazip eŋguiga sepŋinan eröhi, miaŋgö likepŋi mönö meleŋ waŋgiiga qakŋe öŋgöiga sihimbölö möta malja. Miaŋgöra Anutu möpöseim waŋgizin.”

3  * Ais 34.10Mewö jiba kunbuk qeta kewö jiget, “Ambi mi ohoget jeiga köwakŋan mönö nalö dop teteköŋi qahö wahöta öŋgömakŋa. Miaŋgöra Anutu möpöseim waŋgimakzin, aleluya!” 4 Mewö qeta jigetka Anutugö jitŋememe bohonŋi 24 aka bem jembon 4 mieŋön mönö bamgöba simin köla Anutu, jakömbuak dumŋe tatzawaŋgö waikŋi memba möpöseiba kewö qetket, “Keu mi ölŋa, aleluya!”

5  * Sum 115.13Mewö qetketka jakömbuak dumnöhök keu kun kewö asuhuyök, “Anutugö nup meme ambazip ketaŋi moröŋi jitŋi oŋgitpinbuköra keŋgötŋini mörakzei, iŋini mönö körek pakpak Anutunini möpöseiba malme.”

6  * Eze 1.24; Sum 93.1; 97.1; 99.1Keu mi asuhuiga keu kun mörali, mi kiaŋgö tandöktandök: Kambu ketaŋi yeŋön liŋet köla qet qerakzei aka o sianöŋ toŋgala kiniga ötöŋi asuhumakzawi aka wölpöndandaŋ ketaŋan qeiga giŋgururuŋ asuhumakzawi, keu mi mönö miaŋgö tandöktandök ewö asuhuiga kewö jiget, “Kembu Anutunini, kukösum pakpakö Toŋan mönö könahiba gölme dop galöm köl eŋgiba kiŋ Kembuŋina aka malma. Miaŋgöra Anutu möpöseizin, aleluya! 7 Lama moröŋaŋgö ambi buŋaŋan mönö marengö möta nanŋi mözözömgöba jöjöröm aŋguiga amqeiga ambi memegö nalöŋan mönö kam kuŋguiga maljin. Miaŋgöra neŋön mönö köiraŋ köla söŋgaiba Anutu möpöseim waŋgiinga qetbuŋaŋan sehimakŋa. 8 Anutunöŋ maluku tuat lalamŋi asakmararaŋambuk mi eŋgiiga löŋgötket.” (Maluku tuat lalamŋi mi ambazip sarakŋi yeŋgö ahakmeme solanŋaŋgö kaisöpsöpŋi, mönö miaŋgöreŋ löŋgöt aŋguget.)

9  * Mat 22.2-3Kambu ketaŋaŋgö tandöktandök mewö qeta jigetka Suep garata qambiŋambuk miaŋön mönö toroqeba kewö jii möral, “Keu ki mönö ohoman: Anutunöŋ ambazip eŋgoholiga Lama moröŋaŋgö maren (ambi memegö) lömbuaŋnöŋ kaŋgotmei, yeŋön mönö simbawoŋ akze.” Mewö jiba dumŋe kunbuk nöŋgöra kewö jiyök, “Keu mi mönö Anutugö keu öl töhönŋi akza.”

10 Suep garatanöŋ mewö jiiga nöŋön miaŋgöreŋök yaŋgö waikŋi memba möpöseim waŋgimamgö möta yaŋgö könaŋe simin köla sipköyalmö, nöŋgöra kewö jiyök, “Aek! Mewö kude akŋan. Gi aka göhö urumeleŋ alaurupkan Jisösgö könaŋi naŋgöba jiba malgetka welen qem eŋgimakzini, nöŋön mönö yeŋgöreŋök kun akzal. Jisösnöŋ Buŋa keu ölŋi indelöhi, miaŋgö ösumŋan mönö kezapqetok ambazip inahöm eŋgiiga Uŋa Töröŋaŋgö keuŋi möta jim sehiget. Miaŋgöra mönö Anutugöra sipköba waikŋi memba möpöseiba malman.” Mewö.

11  * Eze 1.1; Sum 96.13; Ais 11.4Nöŋön Suep aŋaŋiiga hos tuatŋi kun ekiga kayök. Qakŋe tariga kayöhaŋgö qetŋi mi Pöndaŋ Kinkin (Jembon oŋi nene) aka Azi Ölbölŋi. Qetŋi mewö qerakzei, yaŋön keu diŋdiŋi wuataŋgöba keu kewöta jim teköba miaŋgö dop bim qemakza. 12  * Dan 10.6Jeŋan könöp bölam tandök jeiga nöröpŋe ila jalö gwötpuk kölgetka qetŋi aukŋe ohohoŋa kayök. Qetŋi nanŋök mötzapmö, kunöŋ kun mi qahö mötza. 13 Malukuŋi sepnöŋ kusakusaholŋi mi löŋgöta kayök. Qetŋi qerakzei, mi Anutugöreŋ keu.

14 I wuataŋgöba kageri, mi Suep mirigö yarö azi kambuŋi kambuŋi. Yeŋön hosŋini tuatŋi eŋgömemba qakŋine tata malukuŋini tuat lalamŋi sarakŋi löŋgöta kaget. 15  * Sum 2.9; Ais 63.3; Joel 3.13; Ind 14.20Suahöŋinaŋgö numbuŋeyök bimgö sou ketaŋi (bainat) jitŋi zuluk alalŋambuk kunöŋ kayök. Mi kantriŋi kantriŋi eŋguba luhut al eŋgimapköra aka kayök. Yaŋön galömkölkölgö ain öröpŋan kantri dop qindiŋaiba galöm köl eŋgiba malma. Yaŋön Anutu kukösum pakpakö Toŋaŋgö wain joutŋi ketaŋi tözöhölma. Wain jout mi Anutugö irimsesewölŋi urupikŋambukö kaisöpsöpŋi akza.* Jisösnöŋ Anutugö irimsesewölŋi aka urupikŋi tözöhölmawi, keu miaŋgö könaŋi kewö: Nini siŋgisöndok ahinga Anutugö irimŋi seholiiga irimsesewölŋan qaknine öŋgöba ahöma. Toroqeba siŋgisöndok aka urunini qahö meleŋninga Anutugö irimŋan toroqeba seholiiga urupikŋambuk akŋa. Wain kösögö ölŋi pisikŋi (greip) miaŋgö kaŋgeŋi mi jout ketaŋe ala tözöhölgetka qösököiga oŋan dutŋaŋgö kinimŋe lalanöŋ geiga baket algetka miaŋgö uruŋe gemakza. Anutugö irimsesewölŋi aka urupikŋi miaŋgö söpsöpŋi mi wain kösögö ölŋi. Jisösnöŋ miaŋgö sihimbölöŋi möta tözöhöli geiga Anutugö uruŋan amöriba teköiga luai asuhuma. 16 Malukuŋe qetŋi kun ohogetka marömŋe kewö kinök, “Kiŋ yeŋgö Kiŋini aka azi kembu yeŋgö Kembuŋini.” Mewö.

17  * Eze 39.17-20Miaŋgö andöŋe Suep garata kun ekiga wehön jeŋe kinök. Euyaŋgöreŋ kinda köhöikŋanök qeta neiŋi neiŋi suep bibiŋi kutuba könakemba bölbölgöba anakzei, mönö körek mi eŋgohola kewö jiyök, “Iŋini mönö kame-e! Anutunöŋ közölömbuaŋ ketaŋi mözözömgöyöhi, mönö miaŋgöreŋ tokome. 18 Kaba tokoba kiŋ kembu, suahö galöm aka yarö azi yeŋgö busuŋini neme. Hos aka hos qakŋine tarakzei, mönö yeŋgö busuŋini neme. Ambazip körek yeŋgö busuŋini mönö kaba neme. Ambazip öŋgöŋgöŋi eretŋi, nanŋini nupŋini memakzei aka toŋinaŋgö welenŋini öne qemakzei, mönö körek mieŋgö busuŋini neme.”

19 Miaŋgö andöŋe jemnemba aka gölmeŋi gölmeŋi yeŋgö kiŋ kembuŋini mieŋön mönö yarö kambuŋini eŋguaŋgita kaba tokogetka eŋgehal. Kunöŋ hos qakŋe tata yarö kambuŋi yembuk kinöhi, mönö i tuarenjoŋ ak eŋgiba bim aubingöra tokogetka eŋgehal.

20  * Ind 13.1-18Augetka jemnemba memba jöhöget. Kezapqetok azi takapulakaŋi jemnembagö jitŋememba aŋgöletot aka malöhi, i mewöyök jemnembabuk memba jöhöget. Kezapqetok azi takapulakaŋan aŋgöletot aka miaŋön ambazip tosatŋi kewöŋi mi tilipköm eŋgiiga jaŋjuŋ aka malget: Ambazip jemnembagö supapŋi memba aŋgön kölgeri aka tosatŋan imutŋaŋgö waikŋi memba möpöseiba malgeri, mi mönö tilipköm eŋgiba malök. Etkömemba jöhöba gwölögwölö aköm etkigetka löm salfa kötkö könöp bölamŋan koasikpuk jemakzawi, mönö miaŋgö sianöŋ geyohot. 21 Geyohotka hos qakŋe taröhaŋgö numbuŋeyök bimgö sou ketaŋi (bainat) kayöhi, miaŋön mönö kiŋ kembu aka yarö azi pakpak mi eŋguiga kömuget. Kömugetka nei pakpak yeŋön kaŋgota busuŋini uba nemba nem timbireŋ aket. Mewö.