Carta a los Hebreos
Kjibokwo ëre tak hebreoga kong
Kjibokwo ëre sorë
Kjibokwo ëre tak beno pjang hebreoga mär Jesús go l̈i kong. Hebreoga l̈i, e kowëba Israel tjëyoga, e kowëba judíoga bakoe. Epga tjëyo kjrinaso, gueniyo kowëba obl̈ë obl̈ë eni.
Kjibokwo ëre taga ërë miydëy l̇l̇ëme. Kjone kjone tjl̈ẽ ga taga Pablorë l̈e. Kjone kjone tjl̈ẽ ga taga Bernabérë l̈e. Kjone kjone obi tjl̈ẽ ga taga Apolosdë l̈e. Gueniyo taga ërë miydëy yõtso l̇l̇ëme.
Eshko dbaryo ga hebreoga mär l̈öng Jesús go l̈i shdungoba ara. E kjĩshko ga kjone kjone Jesús rayë woydë, mär ber l̈öng kjok l̇l̇gwekkl̈o tara Moisésdë l̈i go iröng obi wl̈o. No kjone kjone to l̈öng tjl̈ẽ ga ëye döya Jesúsdë ga ä, ga woyde ga raye l̈e. E kjĩshko ga kjibokwo ëre taraba, epga dbokjrë e go wl̈o.
Dënashko ga Sbö tjl̈ẽno nopga kong ba tjl̈õkwo l̈agaga go, ba parkagaga kjok dogo so go bako, gueniyo eshko dbaryo ga tjl̈ẽno ba Wa Jesús go l̈i taraba ba kong. Dënashko ga Sbö tjl̈ẽ ba nopga kong ga l̇l̇ono ga tjl̈õkwo twe ba kong tjagl̈ën, ber pjl̈ú, tjl̈õkwo bäm go l̈i kjinmo l̈e, ga shäryara eni Jesús go l̈i taraba ba kong. Owa pjang bi go l̈i l̈ö̃ya Sbörë kjok l̇l̇gwekkl̈o tara Moisésdë l̈i kjĩshko l̇l̇ëm, gueniyo Jesús wol̈ono pjl̈araso, owa pjang bi go kës l̈i l̈ö̃ya Sbörë ber dret wl̈o, ga shji ie ber l̈öng pjl̈o bek ba bokso e kjĩshko ga pjl̈ú l̈i taraba ba kong. L̇l̇ëbo shäryara Jesúsdë bi kong l̈i kjĩshko ga shji äär Sbö bokshto kjok dogo ba pjl̈ú wl̈o l̈i taraba ba kong. Eni ga epga icharaba mär Jesús go jl̈õkoyo, l̇l̇ëbo wen ba kong owa gueniyo.
1
Sbö Wa, e tjwl̈õ ara, Sbö parkagaga kjok dogo so kjinmo
1 Dënashko ga Sbö tjl̈ẽno ba tjl̈õkwo l̈agaga obl̈ë obl̈ë kong, l̈e l̈ok bi tjl̈apgaga kong wl̈o. Tjl̈ẽno eni kop ara, ga tjl̈ẽno obl̈ë obl̈ë bakoe. 2 Gueniyo ga dbar pjir l̈ë dbaryo eerishko ga ba Wa ichara tjl̈ẽno bi kong om go shara. Ba Wa l̈i go ga kjok shäryara Sbörë uunkong, ga l̇l̇ono ga l̇l̇ëbo tjeng kës l̈i ber baĩya. 3 Ba dbo kãl̈ã, e so Sbö ĩ kjoyo, e so e kjoyo kjĩshko. L̇l̇ëbo kës tjeng ba wl̈oshko, ga iche ba tjl̈õkwo dbo ara l̈i go, srer l̇l̇ëm wl̈o. E wol̈ono, l̇l̇ëbo owa shäryara nopgarë l̈i potjwl̈ẽkkl̈o. E irgo ga öötong beno sök Sbö orkwo kël̈ëkong kjok dogo. 4 Eni ga öötong sök tjwl̈õ ara, Sbö parkagaga kjok dogo so kjinmo, ga ba ko tjwl̈õ ara ba kjinmo bakoe.
5 Miydëy eni, l̇l̇ëbo l̈ara Sbörë ba kong l̈i kjĩshko. Tjl̈ẽno ga
«Pja bor Wa;
eeri ga tja öötong beno sök bop Data.»* Salmo 2.7.
L̈ara eni ba Wa kong, gueniyo l̈ara ba parkagaga kjok dogo so kong eni l̇l̇ëme. Ga tjl̈ẽno obi ga
«Tja ber sök ba Data;
era ber sök bor Wa.»† 2 Samuel 7.14; 1 Crónicas 17.13.
6 Ga ba Wa l̈i ichara kjok ëre kjing goshko ga tjl̈ẽ ga
«Bor parkagaga kjok dogo so,
bor Wa, e poshrëzĩ uunkong.»‡ Deuteronomio 32.43.
7 Ga tjl̈ẽno ba parkagaga kjok dogo so kjĩshko. Tjl̈ẽno ga
«Ba parkagaga kjok dogo so,
e shäryara beno so pjl̈uk kjoyo,
so iök kjoyo bakoe.»§ Salmo 104.4.
8 Gueniyo tjl̈ẽno ba Wa kong ga
«Pja Sbö,
pja ber sök no pjl̈uyo ĩyado wl̈o,
ga kjok l̇l̇gwep beke.
9 L̇l̇ëbo pjl̈ú shäryëbashko ga pja wopjl̈ú eshko.
Gueniyo l̇l̇ëbo owa shäryëbashko ga pja woydë ara eshko.
E kjĩshko ga pja ioror beno sök wopjl̈ú,
bop pjeyoga l̈öng kës l̈i kjinmo.
Tja bop Sbö jl̈õkoyo.»* Salmo 45.6-7.
10 Ga tjl̈ẽno ba kong obi ga
«Tjl̈apga, kjok ëre dämärshko ga
kjok uunkong shäryaga pjarë,
kjopkwo, kl̈ung bakoe.
11-12 L̇l̇ëbo kës ëre pjir,
gueniyo pjara ber sök ĩyado.
Shwong këguëshko ga dbuy,
l̇l̇ëno ame kjĩshko.
Pja opshäryë l̇l̇ëbo kës ëre tjok eni wl̈eni.
Gueniyo pjara kjl̈opswë l̇l̇ëm,
pja ber sök ĩyado.»† Salmo 102.25-27.
13 Ga tjl̈ẽno ba kong obi ga
«Pja tek wl̈ar ber sök bor orkwo kël̈ëkong,
äär jong bop moskwoga zanor pjir guing,
eshko ga iër ber tjeng bop wl̈oshko.»‡ Salmo 110.1.
L̈ara eni ba Wa kong, gueniyo l̈ara ba parkagaga kjok dogo so kong eni l̇l̇ëme. 14 Epga sëyaga to l̈öng parkë Sbö kong eröe. Ga epga iche nopga där wl̈o l̈i kjimtë.