Carta a Filemón
Kjibokwo ëre tara Pablorë Filemón kong
Kjibokwo ëre sorë
Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Domer shäng kjl̈ara obi ko Filemón. Dënashko ga Jesús roy pjl̈ú l̈ara Pablorë ba kong, ga tjl̈õkwo kjrara. E kjĩshko epga jëk l̈öng ëng tjok pjl̈ú ĩyado.
Domer shäng kjl̈ara ko Onésimo. E Filemón parkaga tjwl̈ẽk shäng pjir wl̈eniyo. Pjl̈ara ga ba sogo l̈i l̇l̇ëbo l̈ũyotkara, ga töktong ey dwayo, jek öötong shäng Roma kjokyo. (Eshko dbaryo ga ëye l̇l̇ëbo l̈ũyotkono ga wl̈ẽkoba ga zrökoba jekdo.) Eshko dbaryo ga Pablo sök kjërshko Roma kjokyo, Jesús roy pjl̈ú l̈ara kjĩshko, tak pjang Hechos 28.16-31 go sorë l̈i eni. Eshko ga Jesús roy pjl̈ú l̈ara Onésimo kong, ga tjl̈õkwo kjrara. Eni ga jek woydë iröng ba sogo l̈i shwoy, l̇l̇ëbo shäryara owa l̈i l̇l̇gweya ba tjok wl̈o.
E kjĩshko ga kjibokwo ëre tara Pablorë Onésimo kong, söya jek ba sogo l̈i kong wl̈o, wl̈ẽpyotke wl̈o. L̇l̇ëbo pjl̈ú shäryara Jesúsdë Filemón kong ara, owa pjang ba go l̈i l̈öna beno dret l̈i l̈ara ba kong. Eni ga ichara l̇l̇ëbo owa shäryara ba parkagarë ba kong l̈i ie ber tjwl̈õ l̇l̇ëm, ga ber shäng wopjl̈ú ba tjok shara.
1
1 Kjibokwo ëre taga tja Pablorë, bi kjl̈ara Timoteo tjok. Tja sök kjërshko. Tja bängzak shäng jũshko, Cristo Jesús tjl̈õkwo kjĩshko.
Filemón, pja parkë shäng borwa tjok, ga pja woydërwa ara. Kjibokwo ëre ichërwa jek bop kong, 2 borwa dor Apia kong, borwa kjl̈ara Arquipo kong, Jesús tjl̈õkwo kjragaga tön l̈öng bop ushko l̈i kong bakoe. Arquipo parkë shäng Jesús kong borwa tjok.
3 Rokër bi Data Sbö kong, Tjl̈apga Jesucristo kong ga ba wopjl̈ú l̈i kjĩshko ga pjãy kjimte l̈ok ara, pjãy ie ber l̈öng wl̈ẽp bakoe.
Nopga woydara Filemóndë ara
4-5 Filemón, pja roy kuror ga pja mär shäng Tjl̈apga Jesús go, ba tjl̈õkwo kjragaga woydëp ara bakoe. E kjĩshko ga tja syõshtë Sbö kongshko ga pja woyotjl̈ĩn ga tja wopjl̈ú bor Sbö tjok bop kjĩshko. 6 Rokër Sbö kong ga pja kjimte jëk pjl̈ú tjl̈õkwo kjragaga l̈i tjok jek këgong, l̇l̇ëbo pjl̈ú twe Cristorë bi kong l̈i miydëp uunkong wl̈o. 7 Pja bor kjl̈ara. Tjl̈õkwo kjragaga l̈i kjimtëp ara, ga epga l̈öng wopjl̈ú bop kjĩshko. E kjĩshko ga tja wopjl̈ú, woowa l̇l̇ëme.
Pablo tjl̈ẽno Onésimo kjĩshko
8-9 E kjĩshko ga l̇l̇ëbo rokër bop kong. Tja kong dbo twara Cristorë kjĩshko ga pja ichër ba shäryë dbo goshko ga pjl̈úe. Gueniyo ga shji ëng woydë ara kar kar kuzong ga pja ichër woydë eni l̇l̇ëme. Tja tjl̈abl̈a tjän, ga tja bängzak shäng kjërshko, Cristo Jesús tjl̈õkwo kjĩshko. 10 Eni ga l̇l̇ëbo rokër bop kong Onésimo* Grecia so tjl̈õkwo Onésimo, e tjwl̈õ ara l̈okl̈o. kjĩshko. Tja sök kjërshko, orkwo kjrochak pjir dröng sho goshko wopro ga e Jesús tjl̈õkwo kjrono, ga beno bor wa wl̈eni e kjĩshko. 11 Dënashko ga sök bop tjokshko ga e bop kong ga l̇l̇ëno l̇l̇ëme. Gueniyo eerishko ga e beno tjwl̈õ ara bop kong shara, tjwl̈õ ara bor kong bakoe.
12 E ichër jek bop kong iröng obi, woydër ara bor wa wl̈eni gueniyo. 13 Tja bängzak shäng Jesucristo tjl̈õkwo roy pjl̈ú l̈i kjĩshko. Eni ga pja shäng jũshko kjwe ga miydër ga tja kjimtëp. E kjĩshko ga woydoror ga e ber sök bor tjok bop ãska. 14 Gueniyo ga shäryër eni l̇l̇ëme. E bopoya kjĩshko ga l̇l̇ëbo shäryër woydë ba tjok l̇l̇ëm, kjakrokër bop kong guing. Tja kjimtëpshko ga woydër ga shäryëp bop woshko, pja ichoror ba shäryë dbo go kjĩshko l̇l̇ëme.
15 Tja wotjl̈ĩk ga töktong bop ushko dwayo dbar kjwöbö ga pjl̈úe l̈ër. Eerishko ga äär iröng ber sök bop tjok ĩyado wl̈o shara. 16 Ber bop parkaga tjwl̈ẽk shäng pjir wl̈eniyo dö ame, ber bop kjl̈ara, woydëp ara wl̈eniyo bakoe. Tja omwoydë ara, gueniyo ga woydër ga pja omwoydë e kjinmo. Ber bop parkaga dö ame, ber bop kjl̈ara bako, mär shäng Tjl̈apga Jesús go kjĩshko. Woydër ga pja omwoydë ara e kjĩshko.
17 Eni ga bop kong ga tja bop kjl̈ara l̈ëp wl̈eni ga Onésimo wl̈okjrëp, tja wl̈okjrorop wl̈eni. 18 L̇l̇ëbo shäryara bop kong owa, pogo tjwl̈õ bop kong wl̈eni ga ba tjwl̈õ l̈i rokëp ba kong l̇l̇ëm, rokëp bor kong dey. 19 Tja Pablo, tjl̈õkwo ëre tër bop kong bor orkwo om go go shara. Pogo tjwl̈õ bop kong kjöme l̈i tjwl̈ẽngga tjarë bop kong. Pja döktong, tjl̈õkwo l̈oror bop kong l̈i kjĩshko. E kjĩshko ga pja pogo tjwl̈õ bor kong ara bakoe. Gueniyo woyoshrër woydë bop kong l̇l̇ëme. 20 Pja bor kjl̈ara. Ga shji töno beno tjeng Cristo tjok kjĩshko ga l̇l̇ëye rokër bop kong l̈i shäryos bor kong eni. Eni ga tja ber wopjl̈ú eshko. 21 Miydër ga l̇l̇ëye rokër bop kong l̈i, e shäryëp eni. Miydër ga shäryëp e kjinmo bakoe. Kjibokwo ëre tër bop kong e kjĩshko.
22 L̇l̇ëbo rokër bop kong kjrina obi. Pja syõshtë Sbö kong ga tja kjimte äär eshko iröng obi. Ga tja kong shto wl̈ẽp kjrina, tja äärshko ga tja ber sök kjone shtoyo tjok wl̈o.
Kjibokwo pjirzl̈ong
23 Bor kjl̈ara Epafras, «¿Pja yonde?» l̈e bop kong. E shdung shäng bor tjok ëreshko, Cristo Jesús tjl̈õkwo kjĩshko. 24 Marcos, Aristarco, Demas, Lucas, «¿Pja yonde?» l̈e l̈ok bop kong bakoe. Tja kjimte l̈ok bor pak shäryë.
25 Rokër Tjl̈apga Jesucristo kong ga ba wopjl̈ú l̈i kjĩshko ga pja kjimte ara.