1 ད་ནི་ང་རང་ཐེངས་གསུམ་པར་ཁྱོད་ཅག་གི་གམ་དུ་ཡོང་བ་ཡིན་ལ། མི་གཉིས་གསུམ་ཞིག་གི་ངག་ལས་བདེན་དཔང་བྱེད་པར་བརྟེན༌ནས། ཚིག་རེ་རེ་བཞིན་གཏན་ལ་དབབ་དགོས་ཞེས་པ༌ལྟར། 2 བདག་གིས་སྔོན་ཆད་སྨྲས་མྱོང་ཞིང་ད་ལྟ་ང་རང་ཁྱོད་ཅག་གི་གམ་དུ་མེད༌ནའང༌། བདག་གིས་ཐེངས་གཉིས་པར་ཁྱོད་རྣམས་མཐོང་བའི་དུས་སུ་སྨྲས་པ༌བཞིན། སྡིག་པའི་ལས་བྱེད་མཁན་དང་མི་གཞན་ཐམས་ཅད་ལ་འདི་ལྟར༌སྨྲ་བར་བྱ༌སྟེ། ང་རང་ཡང་བསྐྱར་ཡོང་བ༌ན། བཟོད་པ་སྒོམ་པར་མི་བྱེད་ཅེས༌པའོ།། 3 རྒྱུ་མཚན་ནི་ཁྱོད་ཅག་གིས་སྐྱབས་མགོན་མཱ་ཤི་ཀས་བདག་གི་སེམས་ནང་ནས་གསུངས་པའི་དཔང་རྟགས་འཚོལ་བའི་ཕྱིར་རོ།། སྐྱབས་མགོན་མཱ་ཤི་ཀ་ནི་ཁྱོད་ཅག་གི་ཆ་ནས་གཉོམ་ཆུང་མ་ཡིན་པར་ནུས་མཐུ་ཆེན་པོ་མངའ་བ་ཡིན། 4 ཁོང་ནི་གཉོམ་ཆུང་གི་ངང་ནས་ཤིང་རྒྱ་གྲམ་གྱི་སྟེང་དུ་བརྡབས༌ནའང༌། དཀོན་མཆོག་གི་ནུས་མཐུ་ཆེན་པོར་བརྟེན་ནས་ད་དུང་སྐུ་གསོན༌པོར་བཞུགས། ངེད་ཅག་ཀྱང་ཁོང་གི་ནང་ནས་གཉོམ་ཆུང་ཡིན༌མོད། འོན་ཀྱང་དཀོན་མཆོག་གིས་ཁྱོད་ཅག་ལ་བསྟན་པའི་ནུས་མཐུ་ཆེན་པོའི་དབང་གིས། ངེད་རྣམས་ནི་སྐྱབས་མགོན་མཱ་ཤི་ཀ་དང་ལྷན་དུ་གསོན༌པར་འགྱུར་རོ།།

5 ཁྱོད་རྣམས་ཀྱིས་རྟག་པར་རང་ཉིད་དད་པའི་ནང་དུ་ཡོད་མེད་ལ་བརྟག༌དགོས་ཤིང༌། རང་གིས་རང་ལ་ཚོད་ལྟའང་བྱ་འོས་སོ།། ཁྱོད་ཅག་ནི་ཚོད་བགམ་ཐེག་མི་ཐུབ་པ་ཡིན༌པ་མ་གཏོགས། ཁྱོད་ཅག་གི་སེམས་སུ་ཡེ་ཤུ་མཱ་ཤི་ཀ་བཞུགས་ཡོད་པ་མི་ཤེས༌སམ། 6 ཁྱོད་རྣམས་ཀྱིས་ངེད་ཅག་ནི་ཚོད་བགམ་མི་ཐེག་པའི་མི་མ་ཡིན་པ་ཤེས་པའི་ཕྱིར་བདག་གིས་རེ་བ་བྱེད། 7 ཁྱོད་ཅག་གིས་ལས་ངན་པ་ཅི་ཡང་མི་བྱེད་པའི༌ཕྱིར། ངེད་ཅག་གིས་དཀོན་མཆོག་ལ་གསོལ་བ་འདེབས། འདི་ནི་ངེད་ཅག་ཚོད་བགམ་ཐེག་ཐུབ་པའི་མི་ཡིན་པ་མངོན་པའི་ཆེད་དུ་མ་ཡིན༌པར། ཁྱོད་ཅག་གི་སྤྱོད་ལམ་དྲང་པོ་བྱེད་པའི་ཆེད་དུ་ཡིན༌པས། མི་གཞན་དག་གིས་ངེད་ཅག་ཚོད་བགམ་མི་ཐེག་པར་འདོད་ནའང་རུང༌། 8 ངེད་ཅག་གིས་རྟག་ཏུ་བདེན་པ་སྐྱོང་བ་ལས་བདེན་པ་ལ་ངོ་རྒོལ་བྱེད༌མི་ནུས། 9 ངེད་ཅག་གཉོམ་ཆུང་ཡིན༌ནའང་ཁྱོད་ཅག་སྟོབས་ཅན་ཡིན་ན་ངེད་ཅག་དགའ། ངེད་ཅག་གི་རེ་སྨོན་ནི་ཁྱོད་རྣམས་མི་ཡོངས་སུ་རྫོགས་པ་ཞིག་ཏུ་འགྱུར་བ་དེ་ཡིན་ནོ།། 10 དེའི༌ཕྱིར། ང་རང་ཁྱོད་ཅག་གི་གམ་དུ་མེད་པའི་དུས་སུ་ཁྱོད་རྣམས་ལ་དོན་འདི་དག་བྲིས་པ༌ནི། ང་རང་ཁྱོད་ཅག་དང་འཕྲད་པའི་དུས༌སུ། གཙོ་བོས་བདག་ལ་གནང་བའི་དབང༌ལྟར། བདག་གིས་ཁྱོད་རྣམས་ལ་བཙན་སྐུལ་བྱེད་མི་དགོས་པའི་ཕྱིར་ཡིན༌ལ། དབང་དེ་ནི་མི་རྣམས་ཉམས་དམས་སུ་གཏོང་བའི་ཕྱིར་མ་ཡིན༌པར། མི་རྣམས་སྐྱེད་སྲིང་བྱེད་པའི་ཆེད་དུ་གནང་བ་ལགས༌སོ།།

11 སྤུན་ཟླ་རྣམས། མཐར་ཁྱོད་རྣམས་དགའ་ཞིང་སྤྲོ་བར༌གྱིས། ཁྱོད་ཅག་ནི་མི་ཡོངས་སུ་རྫོགས་པ་ཞིག་བྱེད་པ༌དང༌། སེམས་གསོ་ཐོབ་པ། བློ་སེམས་མཐུན༌པ། ཕན་ཚུན་འགྲིག་མཐུན་ཡོང་བ་བཅས་བྱེད་པར༌གྱིས། དེ་ནས་བྱམས་པ་དང་ཞི་བདེ་མངའ་བའི་དཀོན་མཆོག་ནི་ཁྱོད་རྣམས་དང་ལྷན་དུ་བཞུགས་ངེས༌སོ།།

12 ཁྱོད་ཅག་གིས་ཕན་ཚུན་བར་དུ་དམ་པའི་འོ་བྱས་ནས་འཚམས་འདྲི་ཞུ་བར༌གྱིས། 13 དད་ལྡན་དམ་པ་མཐའ་དག་གིས་ཀྱང་ཁྱོད་ཅག་ལ་འཚམས་འདྲི༌ཞུའོ།།

14 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ༌དང༌། དཀོན་མཆོག་གི་བྱམས༌པ། དམ་པའི་ཐུགས་ཉིད་ཀྱི་འབྲེལ་འདྲིས་བཅས་ནི་ཁྱོད་ཅག་ཐམས་ཅད་དང་མཉམ་དུ་བཞུགས་པར༌སྨོན།། །།