1 དེ་ཡང་སྐུ་ཚབ་པ་ཕོལ་ལོལ་ང་རང་ནི་མི་དང་མིའི་རྐྱེན་ལ་བརྟེན་ནས་སྐུ་ཚབ་པར་གྱུར་པ་ཞིག་མིན༌པར། ཡེ་ཤུ་མཱ་ཤི་ཀ་དང་ཁོང་ཉིད་གྲོངས་པ་ནས་སླར་གསོན་པར་མཛད་པའི་ཡབ་དཀོན་མཆོག་གིས་སྐུ་ཚབ་པར་བསྐོས་པ་ཞིག་ཡིན། 2 བདག་དང་མཉམ་དུ་ཡོད་པའི་སྤུན་ཟླ་རྣམས་ཀྱིས་ག་ལད་ཡཱ་ཡུལ་གྱི་ཆོས་ཚོགས་སོ་སོར་སྤྲིངས་པའི་འཕྲིན་ཡིག་འདི་ལྟ༌སྟེ། 3 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན། 4 སྐྱབས་མགོན་མཱ་ཤི་ཀས་བདག་ཅག་གི་ཡབ་དཀོན་མཆོག་གི་ཐུགས་དགོངས༌བཞིན། བདག་ཅག་གི་སྡིག་པའི་ཕྱིར་རང་སྲོག་བློས་བཏང༌སྟེ། བདག་ཅག་བསྐལ་པ་ངན་པ་འདི་ལས་སྐྱོབ་པར་མཛད༌པས། 5 དཀོན་མཆོག་ལ་ཇི་སྲིད་བར་དུ་བསྟོད་བསྔགས་བརྗོད་པར༌བྱའོ།། ཨ༌མེན།

6 སྐྱབས་མགོན་མཱ་ཤི་ཀའི་ཐུགས་རྗེ་བརྒྱུད་ནས་དཀོན་མཆོག་གིས་ཁྱོད་རྣམས་ལ་ཞལ་འབོད་གནང༌ཡང༌། ཁྱོད་རྣམས་ཀྱིས་འདི་ལྟར་མགྱོགས་མྱུར་ངང་ཁོང་ཉིད་རིང་དུ་དོར་ཏེ་འཕྲིན་བཟང་གཞན་ལ་བློ་ཕྱོགས་པར་ང་རང་ཧ་ལས༌བྱུང་། 7 དོན་དམ་དུ་དེ་ནི་འཕྲིན་བཟང་མ་ཡིན༌ཏེ། མི་ལ་ལས་ཁྱོད་རྣམས་ལ་གནོད་འཚེ་བཏང་ནས་སྐྱབས་མགོན་མཱ་ཤི་ཀའི་འཕྲིན་བཟང་ལ་བཟོ་བཅོས་བྱ་འདོད༌པ་ཡིན་ནོ།། 8 འོན༌ཀྱང༌། ངེད་ཅག་གམ་ནམ་མཁའི་ཞིང་ཁམས་ནས་ཕེབས་པའི་ཕོ་ཉ་གང་ཞིག་ཡིན༌ཡང༌། སྔོན་ཆད་ངེད་ཅག་གིས་བསྒྲགས་པའི་འཕྲིན་བཟང་དང་མི་འདྲ་བའི་འཕྲིན་བཟང་གཞན་ཞིག་ཁྱོད་རྣམས་ལ་སྒྲོག་པ་ཡིན༌ན། དེ་ལ་དམོད་མོ་ཐེབས་པར་གྱུར༌ཅིག 9 ངེད་ཅག་གིས་དེ་སྔར་སྨྲས་པ་བཞིན་ད་ལྟ་ཡང་སྨྲ་བར་བྱ༌སྟེ། སུ་ཞིག་གིས་ཁྱོད་རྣམས་ལ་འཕྲིན་བཟང་བསྒྲགས༌ཀྱང༌། དེ་ནི་ཁྱོད་ཅག་ལ་ཐོབ་པའི་འཕྲིན་བཟང་དང་མི་མཐུན༌ན། མི་དེ་ལའང་དམོད་མོ་ཐེབས་པར་གྱུར༌ཅིག 10 ད་ལྟ་བདག་གིས་མི་རྣམས་ཀྱི་སེམས་དགའ་བར་བྱེད༌དམ། ཡང་ན་དཀོན་མཆོག་གི་ཐུགས་དགྱེས་པར་བྱ། བདག་གིས་ད་དུང་མི་རྣམས་དགའ་བར་བྱེད་འདོད་པ་ཡིན༌ནམ། གལ་ཏེ་བདག་གིས་ད་དུང་མི་རྣམས་དགའ་བར་བྱེད་འདོད་པ་ཡིན་ན། ང་རང་ནི་སྐྱབས་མགོན་མཱ་ཤི་ཀའི་ཞབས་ཕྱི་པ་མ་ཡིན༌ནོ།།

11 སྤུན་ཟླ༌རྣམས། ངས་ཁྱོད་རྣམས་ལ་ཤེས་སུ་འཇུག་པར་འདོད་དེ། བདག་གིས་སྔར་ཁྱོད་རྣམས་ལ་བསྒྲགས་པའི་འཕྲིན་བཟང་དེ་ནི་མིའི་བློ་ལས་བྱུང་བ་མ་ཡིན་ནོ།། 12 ཅིའི་ཕྱིར་ཞེ་ན། འཕྲིན་བཟང་དེ་ནི་མི་ལས་ཐོབ་པ་མིན༌ལ། མིས་བདག་ལ་ཁྲིད་སྟོན་བྱས་པའང་མ་ཡིན༌པར། བདག་ལ་ཡེ་ཤུ་མཱ་ཤི་ཀ་མངོན་པའི་སྒོ་ནས་ཐོབ་པའི་ཕྱིར༌ཡིན། 13 བདག་གིས་སྔོན་ཆད་ཡ་ཧུ་དཱའི་མི་རིགས་ཀྱི་ཆོས་ལུགས་ལ་དད་པ་བྱེད༌དུས། སྤྱོད་ལམ་ཅི་འདྲ་ཡིན་པ་དང་ཐབས་གང་ཡོད་ཀྱིས་དཀོན་མཆོག་གི་ཆོས་ཚོགས་ལ་ཇི་ལྟར་གཉའ་གནོན་ཚད་མེད་བྱས་པ༌དང༌། དེ་འཇོམས་པར་འབད་མྱོང་བ་ནི་ཁྱོད་ཅག་གིས་ཀྱང་ཐོས་པ་ཡིན། 14 བདག་ནི་ཡ་ཧུ་དཱ་པའི་ཆོས་ལུགས་ཀྱི་ཁྲོད༌དུ། རང་རིགས་ཀྱི་ན་ཟླ་མང་པོ་ལས་ཡ་ཧུ་དཱ་པའི་ཆོས་གཞུང་གི་ཡོན་ཚད་མཐོ༌ཞིང༌། རང་གི་ཕ་མེས་ཡང་མེས་ཀྱི་ལུགས་སྲོལ་ལའང་ལྷག་ཏུ་བརྩོན་པ་བྱས་མྱོང༌ངོ་།། 15 འོན༌ཀྱང༌། དཀོན་མཆོག་གིས་ང་རང་མའི་མངལ་དུ་ཡོད་པ་ནས༌བཟུང༌ལོགས་སུ་བཀར་ཞིང་། ཁོང་གི་ཐུགས་རྗེས་ང་རང་ལ་ཞལ་འབོད་གནང་བ༌དང༌། 16 ངས་སྐྱབས་མགོན་ཡེ་ཤུ་ཕྱི་ཕྱོགས་པ་རྣམས་ལ་སྒྲོག་པའི༌ཕྱིར། དཀོན་མཆོག་གིས་ཐུགས་དགྱེས་པའི་ངང་ནས་རང་ཉིད་ཀྱི་སྲས་བདག་གི་སེམས་སུ་མངོན་པར་མཛད་པ༌ན། ངས་དོན་འདི་ཤ་ཁྲག་ལྡན་པའི་མི་རྣམས་ལ་གྲོས་མ་བྱས༌ཤིང༌། 17 ཡར་ཡེ་རུ་སཱ་ལེམ་དུ་བདག་གི་སྔོན་ལ་སྐུ་ཚབ་པར་གྱུར་པ་དེ་རྣམས་ཀྱི་དྲུང་དུའང་མ་སོང༌བར། ཨ་རབ་ཡུལ་ཁོ་ནར་སོང་བ་དང་དེ་ནས་སླར་ཡང་དཱ་མེ་སེག་ཏུ་ལོག་པ་ཡིན༌ནོ།།

18 དེ་ནས་ལོ་གསུམ་འགོར༌རྗེས། ང་རང་ད་གཟོད་ཡར་ཡེ་རུ་སཱ་ལེམ་དུ་སྐུ་ཚབ་པ་ཀེ་ཕཱ་ལ་ངོ་འཕྲད་དུ་སོང་ནས་ཁོ་དང་མཉམ་དུ་ཉིན་བཅོ་ལྔར་བསྡད༌དོ།། 19 དེ་རུ་སྐྱབས་མགོན་ཡེ་ཤུའི་ནུ་བོ་ཡ་ཀོབ་ལས་སྐུ་ཚབ་པ་གཞན་སུ་ཡང་མ་མཐོང༌། 20 བདག་གིས་ཁྱོད་རྣམས་ལ་བྲིས་པ་འདི་ནི་རྫུན་གཏམ་མིན༌ཏེ། ངས་དཀོན་མཆོག་གི་སྤྱན་སྔར་སྨྲས༌པ་དང་། 21 དེའི་རྗེས༌སུ། ང་རང་སིར་ཡཱ་དང་ཀི་ལིག་ཡཱ་ཡུལ་དུ་སོང༌བ་ཡིན། 22 དུས༌དེར། ཡ་ཧུ་དཱའི་ཡུལ་དུ་སྐྱབས་མགོན་མཱ་ཤི་ཀའི་ནང་དུ་ཡོད་པའི་ཆོས་ཚོགས་སོ་སོས་ང་རང་མཐོང་མ་མྱོང༌ཡང༌། 23 སྔོན་ཆད་བདག་ཅག་ལ་གནོད་འཚེ་བྱེད་མཁན༌དེས། ད་ལྟ་ཁོས་དེ་སྔར་འཇོམས་པར་འབད་པའི་ཆོས་དེ་སྒྲོག་གིན་འདུག་ཅེས་སྨྲས་པ་ཐོས་ཤིང་། 24 དེ་རྣམས་ཀྱིས་ཀྱང་བདག་གི་རྐྱེན་གྱིས་དཀོན་མཆོག་ལ་བསྟོད་བསྔགས་བརྗོད༌དོ།།