1 Ab o si t‑tatchua g Jiosh. Kutt am oidch hab wo t‑junihid nach pi d aꞌaligaj. 2 Christ o am hab junihim g e‑ohg Jiosh tatchui ch ab si t‑tatchua ch am t‑wehhejed e muhkid. Kutt ahchim hab waꞌap ab aigo wo si tatchuad ch ab aꞌai wo si t‑tatchuad.

3 Dach Jiosh hemajkamga. K pi hab chum mahs machs wo ha wehm woꞌiwua matp hedai pi d t‑wehm kihkam o achs wo chegito g s‑uam haꞌichu o achs wo s‑behim matp haschu pi ab hu d t‑wuikam. 4-5 S‑mahch am mat pi am hu wo i ha wahpki g Jiosh hegam mo hab wa masma. Hegai mat wo s‑behim mo haschu pi ab hu d wuikamaj o heg jioshchud. (4) K pi hab chum mahs machs s‑bihtagim wo neneokad o achs pehegi wo neneokad. Ab g wo hoꞌigeꞌidad g Jiosh.

6 Haꞌi oki hab kaij mo am wa s‑apꞌe hegam mo hab masma hab e junihim. Kumt wabshaba pi ab hu wo kaiha g pehegi ha‑neꞌoki. Jiosh at hemho wa s‑koꞌokam wo ha namkid hegam mat pi ab hu wo s‑wohog el. 7 An g hu wabsh wo ha neidad hegam hab mahs hemajkam ch pi am hu ha oidch hab wo e junihid.

8 Ahpim amsh hab waꞌap masma heki hu. Heg o wa wepo mam wa am s‑chuhugam k ed hihimad ch am hahawa i wuwha tonlig ch ed namt pi hahawa s‑mai g t‑kownalig Jesus Christ. Pegih, mt am wo hihimad g e‑doakag id eda s‑apꞌekam tonlig 9 ch hab masma hab wo junihid g s‑apꞌekam ch wo ahgad g wohokam. 10 T g t‑kownalig Jesus wo s‑hohhoꞌidad hegai mam haschu hab wua. 11-12 Pi amt am hu wo ha wehmajk hegam mo hab junihim g pi apꞌekam. Dat wo s‑ta edam haꞌichuk mamt chum hems heg ab wo neneokad mo haschu s‑aꞌagi hab wua idam. Kumt wabshaba wo ha ahgi mo pi ap hab e junihim. 13-14 T haha wo s‑e mahchk mo has chuꞌig. Bo d ahga ihda cheꞌidag mo hab chuꞌig:

15 Am g wo si s‑e nenꞌoidk mamt has masma wo himchudad g e‑doakdag ch pi hab wo masmak mam d wabsh pi haꞌichu aꞌamichuddam. 16 Geꞌej o g pi apꞌekam hemu. K wabshaba g Jiosh ab t‑mahkch g apꞌedag matt hab wo junihid g s‑apꞌekam. Am g s‑ap wo hekaj g e‑apꞌedag. 17 Jiosh o am em‑wui tashogid g e‑tatchui. Am g wo si i aꞌamichud k wo s‑mai mo haschu wud.

18 Pi g wo nawkkad namt pi heg hekaj wo padch g e‑doakag mamt pi wo e doꞌibia. Am g wehs wo i e dagitokchid Hekia S‑apꞌekam Gewkdag wui. T heg an wo em‑uꞌukchid ch ab wo em‑mahkchid g si geꞌe s‑ap tahhadkam. 19 Kumt hab ab aꞌai wo i e gewkemhunad ch ab wo ihmad g Jiosh g heki hu mihshmda nenꞌeikaj ch wechij mihshmda nenꞌei 20 ch chum hekid ab wo hoꞌigeꞌidad g Jiosh t‑ohg wehs haꞌichukaj am chehchegch g t‑kownalig Jesus Christ.

21 Ab g aꞌai wo i e dagito e wui mamtp woho ab si has elid g Christ.

22 Ahpim uꞌuwi amt ab wo i e dagito e‑kuhkun ha wui. Id o ab d em‑wuikam nam pi d Christ wohochuddam. 23 Kun o gewkdag am dahm g e‑hohnig hab masma mo g Christ gewkdag am t‑dahm ahchim mach ab ihm ch ab si hiwig. Ahchim ach heg wa wepo mach d honshpadaj. K heg d t‑doꞌibiakam. 24 Ab att wehs wo i chum t‑dagitokch wui. Kumt ahpim uꞌuwi hab wa masma wehs ab wo i chum e dagitokch e‑kuhkun ha wui.

25 Ahpim chechoj amt hab masma ab wo si ha tatchuad g e‑hohonig mo g Christ ab si t‑tatchua. Heg o haꞌas geꞌe ab si t‑tatchua mat am t‑wehhejed e dagito mamt wo mua. 26 Bat wa e juh mat hekaj wo t‑wapkon k gam hu hab wo i juh g pi ap t‑chuꞌijig ahchim mach ab s‑wohochud ch ab hiwig. Kut hab wa masma ab i t‑gawulkai 27 e wehhejed matt d wo hekia s‑apꞌekam enigajk. 28 Kumt ahpim chechoj ab wo si ha tatchuad g e‑hohonig hab masma mam ab si hejel e tatchua no pi heg wa wepo mam d hemako e wehm. Hejel e hekaj o si pihk e elid matp hedai g e‑hohnigkaj si pihk e elid no pi d waꞌi hemako. 29-30 Pi o hekid hedai hejel s‑e kehꞌid ch wabshaba am i e nakog mat wo e gegosidad ch wo e nuhkudad. Kuch ahchim wohochuddam heg wa wepo mach d honshpadaj g Christ nach pi wehmaj d hemako. K heg s‑ap t‑nuhkud. 31 Kumt ahpim chechoj hab wa masma hab wo ha juhkchid g e‑hohonig no pi hab chuꞌig g Jiosh oꞌohana: