1 Ab o em‑ab ahpim aꞌal mamt ab wo s‑ha wohog elidad g e‑jehj no pi id d Christ tatchui ch d s‑apꞌekam em‑wehhejed. 2-3 Bo chuꞌig g Jiosh heki hu oꞌohana:

4 Ahpim jehj amt pi wabsh wo si s‑gewkam ha shohbidad g e‑aꞌaliga mamt wabsh wo ha babgach. Do Jiosh tatchui mamt am wo i ha mashcha ab amjed g Christ hab masma mam ha gegosid k ab wo i ha shohbi pi apꞌekam amjed.

5 Ahpim nenehol amt ab wo s‑wohog ha elidad g e‑aꞌamo ch ab wo si has ha elidad ch ab si e‑tatchui amjed hab wo junihid g e‑chikpan hab masma mamtp hems g Christ hab masma wo chikpandad 6 ch d wo piongajk. Pi amt hab wabsh wo junihid mas heg hekaj wo em‑neidad g em‑ahmo ch wo s‑em‑hohhoꞌidad ch wabshaba hab wo junihid wehs g e‑ihbdagkaj, chum as hems pi am hu wo em‑neidad. Id o em‑tatchuidch g Jiosh. 7 Kumt s‑ap e tahtk k am hab wo junihid g e‑chikpan nam pi g Jiosh ep chikpanid ch pi heg waꞌi oꞌodham. 8 Mt wo s‑chegitok mat g Jiosh ab uhpam wo i nodagi g em‑namkidadag mamt haschu i s‑kehg chikpan hab wo juh, chum ams hems d wo neholk o pi d wo neholk.

9 Ahpim mam d aꞌamo amt wo s‑ap i ha nuhkudad g e‑pionag ch pi wo ha ebkiodad. Am g wo s‑chegitok mam e wehm ahmo an dahm kahchim ch ed. Kut ihda ahmo wehs t‑wepo masma wo t‑lodai.

10 Hemako haꞌichu ant hab ep wo chei. Ab g wo i e gewpkadch Jesus t ab no pi heg ab em‑mahkch g geꞌe gewkdag. 11 Ab g wo i hekaj hegai mo haschu g Jiosh ab em‑mahkch k hab wo e nako mamt ab wui wo gegokiwua g ge Jiawul s‑aꞌagi cheggiadag. 12 Pi ach g hemajkam ha cheggia ch wabshaba hegam ha cheggia mo d si pi apꞌekam gewpkdag in t‑dahm ch ha‑kokownalig ch ha‑hahaꞌichuga ch g jijawul. 13 Mt heg hekaj ab wo si i hekaj g Jiosh gewkdag mamt wo e nahtokch hemu ch wo e nako mamt ab wui wo gegokiwua g pi apꞌekam mat hekid ab wo i em‑cheggia. Kut pi wo shaꞌi i em‑shul.

14 Neh, mt wo si e nahtokchid wehhejed ihda cheggiadag. An g wo uꞌukchid g wohokam. T id heg wo wa wepok mo g cheggiakud giwud.

Am g hab wo waꞌi junihid g s‑apꞌekam. T id heg wo wa wepok mamt ab hab juh g wainomi lihwa.

15 Mt wo e nahtokchid mamt wo i ahgahi ihda s‑kehg haꞌichu ahga mo g Jiosh s‑ha doꞌibiamk. T id heg wo wa wepok mamt ab cheka g e‑shuhshk.

16 Jiawul o chum s‑em‑padchudamk hab sha masma mat wo ha mehi g hahpod k hekaj wo em‑mummu. Mt wabshaba s‑wihnam wo uꞌukchid g e‑wohochudadag hab wa masma mamt g kawad am e tahgio wo ulinichid. T hab pi has wo em‑juh. 17 Ab g wo s‑wohochud mat em‑doꞌibia g Jiosh k pi hekid wo em‑dagito. T ihda em‑doꞌibiadag hab wo wa masmak mo g wainomi wonami.

An g wo uꞌukchid g Jiosh haꞌichu ahga hab sha masma mamtp hems g is‑pahyo. Id o ab em‑mahkch g Hekia S‑apꞌekam Gewkdag mamt hekaj wo gewito g Jiawul. 18 Kumt chum hekid wo e hoꞌigeꞌidahunad ch ab wo tahnid g Jiosh g i wehmtadag. Hekia S‑apꞌekam Gewkdag o am i t‑wehmaj t‑hoꞌigeꞌidahuna ed. Kumt wo s‑nenenashank ch wo e hoꞌigeꞌidahunad ha wehhejed g Jiosh hemajkamga.

19 Ahni amt am hab waꞌap wo e hoꞌigeꞌidahunad ni‑wehhejed mat g Jiosh ab wo ni‑mah g neꞌoki mat hekid wo i e ai mant am wo ha jehnigi. Nt hekaj s‑ni‑mamachim ch s‑gewkam am wo ah ihda s‑kehg haꞌichu ahgaj g Jiosh mat iaꞌi idani hahawa t‑tashogi. 20 Id ani hekaj d lihso mani id ahgachug. Kumt am wo si e hoꞌigeꞌidahunad mant s‑gewkam wo ahgad mant has wo i chum masmak.

21-22 Ab ani chehani g t‑wehnag Tychicus mat am wo i em‑chehgimed k am wo em‑ahgi mani has waꞌi masma ch has ni‑wua. Do si s‑ap piongaj g Christ ch si s‑ap am wo i em‑gewkemhu em‑ahigdch mach has t‑wua.

23 Am ani ni‑hoꞌigeꞌidahun mat g Jiosh t‑ohg ch g t‑kownalig Jesus Christ ab baꞌich wo i em‑mah g s‑ap tahhadkam ch pihk elidadag nam pi d wohochuddam. 24 Jiosh at baꞌich ep wo i s‑em‑hoꞌigeꞌel wehs ahpim mam woho ab si tatchua g t‑kownalig Jesus Christ.