1 Ade latini, de li ga Ɓasan ʋele. Ɓasan masagi Wɔge ɠulani, ta ná-kɔɔɠɔ nuiti kpein, ti ade laaɠomi, ti ʋa kɔɔi ʋɛɛ ade ʋa Edeleyi. 2 Ɠɔoɠɔ GALAGI ɠɛni mà: «Mina lua tɔun ba, mazɔlɔɔ gè dɔa è yeezu, ta ná-kɔɔɠɔ nuiti kpein, é ʋɛɛ ná-zooi ʋa. Ɗa so, eɠɛʋelei è Amɔɔl nuiti ta-masagi Siɠon zoni da, nii é ɠɛni zeini Ɠɛseɓon.» 3 Ɠɔoɠɔ GALAGI da-ƓALAGI Ɓasan masagi Wɔge lɔɔni ade yeezu, é ɓɔ ná-kɔɔɠɔ nuiti kpein ba. De ti pɛ paani. Nu ɠila kpalaa ge la ɠulani. 4 Názu ɠa de ná-taaiti pɛ soni da, taa ʋuulɔzita (60) ɠa é ɠɛni Aalegɔɓe yooi maaɠoolii zu, niiti Wɔge ɠɛni masadai ɠɛɛzu ti unda, Ɓasan yooi zu. Taa ɠila kpalaa ge la ɠɛni yɛni, nii de la ɠɛni soni. 5 Naama laa wolaiti toga ɠɛni de gola, siɠi gaaɠoozagiti ti ti ma, ta kɔlu ɓogiti nu ti loozu. Taaiti ti ɠɛni ná ɓalaa, ti mɔinɗai, niiti siɠi ge la ɠɛni ti ma. 6 Ade taai naati pɛ koloɠoloni, eɠɛʋelei de kɛɛni la ga Ɠɛseɓon masagi, Siɠon, nɔnɔiti. Ade nuɓusɛiti pɛ suwuɠaaleʋeni ti zu, zunuiti, ta anzanuiti, ta doungoiti. 7 Kɛlɛ ade toganiiti soni ɓɔɠɔ ʋɛ, ta kɔɔzoganiiti niiti ti ɠɛni taai naati su.

8 Zekana, naama ziɛgi zu, ade adaʋɛ náti kulani la Amɔɔl nuiti ta-masa felegɔiti zea, zooi nii é Zuludɛn ʋolu ʋelei, é zo ziɛ wolai Aalenɔn ma, eyɛsu é zeeli Ɠɛɛlemɔn gizei ma. 9 (Sidɔn nuiti ti Ɠɛɛlemɔn gizei laasei pɛɛʋɛ ga, Siliyɔn, Amɔɔl nuiti ti daasei pɛɛ ga Seniil.) 10 Ade zooi kpein soni, niiti ti ɠɛni Ɓasan masagi Wɔge ná-masadai zu: gize nɛmɛ zu laaiti kpein, ta Galaade yooi kpein, naa ʋɛɛ Ɓasan yooi ʋa, eyɛsu é zeeli Saleka taai ta Edeleyi taai ma. 11 (Ɓasan masagi Wɔge ɠila kpe ka é yɛni vulua, Leefa mavofodaiti saama. Ná-pooma ɠesui kpɛtɛai ga kɔtui, naa ɠa dɛ Laɓa, Amɔn nuiti ta-laa wolai zu. Sakpai ɠa ga mɛtɛlɛ naanigɔ, kogi ɠɛ ga mɛtɛlɛ felegɔ.)

12 Naama ziɛgi zu, ade ɓeni ga zooi naati kpein so. Luɓɛn ta Gade nuiti ta-wolodamaiti ka gè zooi naa veeni ti ya, nii é Alɔwɛɛl letemaʋɛ lɛkpɛma nu ɠɔʋɛzuʋɛ, ziɛ wolai Aalenɔn ma, ta Galaade ɠize yooi ɠilazuʋɛ, é ɓɔ ná-taaiti ba. 13 Manasee ná-bolodai ɠilazuʋɛ ɠa gè Galaade yooi mɔtai veai zea, ta Ɓasan yooi kpein, nii Wɔge ɠɛni masadai ɠɛɛzu unda. (Aalegɔɓe maaɠoolii kpein, é ɓɔ Ɓasan kpein ba, naa ɠa é ɠɛni lolisu ga Leefa mavofodaiti ta-yooi. 14 Yayiil é ga Manasee ná-dounloin ta, naa ɠa é Aalegɔɓe yooi kpein seɠeni, eyɛsu é zeeli Gesuul nuiti ta Maakate nuiti ta-ɠwɛpelemaʋɛ, é daaseigi ʋɛɛni Ɓasan laaiti ba, zaaɠaza ta lolisu ga Yayiil ná-taaiti.) 15 Gè Galaade yooi veeni Makiil ʋɛ. 16 Gè Galaade ɠilazuʋɛ veeni Luɓɛn nuiti bɛ, ta Gade nuiti, eyɛsu é zeeli ziɛ wolai Aalenɔn ma, toɠa é ga kwɛpelegi, eyɛsu é zeeli ziɛ wolai Yaɓɔke ma, Amɔn nuiti ta-ɠwɛpelemaʋɛ. 17 Folo liizu ɠwɛpelemaʋɛ ɠɛni ga Zuludɛn ma ʋɛtu nɛmɛi, é zo Kineelɛte ʋa, é zeeli Kpoloɗɛ Wanai ma. Folo ɠulazu ɠwɛpelemaʋɛ ɠɛni ga Pizega ɠizei ɠɔɠɔaʋɛ.

18 Naama ziɛgi zu, gè niima levei veeni wo ya, ga: ‹Ɠɔoɠɔ GALAGI wa-ƓALAGI niima yooi vea wo ʋɛ, nii a kɛ é ɠɛ ga wɔnɔ. Wɔiti kpein wo ga zunuiti, wa ɗa ɓɔɠɔ maaɠili ga kɔɔɠɔ zɔɔlaiti, wo leʋe wo-ɠɛɛleaiti tuɠɔ, Izelayɛle nuiti. 19 Wo-anzaiti, wo-lointi, ta wa-loganiiti nɔ ɠa ta yɛ ná, naama laaiti su gè ti veai wo ya. (Wa-loganiiti mɔinʋɛ, gè naa zuɠwɛɛ.) 20 Wa ɓɔ wo-ɠɛɛleaiti ba, eyɛsu Ɠɔoɠɔ GALAGI dooɠo fe ti ʋɛ, eɠɛʋelei é kɛai la wo ʋɛ, tiya ɓalaagi ti zooi zɔlɔɔ ga tɔnɔ, nii Ɠɔoɠɔ GALAGI wa-ƓALAGI feezu tiya Zuludɛn ʋolu ʋelei. Názu ɠa wa ɠale ma la wa-yooiti su, niiti gè ti veai wo ya.

21 Naama ziɛgi zu, gè devei veeni Zozuwe ya, gè ɠɛ ma: «È-ɠaazuʋɛ naa kpein kaani, nii Ɠɔoɠɔ GALAGI wa-ƓALAGI kɛɛni ga masa felegɔiti, pele ɠana Ɠɔoɠɔ GALAGI a kɛ la ga masadai kpein, ʋɛ è ʋaazu leʋesu ná. 22 À mina lua ti ʋa, mazɔlɔɔ Ɠɔoɠɔ GALAGI wa-ƓALAGI ɓɔɠɔi ɠa é kɔɔi ɠɔɔzu wo ʋɛ.»

23 Naama ziɛgi zu, gè Ɠɔoɠɔ GALAGI maanɛɛnɛni, gè ɠɛ ma: 24 «Màliɠii, Ɠɔoɠɔ GALAGI, è tɔɔzeiɗa ga è wɔɔlɔ ʋelei ta è-zɛbɛi lɛa ga ze, nɛ̀i gè ga ɗa-wotiɠɛ zunui, mazɔlɔɔ galagi ɓɛgele ɠa é geeɠɔlɔgi zu, ɓaa zooi ma, nii a zoo é ʋokɔɠɔ ɗa-ɠɛɛwotiiti ma, ta ɗa-vaa wolaiti? 25 Nà è maanɛɛnɛzu ga è va bu, gè Zuludɛn maazuɓudɛ, gè zou ʋagɔi naa ɠa, nii é zɔɔla ʋelei, naama ɠize you ʋagɔi, ta Liɓan.» 26 Kɛlɛ Ɠɔoɠɔ GALAGI yiiɠaawanani mà wa-vaa zu, é la mɔ ɠɛni pɔ ga é ʋa gòomɛni. É ɠɛni mà: «É kula ɠɛa! Mina mɔ ɓɔɛ pɔ̀ ga naama vai ta. 27 Lɛ Pizega gizei ma, è ɠaazuziɛ, folo liizu ʋelei, ta lɛkpɛma ʋelei nu ɠɔʋɛzuʋɛ, ta nu yeezazuʋɛ, ta folo ɠulazu ʋelei, è pɛtɛ ga ɠaazuʋɛ, mazɔlɔɔ è la Zuludɛn nii maazuɓudɛa pɛ. 28 Deveiti fe Zozuwe ya, è iɲɔdɔ, è sɛbɛlɔ, mazɔlɔɔ toɠa é losu niima nuɓusɛiti tuɠɔ, é zooi nii ve tiya ga tɔnɔ, nii è ʋaazu pɛtɛsu.» 29 Ade yɛni nɛmɛi zu, Ɓɛte-Peyɔɔl letemaʋɛ.