Ɠɔoɠɔ GALAGI ʋaaʋɛ, é zeɠe Sinayi gizei ma,

é wuzeɠeʋɛ ti ʋɛ, eɠɛ foloi, é zeɠe Seyiil yooi zu,

toɠa volozu, é zo Palan ɠizei ma zoligɔ,

paaʋɛ, é ɠula ná-geezuɠeela ɲadegai waawaagiti saama,

tɔ sɛʋɛi ɠɛni zea, abui ba.

3 Ungo, nuɓusɛiti nɛɛʋɛ è ʋɛ,

ɗa makɛsu naati ma, niiti ti ga ɗɔnɔiti,

ta ʋuuni è ɠɔɠɔwu, ti ɗa è-laawooi mɛni.

4 Ada-vaa ɠa é tɔgi veeni la Moize ya,

Zakɔɓe ná-nuɓusɛiti ti sɔlɔɔ ga tɔnɔ.

5 É ɠɛni ga masagi Yesulun unda,

siɛgi zu nuɓusɛiti ta-ɠundiɠiiti ti maaɓɔni da,

ta Izelayɛle wolodamaiti.

6 Luɓɛn zii zuɠooza, é mina za,

ná-nuɓusɛiti ti la mɔinni, naati yɛ ná ɠɔ.

Ee, Ɠɔoɠɔ GALAGI, woilo Zuda wooi ma.

Lo tuɠɔ, è lii la ná-nuɓusɛiti pɔ.

Zeeiti ti maalobo,

ɗa ɓɔɠɔi ɠɛ ga ná-kpɔba nui sili nuiti daalɔɠɔma.

Ee, Ɠɔoɠɔ GALAGI! È wuulimegi ta tumimegi veeni ɗa-lada wotiɠɛ nuiti zea, Leevi mavofodaiti,

niiti è ti ʋoluɠulaai Masa,

è ti zakpe Meeliɓa ɗɛiti pɔ bɛ.

9 Leevi, nii é ɠɛɛzu kɛɛɠɛ ta dee ta-vaa ma:

«Gè la wɛlɛzu ti ʋa!»

Tɛigi é la zeelɔzɔɠɔzu ɠɛɛni ná-doun zunuiti ta kɛɛɠɛlointi zɔɠɔzu,

kɛai ga wooɠɛɠila nu è-laawooi ɠila nɔ ʋɛ, ta ɗa-minazeɠegi.

10 Leevi nuiti ta ɗa Zakɔɓe ná-nuiti kala ga ɗa-levei,

ti Izelayɛle nuiti kala ga ɗa-lɔgi,

ti ani maku nɛɛnɛgiti gala è ʋɛ,

ti gala zalaɠai ɠula ɗa-zalaɠa ɠulazuʋɛ.

11 Ee, Ɠɔoɠɔ GALAGI, ta ɓɔ ta-zɛbɛi ʋa,

è tuya loo botii kpein ma, ti kɛɛzu ga yeei.

Ti zili nuiti ta-ɠaaɓaai ɠoloɠolo,

niiti kpein ti ti wɔinzeɠezu,

tanɔpɛ ge mina ungi wuzeɠe mɔnɔ eyɛsu pɛ.

Ɠɔoɠɔ GALAGI nɛɛbɛ nui, toɠa zeini ziilɛigi zu tɔun koba,

GALA ka é makɛsu yeenɔpɛ,

toɠa zeini ná-gizeiti saama.

Ɠɔoɠɔ GALAGI tuya looʋɛ ná-zooi ʋɛ,

ga nɔɗa ʋagɔi é zeɠezu geezuʋɛ,

ta zou wu ɗɛ wolaiti,

14 ta gulu waa ʋagɔiti, foloi ti ɓɔizu,

ta gulu waai kpein nɛai, ti ʋɔnɔsu alu-o-alu,

15 ta vebɛani ʋagɔiti, gize ʋɔlɔzaɠagiti ti feezu,

ta wɔlɔwɔlɔi zu ɠizeiti ta-lɔnɔ pagɔiti.

16 Tɔnɔgi nii fizɔgai gola, é zooi laavegai.

GALA nii é ɠulani kɛlɛma kpɔvɔ goi zu,

nii abui ɠɛni sosu ba, naa ná-faanɛɛi ʋa,

é ɠɛ ga masa bɔɔlɔgi Zozɛfe unba, tɛigi ziimazeɠegi wogai da,

é ɠɛ ga kɛɛɠɛlointi ta-ɠundiɠii.

17 Unfemai ɠa Zozɛfe ʋɛ!

Suzeeliʋɛ eɠɛ nikɛ zinɛi.

Minɛ felegɔi ɠa ba, eɠɛ wɔlɔwɔlɔ leɠui,

naati ka a ɗa ziiti siɠa la,

é ti laaʋili, é li ga tiye zou ɓela ga.

Minɛi gilagi ɠa é ga Efelayime nuɓusɛ waawaagiti,

zɔi ɠa é ga Manasee ná-nuɓusɛ mɔinmɔingiti.

Zaɓulɔn, ɠoozunɛ ɗa-ʋɔdi loo vaiti su.

Isakaal, ɗɔun zei kpɛ ɗa-zeɠe ɠotaiti bu.

19 Wa nuɓusɛiti toli wa-ɠize ɠaaɠoozagi ma,

wa zalaɠaiti kula ga telebodai,

kpoloɗɛi ta ziɛlaʋɛ ɲaɠaegi ta ɠɛ ga zaɓu,

wo naavolo mɔinmɔin sɔlɔɔ.

Maamusɛi ɠa Ɠɔoɠɔ GALAGI ʋɛ, nii é zou wolai veezu Gade ʋɛ.

Gade ɠa looɠosu eɠɛ zala zaai,

a ɗa ná-sua zogai ʋali ga, é so kɔɠɔiti ma, é li nɔunkalagi ʋɔ.

21 É yiimazeɠeni ga ma ʋagɔi,

ʋɛ ná makɛgai bɛ, kundiɠi laamiizuʋɛ ɠana.

Toɠa é loni nuɓusɛiti untuɠɔ,

é telebodai ziɛ, eɠɛʋelei GALA ge pɔ la,

é zoloo faa zɔlegaiti ma, ti wogai Izelayɛle ná-faa zu.

Dan ɠa ga zala ɓokpagi,

nii é ʋilisu, é zeɠe Ɓasan yooi zu.

Nɛfetali yiɠoa ga faanɛɛi,

é Ɠɔoɠɔ GALAGI ná-tuyaiti pɛ sɔlɔɔga.

Ná-zooi é seɠezu ga nɔnɔ,

toɠa zo folo ɠulazu, é li lɛkpɛma nu yeezazuʋɛ.

Asɛɛl ɠa ga tuya nu, Zakɔɓe ná-doun zunuiti saama.

Undaanɛ ɠɛ bɛ yɛ, kɛɛɠɛlointi saama,

kɔɠɔi ɠa lɔ gulɔi wu.

25 Ná-taazuʋɛ, sɔɠɔgiti ta ɠɛ ga kɔlui ta kɔlu ɓɔigi,

ná-kɛdɛyai yɛ zea, sii ma voloi pɛ su.

26 Ee, Yesulun, GALA pokɔɠɔma la ná!

Toɠa geeɠɔlɔgi ɓotasu, é ʋa é ɓɔ è ʋa,

maayikiʋɛ, toɠa tonaɓiingiti su.

27 Ɠɔoɠɔ GALAGI ɠa ga nu lɔɔɠuzuʋɛ,

toɠa ga ɗa-ɓɔba nui ɠɔoɠɔ zooi ma.

Toɠa è zili nui ɓɛ è luɠɔ,

é ɠɛ è ma: «Suwuɠaaleʋe!»

28 Naazu Izelayɛle zeini ziilɛigi zu,

Zakɔɓe ná-dointi ta-ɗɛungi ɠa ɠulazu ga pagɔ yɛ,

zooi ná zu, ʋɛ moloi, é ga ɓeleegi, naa ʋɔnɔsu ná, leezɛn ɓelei ná,

geezuʋɛ ɗa nɔɗai vaza ná ma.

29 Izelayɛle nuiti, wo undaanɛɛʋɛ! Ɓɛni ka ti wo ɠɛʋele,

wɔi wo ga nuɓusɛiti Ɠɔoɠɔ GALAGI ti ɠizogai?

Toɠa ga wa-ɠɔɔɠɔ zɛpɛgi, nii é ʋaazu é ɓɔ wo ʋa.

Toɠa ɓalaa ga boɠa zɔkpɔi, nii wo pilɛ sɔlɔɔsu da.

Wo zili nuiti ta ʋaana wo ʋɔ ga ɓɔɠɔmaayeii,

wa ɠɔɠɔlo ta-ada ɠaaɠoozagiti kpein ma.