1 Ɠɔoɠɔ GALAGI ɠɛni Zozuwe ma: «Mina lua, è zasu mina ɓali ɲɛgɛlɛin. Kɔɔɠɔ nuiti kpein seɠe, wo li, wo laalɛ Ayi taai wu. Mazɔlɔɔ gè Ayi masagi lɔa è yeezu, ta ná-nuɓusɛiti kpein, ná-taai ta ná-zooi pɛ. 2 Ɗa Ayi zo ta ná-masagi, eɠɛʋelei è Zeeliko ta ná-masagi zoni da. Kɛlɛ niizu, niiti ta ɠɛ ga wɔnɔ kɔɔzoganii zu, naa ɠa ɠɛ ga ti-yeaɠɔligiti, ta ta-loganiiti. Kɔɔɠɔ nui tanigaa lɔɔɠu taa ʋoluʋɛ.»

3 Zozuwe ná-kɔɔɠɔ nuiti kpein seɠeni, ti ʋilɛ pelei ma, ti li, ti laalɛ Ayi taai wu. Zozuwe yeeloni kɔɔɠɔ nu ɠɛzɛɠɛzɛ waaʋuusaʋagɔ (30 000) ʋa, é ti leʋe kpidii. 4 É niima levei veeni ti ya, é ɠɛ ma: «À li, wo lɔɔɠu taai ʋoluʋɛ. À mina maaɠooza gola taai ʋa, wo ɠɛʋele ɓɛtɛ wo pɛ. 5 Nɔ̀un nà, gá nuɓusɛiti ti bà, gá maaɓuɠazu taai ʋa. Ayi nuiti ta ɠulana gi laaɠomisu, eɠɛʋelei ti kɛɛni la mɔungi, gá ʋelazu ti ʋa. 6 Ta ɠula, ti ʋilɛ gi ʋolu, eyɛsu gi ti yeeleʋe taai ʋa, mazɔlɔɔ ta ɠɛ ma: ‹Ta ʋelazu gi ʋa, eɠɛʋelei é ɠɛɛni la zɔi zu.› 7 Wa ɠula dɔɔɠu ʋelei zu, wo taai zo. Ɠɔoɠɔ GALAGI wa-ƓALAGI dɔa wo yeezu. 8 Siɛgi zu wo vɔnisu da taai ma, wa abui lo ba. Wa kɛ, eɠɛʋelei Ɠɔoɠɔ GALAGI laawooi la. À ziɛ ga devei, nii gè fea wo ya.» 9 Zozuwe ti leʋeni, ti li, ti lɔɔɠu Ɓeetɛleni zɔɠɔzuʋɛ ta Ayi, Ayi folo liizu ʋelei. Zozuwe yɛni nuɓusɛiti saama naama ɓidii.

10 Zozuwe wuzeɠeni sobuzobui, é ná-kɔɔɠɔ nuiti pɛtɛ, naa ʋolu é loni ti untuɠɔ, ta Izelayɛle ɠundiɠiiti, ti li Ayi laalɔɠɔma. 11 Kɔɔɠɔ nuiti kpein ti ʋilɛni polu, ti yɛni liizu ɠana, eyɛsu ti zeeli taai letemaʋɛ. Ti ʋuuni Ayi lɛkpɛmaʋɛ nu ɠɔʋɛzuʋɛ, nɛmɛi ɠɛni ti yɔɠɔzu ta Ayi. 12 Zozuwe zunu waadɔɔlugɔ (5 000) zeɠeni, é ti lɔɔɠu Ɓeetɛle ta Ayi ti yɔɠɔzuʋɛ, taa ʋoluʋɛ folo liizu ʋelei. 13 Kɔɔɠɔ nuiti ti zeini ti-ʋuuzu ɓiingi, lɛkpɛmaʋɛ nu ɠɔʋɛzuʋɛ. Niiti ti ɠɛni ti makɛsu ʋoluzu ʋelei, naati ti ɠɛni taa ʋoluʋɛ folo liizu ʋelei. Zozuwe ɲiini naama ɓidii nɛmɛi zaamaʋɛ.

14 Siɛgi zu Ayi masagi suɠwɛɛni da, é ná-zunuiti buzeɠeni gaamanɔ, ti suvilɛ, ti ɠula taai ʋa, ti li kɔɔɠɔzuʋɛ, ti lo Izelayɛle laalɔɠɔma, Zuludɛn ma ʋɛtu nɛmɛi letemaʋɛ. Masagi ɠi ge la ɠɛni ba ga ni nua lɔɔɠuʋɛ taa ʋoluʋɛ tɔun daalɔɠɔma. 15 Zozuwe ta Izelayɛle nuiti ti kɛɛni eɠɛ ta vɔni ti ma, ti ʋela, ti li ga teʋebai zu ʋele. 16 Ti taazu nuɓusɛiti kpein tolini ga ti ʋilɛ ti ʋolu. Ti ʋilɛni Zozuwe ʋolu, ti yeeleʋe taai ʋa. 17 Nu nɔpɛ ge la ɠɛni yɛni Ayi ta Ɓeetɛle taazuʋɛti, nii é la ɠɛni ɠulani, é ʋa li Izelayɛle nuiti kpɛɛzuʋɛ. Ti taa laalaogai yɛni, ti ʋilɛ Izelayɛle nuiti polu.

18 Ɠɔoɠɔ GALAGI ɠɛni Zozuwe ma: «Ɗa-ɓɛɛin maale Ayi letema ʋelei, mazɔlɔɔ nà dɔɔzu è yeezu.» Zozuwe kpɛɛin maaleni taai letegi. 19 Zozuwe yeemaalegai ma nɔ feya, zunuiti ti lɔɔɠuni, naati ti ɠulani, ti ʋili taai zu. Ti lɛɛni, ti so, ti abui ʋili ba.

20 Ayi nuɓusɛiti ti wɛlɛni ʋolu ʋelei, ti duului ɠa, é ɗa ɠula taai ʋa, é ɗa lɛ geezuʋɛ. Ti la mɔ ɠɛni zobo nɔpɛ sɔlɔɔni, ti ʋa ʋela ga yeezazu ʋele ɓaa ɠɔʋɛzu ʋele. Pele leʋeni ti luɠɔ ná pɛ, mazɔlɔɔ Izelayɛle nuiti ti ɠɛni ʋelazu, ti ɗa li ga teʋebai zu ʋele, naati ti ɠaleni ma ti ɓɛɛ nuiti daalɔɠɔma. 21 Zozuwe ta Izelayɛle nuiti kpein ti kaai ma ga zunuiti ti lɔɔɠuni, naati ti ɠulaa, ti taai zo, taai ɠala luului ɠɛni lɛɛzu, ti ɠaaʋoteni Ayi nuiti ma, ti laalɛ ti wu. 22 Kɔɔɠɔ nui zɔiti ɓalaa, ti ɠulani taai ʋa, ti li, ti ʋɛɛ zɔiti ba. Izelayɛle nuiti ti Ayi nuiti kalini. Ti zobo sɔlɔɔni ti ma, nu ɠila kpalaa ge la ɠulani, ti la gila kpalaa zɛni vulua. 23 Kɛlɛ ti Ayi masagi ma vului zoni, ti ʋaa la Zozuwe ʋɔ.

24 Izelayɛle nuiti ti Ayi nuiti kpein paani, niiti ti ɠɛni ɓalaɠaiti su, ta teʋebai zu, ʋɛti ti ʋilɛni ti ʋolu náti, ti ti pɛ paani ga ta-woɠa zɔkpɔiti, é zeeli ma ɠaaɓelagi ma. Naa ʋoluma, Izelayɛle zunuiti kpein ti lɛɛni taazuʋɛ, ti taazu nuɓusɛiti mɔta zuwuɠaaleʋe. 25 Ʋele ɠana, naama voloi, nu waapuugɔ maazu felegɔ (12 000) undaaʋilini da, zunu, anzanu, nii kpein é ɠɛni ga Ayi nuɓusɛ. 26 Zozuwe ná-kpɛɛin maalegai yɛni de, eyɛsu Ayi nuɓusɛiti kpein suwuɠaaleʋe. 27 Anɛɛ naa ʋe, Izelayɛle nuiti ti toganiiti ta ani ʋagɔiti soni ga kɔɔzoganiiti, niiti ti ɠɛni taazuʋɛ, eɠɛʋelei Ɠɔoɠɔ GALAGI ma levei veeni la Zozuwe ya.

28 Zozuwe Ayi ɠalani, é ná ɠoloɠolo, ná ɠɛ ga teʋebai eyɛsu ɠɔ, zekana ná la zaaɠaza. 29 Ti Ayi masagi zɛlɛni gului ʋa, é yɛni ná eyɛsu kpɔkɔi zeeli. Foloi ɠɛai ma daazu, Zozuwe devei veeni ga ti ma ʋooma yei, ti kula gului ma. Ti pilini ya nu lɛɛzuʋɛ taazuʋɛ, ti kɔtu ziɠigi ʋuuni ma, naa ɠa ná zaaɠaza.

30 Zozuwe zalaɠa ɠulazuʋɛ loni Eɓale gizei ma, Ɠɔoɠɔ GALAGI ʋɛ, Izelayɛle ná-GALAGI. 31 É toni, eɠɛʋelei Ɠɔoɠɔ GALAGI ná-botiɠɛ nui Moize ma levei veeni la Izelayɛle nuiti zea, niiti ti zɛʋɛai Moize ná-tɔgi zu: zalaɠa ɠulazuʋɛ nii togai ga kɔtuiti, niiti kɔlu ani la vɔɔɠuni ti ʋa. Ti gala zalaɠaiti ta ziilɛi zalaɠaiti kulani ná Ɠɔoɠɔ GALAGI ʋɛ. 32 Tɔgi nii Moize sɛʋɛni, Zozuwe naa zu wooiti sɛʋɛni kɔtuiti ma, Izelayɛle nuiti gaazu. 33 Naama ziɛgi kpein su, Izelayɛle nuiti kpein, kɛwolaiti, ta kundiɠiiti, ta tukpɔɠaaleʋe nuiti, ti ɠɛni loni Ɠɔoɠɔ GALAGI ná-minazeɠe kesui maaɠoolii zu, Leevi nuiti ti ga zalaɠa ɠula nuiti naati gaazu, tɛiti ti seɠezu. Seikɔɠɔma nuiti ta Izelayɛle nu ɓɔɔɓɔgiti, ti ɠɛni ná. Ti ɠilazuʋɛ ɠɛni loni Galizime gizei letemaʋɛ, ti ɠilazuʋɛ ɠɛni Eɓale gizei letemaʋɛ, eɠɛʋelei Moize, Ɠɔoɠɔ GALAGI ná-botiɠɛ nui boni la kaite, ga ti ɗa tuyai loo la Izelayɛle nuɓusɛiti bɛ.

34 Naa ʋoluma, Zozuwe tɔ gooiti kpein kalani, tuya loo ɓɔɛiti ta foovoo geleiti, eɠɛʋelei nɔ é ɠɛni la tɔgi ma zɛʋɛi zu. 35 Zozuwe ti pɛ kalani Izelayɛle nu ʋɛbɛiti kpein gaazu, nii kpein nɔ Moize feeni ga devei, é la tanɔpɛ zɛni ʋoluzu, naa ɠɛni anzaiti gaazu, ta doungoiti, ta seikɔɠɔma nuiti.