1 Moize devei naati kpein boni Izelayɛle nuiti ma, niiti Ɠɔoɠɔ GALAGI ti veeni zea.

2 Moize ɓɔɛni Izelayɛle nuiti ma wolodama ɠundiɠiiti pɔ, é ɠɛni ti ma: «Devei ʋɛtɛ, nii Ɠɔoɠɔ GALAGI feai: 3 Siɛgi zu zunui ta minazeɠezu la Ɠɔoɠɔ GALAGI ʋɛ, ɓaa é konai wo, é ʋilɛ fai ta ʋa, nii é pɔ ga é kɛ, é la mɔ daawooi zeɠea ma. Toɠa naa kpein kɛ, niiti ti ɠulaai da, é bo.

4 «Ni anzalopoi ta, nii é kɛɛɠɛ ná-pɛlɛi wu dɛ, a minazeɠe kɛɛna Ɠɔoɠɔ GALAGI ʋɛ, é ɓɔɠɔ ɠili ga naa, 5 ni kɛɛɠɛ a ná-minazeɠe fai ta ná-kona vai zuɠwɛɛna, é ɓɔɠɔ ɠiliai la, ni kɛɛɠɛ a maaɠɛna kpɔ, é la faa woni tɔun tetegi, ná-minazeɠegiti ta ná-konaiti kpein ta yɛ ma, niiti é ɓɔɠɔ ɠiliai ga tiye. 6 Kɛlɛ ni kɛɛɠɛ la yeezeini bu, yeei nɔ é faa ɠwɛɛgai la su, minazeɠegiti ta konai kpein é ɓɔɠɔ ɠiliai la, naati ti la mɔ yɛga ma. Ɠɔoɠɔ GALAGI ɠa suvaayɛ, mazɔlɔɔ kɛɛɠɛ la yeezeini ti wu.

7 «Ni toɠa zini bɛ, é minazeɠegaa ɠɛai na, ɓaa é ɓɔɠɔ ɠiliai na, ga kpɔɛi ta nii kulaai na da, é bo, 8 ta sinigi a faa ɠwɛɛna su, é maaɠɛ kpɔ tɔun tetegi voloi nɔ é faa ɠwɛɛgai la su, ná-minazeɠegiti ta yɛ ma, ta konaiti é ɓɔɠɔ ɠiliai ga tiye, ta yɛ ma. 9 Kɛlɛ ni sinigi la yeezeini bu, voloi nɔ é suɠwɛɛsu da, é minazeɠegi ɠaaʋa, nii é kɛai, ta kpɔɛi kulaai daaʋɛ, niiti é ɓɔɠɔ ɠiliai ga tiye, Ɠɔoɠɔ GALAGI ɠa suvaayɛ.

10 «Poanzai, ɓaa anzanui ti ɠɛlɛai ba, minazeɠegi naa a bo, ɓaa konai nɔpɛ kulaai daaʋɛ, nii é ɓɔɠɔ ɠilizu la, giliai ɠa yɛ de.

11 «Anzanui nii é zini bɛ, naa a minazeɠegaa ɠɛɛna, ɓaa é ɓɔɠɔ ɠili ga konai ta, 12 sinigi a faa ɠwɛɛna su, é maaɠɛ kpɔ, é la yeeɠulani bu, é ʋa ɠɛlɛ, ná-minazeɠegiti kpein ta yɛ ma, ta kona wooi nɔpɛ é ɓɔɠɔ ɠiliai la. 13 Kɛlɛ ni sinigi a ɠɛlɛna, voloi nɔ é suɠwɛɛsu da, ná-minazeɠegi kpein ta kona wooi kpein é lo tɔ ɓɔɠɔi ʋa, ɓaa daawooi ʋa, naati ti la yɛga ma. Sinigi ti ɠaaʋaa, Ɠɔoɠɔ GALAGI ɠa suvaayɛ. 14 Sinigi ɠa zoo é ti yɛ ma, ɓaa é minazeɠegi kpein koloɠolo, ɓaa konai kpein nii a zoo ɠɛlɛzu la anii ta ʋa. 15 Ni sinigi la ɠɛlɛni, a maaɠɛna kpɔ eyɛsu poluma zobui zeeli, anzai ɠa ɠili minazeɠegi kpein su, ta kona wooiti kpein su, é ti woga. É vaa bu ga é ti makɛ, tɔɔzei é maaɠɛga kpɔ, é la faa woni, foloi é mɛniga da. 16 Kɛlɛ ni toɠa ti zeɠe ma, foloi tanigaani teʋega ʋoluma, kpega ʋoluma ga suɠwɛɛ, toɠa anzai ná-faaɠaaza golai ma ɠasɔi zeɠe.»

17 Tɔgiti kana, niiti Ɠɔoɠɔ GALAGI ti veeni Moize ya, é ʋilɛ zunui ta anzai ti yɔɠɔzuʋɛ ʋa, doun kɛɛɠɛi ta ná-doun anzanui ti yɔɠɔzuʋɛ ʋa, siɛgi zu é ga nu niinɛi, é kɛɛɠɛ ná-pɛlɛi wu dɛ.