1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Izelayɛle nuiti tɔnɔi ʋotokula Madiyan nuiti ma, naa ʋolu, ɗa li niina è-mɛmɛwolani pɔ, ti zaai.»

3 Moize ɓɔɛni nuɓusɛiti pɔ, é ɠɛ ti ma: «À zunui tanigaani maaɠili ga kɔɔɠɔ zɔɔlaiti wo zaama, ti li Madiyan nuiti daalɔɠɔma, naa ɠa a kɛ, Ɠɔoɠɔ GALAGI ná-potokulai laazeeli Madiyan nuiti ma. 4 Bolodai ɠilagilagi zu, wa zunu waagila (1 000) kula ti zaama, wo ti leʋe kɔɔmaʋɛ.»

5 Ti ziimazeɠegi woni Izelayɛle nuɓusɛiti saama, bolodai ɠilagilagi zu, zunu waagilagila (1 000), ti-liegɔi ɠɛni ga zunu waapuugɔ maazu felegɔ (12 000) ti maaɠiliai kɔɔɠɔ vai ma. 6 Moize ti leʋeni kɔɔmaʋɛ, é Finease ʋɛɛ ti ʋa, zalaɠa ɠula nui Eleazaal ná-doun zunui, naa ɠa é ɠɛni seizu ɲadegai ma zɔɔlaiti seɠezu, ta puʋugiti é ʋa ɗa poogiti dɛɛ la.

7 Ti kɔɔɠɔ zɔɔlaiti seɠeni, ti li Madiyan nuiti daalɔɠɔma, eɠɛʋelei Ɠɔoɠɔ GALAGI devei veeni la Moize ya. Ti zunuiti kpein paani, 8 é ɓɔ Madiyan nuiti ta-masa dɔɔlugɔ ʋa, ti ga: Evi, Leekɛme, Suul, Ɠuul, ta Leeɓa. Ti Ɓeyɔɔl ná-doun zunui Ɓalaame ɓalaagi ʋaani ga boɠa zɔkpɔi. 9 Izelayɛle nuiti ti Madiyan anzanuiti ta ti-lointi soni ga duɔiti, ti li ga tiye. Ti ta-zuaiti soni, ta ta-logani ɓulugiti kpein, é ʋɛɛ ti-yeaɠɔligi kpein ba. 10 Ti abui loni ta-laaiti kpein ba, ʋɛti ti ɠɛni zeini ná, ta ti-ʋuuzuʋɛti kpein. 11 Ti liini ga aniiti kpein ti ti zoni kɔɔmaʋɛ, nuiti ti ʋɛɛ toganiiti ba. 12 Ti liini ga duɔiti, ta kɔɔzoganiiti, ta kɔɔi zu aniiti Moize ʋɔ, ta zalaɠa ɠula nui Eleazaal, ta Izelayɛle ʋɛbɛi, naati ti ɠɛni ʋuuni Moaɓe nɛmɛi zu, Zuludɛn ɠobaʋɛ, Zeeliko letemaʋɛ.

13 Moize ta zalaɠa ɠula nui Eleazaal ta bɛbɛi ná-kundiɠiiti kpein ti wuzeɠeni, ti li, ti laaɠomisuʋɛ, ti-ʋuuzuʋɛ ʋolu ʋelei. 14 Moize yiiɠaawanani kɔɔɠuluɓaiti ma, nu waagilagila kundiɠiiti, ta nu ungilagila kundiɠiiti, niiti ti ʋaani, ti zeɠe kɔɔmaʋɛ. 15 Moize ti ɠaazaɠani, é ɠɛ ti ma: «Lee vaa zu wo niima anzanuiti kpein zɛgai vulua? 16 À ɠizɛ su ga, tiya ɠa ti Ɓalaame ná-tɛnɛ gooi zoni, ti Izelayɛle nuiti dɔ wooʋaladai zu, Ɠɔoɠɔ GALAGI laalɔɠɔma, Peyɔɔl ná-fai zu, naa ɠa é ʋaani ga maanɔɠɔi Ɠɔoɠɔ GALAGI ná-nuɓusɛiti saama. 17 Niizu niina, à zunu loungoiti kpein paa, wo anzanui kpein paa, niiti ti zunu vaa ɠwɛɛgai na. 18 Anzanu loungoiti, niiti ti la dɛ zunu laakoba vaa ɠwɛɛ, naati nɔ ɠa wa ti yɛ ná, wo ti makɛ ɓɔɠɔ ʋɛ.

19 «Wɔun wa, à li, wo ʋu ada ɠila ade-ʋuuzuʋɛ ʋoluʋɛ, wo yɛ ná folo lɔfela laawu, wɔiti wo nu ʋaai, ɓaa wo vɔɔɠu pooma ʋa, wa ɓɔɠɔ ɲade foloi zaʋasiɛi, ta foloi lɔfelasiɛi, wa-o, wa-luɔiti-yo. 20 Wa seɠeiti kpein ɲade ɓalaagi, sɔɔla kpein kpɛtɛai ga kɔlɔi, ɓaa boli leɠa zeɠei kpein, ta aniɲaka kpein é ga gului.»

21 Zalaɠa ɠula nui Eleazaal ɓɔɛni kɔɔɠɔ nuiti pɔ, ti zeɠeni kɔɔmaʋɛ, é ɠɛ ti ma: «À wɛlɛ faazeikpasui ʋa, é tɔgi zu, Ɠɔoɠɔ GALAGI ma levei veai Moize ya: 22 zanugi, walii, kɔlu ɓɔigi, kɔlui, foɠagi, ta bɔbɔgi, 23 anii kpein nii a zoo lɔɔzu abui ɠa, é la ɠala, wa naa lɔ abui ɠa, é ɲade. Naa ʋolu, wa ti lɔ ɓalaa ziɛ ɲadegai wu. Kɛlɛ, sɔɔla kpein é la zooga lɔɔzu abui ɠa, wa naati dɔ nɔ ziɛ ɲadegai wu. 24 Wa wa-zeɠeiti gba, foloi lɔfelasiɛi, wa ɲade niina, naa ʋoluma, wa zoo lɔɔzu ade-ʋuuzuʋɛ.»

25 Ɠɔoɠɔ GALAGI ɠɛni Moize ma: 26 «Zalaɠa ɠula nui Eleazaal zeɠe, é ʋɛɛ è ʋa, ta nuɓusɛiti ta-ʋɛlɛyeɠeiti ma ɠundiɠiiti, wo kɔɔzoganiiti gaalu, duɔiti ta toganiiti. 27 Ɗa kɔɔzoganii naati gaaɠwɛ su fele, ma ʋali saamai ve kɔɔɠɔ nuiti zea, ma ʋali saamai ve nuɓusɛi zɔiti kpein zea. 28 Nii é ɠɛɛzu ga kɔɔɠɔ nuiti tɔnɔi, vebɛanii ɠa zeɠe ba, é ɠɛ ga Ɠɔoɠɔ GALAGI nɔnɔi, nu ɠila ka zeɠe nu undɔɔlugɔi (500) zaama, togani ɠila ka zeɠe togani undɔɔlugɔi (500) zaama, ma wolaiti ta ma goiti ta soovalegiti saama. 29 Ma ʋali saamai nii feai ti ya, ɗa seɠe naa ʋa, è fe zalaɠa ɠula nui Eleazaal ya, é ɠɛ ga vebɛanii seɠeai ba Ɠɔoɠɔ GALAGI ʋɛ. 30 Ma ʋali saamai nii é ɠɛɛzu ga Izelayɛle nuiti tɔnɔi, ɗa nu ɠila seɠe nu ʋuulɔɔlugɔi (50) zaama, è togani ɠila seɠe togani ʋuulɔɔlugɔi (50) zaama, ma wolaiti ta ma goiti ta soovalegiti saama, è ti ve Leevi nuiti zea, niiti Ɠɔoɠɔ GALAGI ná-seɠe ʋɛlɛ ɲadegai makɛ fai ɠalivaai ti ma.»

31 Moize ta zalaɠa ɠula nui Eleazaal ti kɛɛni, eɠɛʋelei Ɠɔoɠɔ GALAGI ma levei veeni la Moize ya.

32 Kɔɔzoganiiti niiti kɔɔɠɔ nuiti ti ʋaani la, naa ɠɛni ga: baalagi ta bolii waaundɔzita waaʋuulɔfela maazu lɔɔlu (675 000), 33 nikɛ waaʋuulɔfela maazu felegɔ (72 000), 34 soovale waaʋuulɔzita maazu ɠila (61 000), 35 anzanu loungoi niiti ti la ɠɛni dɛ zunu laakoba vaa ɠwɛɛ, naati ti ɠɛni ga nu waaʋuusaʋagɔ maazu felegɔ (32 000).

36 Ma ʋali saamai nii é ɠɛni ga kɔɔɠɔ nuiti tɔnɔi, tiegɔi ɠɛni ga: baalagi ta bolii waaunsaʋagɔ waaʋuusaʋagɔ maazu lɔfela undɔɔlu (337 500), 37 naa ɠa undɔzita puulɔfela maazu lɔɔlugɔi (675) zeɠeni ba, é ɠɛ ga Ɠɔoɠɔ GALAGI nɔnɔi, 38 nikɛ waaʋuusaʋagɔ maazu lɔzitai (36 000), naa ɠa puulɔfela maazu felegɔi (72) zeɠeni ba, é ɠɛ ga Ɠɔoɠɔ GALAGI nɔnɔi, 39 soovale waaʋuusaʋagɔ undɔɔlugɔi (30 500), naa ɠa puulɔzita maazu ɠilagi (61) zeɠeni ba, é ɠɛ ga Ɠɔoɠɔ GALAGI nɔnɔi, 40 nuɓusɛ waapuugɔ maazu lɔzitai (16 000), naa ɠa nu ʋuusaʋagɔ maazu felegɔi (32) zeɠeni ba, é ɠɛ ga Ɠɔoɠɔ GALAGI nɔnɔi. 41 Vebɛanii kpein é ɠɛni ga Ɠɔoɠɔ GALAGI nɔnɔi, Moize naa zeɠeni, é pu zalaɠa ɠula nui Eleazaal yeezu, eɠɛʋelei Ɠɔoɠɔ GALAGI ma levei veeni la zea.

42 Ma ʋali saamai é ɠɛni ga Izelayɛle nuɓusɛiti tɔnɔi, nii Moize puuni yɛ, kɔɔɠɔ nuiti tɔnɔi ʋoluma, 43 naa ɠɛni ga: baalagi ta bolii waaunsaʋagɔ waaʋuusaʋagɔ maazu lɔfela undɔɔlu (337 500), 44 nikɛ waaʋuusaʋagɔ maazu lɔzita (36 000), 45 soovale waaʋuusaʋagɔ undɔɔlu (30 500), 46 nuɓusɛ waapuugɔ maazu lɔzita (16 000).

47 Ma ʋali saamai é ɠɛni ga Izelayɛle nuiti tɔnɔi, Moize nu ɠilagilagi zeɠeni nu ʋuulɔɔludɔɔlugi (50) kpein ba, é togani ɠilagilagi ɠula togani ʋuulɔɔludɔɔlugi (50) kpein saama, é ti ve Leevi nuiti zea, niiti ti Ɠɔoɠɔ GALAGI ná-seɠe ʋɛlɛ ɲadegai makɛsu, eɠɛʋelei Ɠɔoɠɔ GALAGI ma levei veeni la zea.

48 Kɔɔɓɔgiti deve ɠundiɠiiti, waagilagila kundiɠiiti, ta nu ungilagila kundiɠiiti, naati ti ʋaani naazu, 49 ti ɠɛ Moize ma: «Gɛi gi ga ɗa-wotiɠɛ nuiti, gi kɔɔɠɔ nuiti gaaluga, niiti ti ɠɛa gá-leveiti bu, ti ɠaavɔnigɛ, zunu ɠila kpalaa ge la yɛni ná ʋolu gi zaama. 50 Gi ɠilagilagi gá ʋaazu ga zanu sɔɔlaiti Ɠɔoɠɔ GALAGI ʋɔ, ti ɠɛ ga vebɛaniiti, nii gi ka, zanu balaiti, yɔlɔɠɔiti, balaɠaegiti, goizu anigiti, ta kɔbu ansaiti, é ɠɛ ga koto gba anii tɔgi letemazu, gi-ɓusɛiti faa zu, Ɠɔoɠɔ GALAGI ɠaazu.»

51 Moize ta zalaɠa ɠula nui Eleazaal ti yeezeini naama zɔɔlaiti bu, ti ti veeni ti ya, ti ɓɛtɛai ga zanugi. 52 Zanugi kpein nu waagilagila kundiɠiiti ta nu ungilagila kundiɠiiti ti gaaluni Ɠɔoɠɔ GALAGI ʋɛ, buɲɛgi ɠɛni ga kilo ungila puulɔsaʋa maazu naanigɔ (184). 53 Kɔɔɠɔ nuiti ɛsɛ ge ná-kɔɔzoganii zeɠeni ɓɔɠɔ ʋɛ. 54 Moize ta zalaɠa ɠula nui Eleazaal ti zanugi zeɠeni, nu waagilagila kundiɠiiti ta nu ungilagila (kundiɠiiti zea, ti lii la GALA daaɠomi seɠe ʋɛlɛi wu, é ɠɛ ga ɠizɛsui Izelayɛle nuiti bɛ, Ɠɔoɠɔ GALAGI ɠaazu.