1 Pɛlɛyeɠe ɠundiɠiiti ti ɠulaai Galaade ná-bolodai zu, Makiil ná-doun zunui, Manasee ná-doun zunui, Zozɛfe ná-doun zunuiti ta-wolodamaiti saama, ti ʋaani Moize ʋɔ bɛ, ti ɓɔɛ pɔ, ta Izelayɛle nuiti ta-ʋɛlɛyeɠe ɠundiɠiiti, 2 ti ɠɛ ti ma: «Ɠɔoɠɔ GALAGI devei veeni màliɠii ya, ga é zooi ɠaaɠwɛ Izelayɛle nuiti ba ga kpakutoomai. Naa ʋoluma, màliɠii devei zɔlɔɔni Ɠɔoɠɔ GALAGI ya, ga é gi-ɠɛɛloin Selɔfeɠade ná-poganii ve ná-doun anzanuiti zea. 3 Ni ta vuluna Izelayɛle nuiti ta-wolodamai taɠili ma, ta-ʋoganii ɠa zeɠe gi-mɛmɛwolani ta-ʋoganii ʋa, é ʋɛɛ bolodai naa, ná-poganii ʋa, nii ti ɠiliai ba, naa maaʋele ma, ta ɠa ɠulazu poganii la, nii gaaɠwɛai gi ʋa ga kpakutoomai. 4 Ɓɔɠɔyeema ɠonagi a zeelina Izelayɛle nuiti bɛ, ta-ʋoganii ɠa ʋɛɛ bolodai naa nɔnɔi ʋa, nii ti ɠilizu ba, toɠa zeɠe gá-wolodai nɔnɔ ma gelei ʋa.»

5 Moize Ɠɔoɠɔ GALAGI ná-deveiti daazeelini Izelayɛle nuiti ma, é ɠɛ ti ma: «Zozɛfe mavofodaiti ta-wolodai ɠa gaamai wosu. 6 Pɛtɛ nii Ɠɔoɠɔ GALAGI deveai Selɔfeɠade ná-doun anzanuiti ma: Ta zei naama nuiti bɛ, niiti ta ɠɛ ti ʋɔ, ni nɔ ta zei ti-ɠɛɛni ta-wolodai zu. 7 Izelayɛle yooi zu, poganii tanɔpɛ ge la ɠulaa bolodai ta zu, é ʋa li bolodai zɔi zu, kɛlɛ Izelayɛle nui ɠilagilagi ɠa ɠili kɛɛɠɛni ta-wolodai ma ʋoganii ʋa. 8 Anzanu loin ɠilagilagi kpein poganii a ɠɛ zea, Izelayɛle nuiti ta-wolodaiti su, kɛni naa zei zini bɛ, kɛɛɠɛ ná-bolodai zu, naa ɠa a kɛ Izelayɛle nuiti gilagilagiti ti ti-mɛmɛwolani ta-ʋoganii zɔlɔɔ. 9 Poganii tanɔpɛ ge la ɠulaa bolodai ta ʋa, é ʋa li bolodai taɠili su, kɛlɛ Izelayɛle nuiti ta-wolodaiti ta ɠili ti ɠilagilagi ta-ʋoganii ʋa.»

10 Selɔfeɠade ná-doun anzanuiti ti kɛɛni, eɠɛʋelei Ɠɔoɠɔ GALAGI ma levei veeni la Moize ya. 11 Selɔfeɠade ná-doun anzanuiti ti ga Maala, Tiilesa, Ɠɔgela, Mileka ta Noa, ti zeini ti-ɠɛɛ kɛɛɠɛlointi ti-loun zunuiti bɛ, 12 ti zeini Zozɛfe ná-doun zunui Manasee mavofodaiti bɛ, ta-ʋoganiiti ti yɛni ti-ɠɛɛni ta-wolodai zu.

13 Deveiti ta tɔgiti kana, niiti Ɠɔoɠɔ GALAGI feeni Izelayɛle nuiti zea, ga Moize maaʋele, Moaɓe nɛmɛi zu, Zuludɛn ɠobaʋɛ, Zeeliko letemaʋɛ.