1-2 Eꞌanoꞌo nego nabudi, eme Badiꞌaꞌa matuꞌiꞌuma radoneḡa ibiḡa ihozido. Ebu izidi zaꞌe eꞌe radoneḡano radiuꞌohe. Rehano eme Zuhiꞌa Boro Iesu niḡano rinede umizeꞌohe. Mazaḡa Zuhiꞌa Boro Iesuꞌa rifiroteꞌe ḡoeꞌa emeḡeꞌa ihozidotaꞌaꞌe zae edeḡa, za eꞌe ibiḡano daꞌo radiu onameꞌenoꞌi!

3 Badiꞌa ani uraꞌe, zaeꞌa zaḡozaḡoga urateꞌohe, mazaḡa zaꞌe Badiꞌaꞌa mae avo tiro ꞌahine. Zaꞌe daro haḡaiḡaonoꞌo vaginoi! 4 Ebu ohoze ohoze, zaꞌe zaḡozaḡe zu gubane ibiḡano ꞌahirize tuḡaneꞌenaꞌa, dugunoꞌi! 5 U ubuma gezo radoneḡano ago radoꞌi! Aꞌe Badiꞌa aḡuꞌa azaḡa haḡai. 6 Eꞌe haḡaiḡa sauꞌaꞌe negoḡo nabugo mazao ago haḡaoꞌi! Inuga teite ago darooꞌi! Mazaḡa ꞌuguḡa haḡaiḡa haḡaeꞌeteꞌe vazeḡaꞌe Zuhiꞌa Boroꞌa eꞌe naeḡa haꞌuma. ꞌAdiꞌe emeḡeꞌa ibiteo ꞌoma irina riḡa zi edemazidoteꞌe ḡoeꞌa. 7 Badiꞌaꞌa emeḡe zamafirotaꞌaꞌe, daro haḡaiḡa mene haḡaifine, rehano zaḡozaḡo radoneḡano radifine. 8 Eꞌanoꞌo iradugu ḡoeꞌa ꞌadi mene mae ḡihiniꞌuma vazeḡaꞌe, mene vaze iradugu ḡoeꞌa mae ḡihineꞌohe. Rehano, Badiꞌa, ani ane Vine Zaḡoḡa tuḡuno zenadu, danazeꞌe rehano, iradugu ḡoeꞌa rae modeꞌohe.

9 U nego nabudi teite zamarotiteꞌeteꞌe moneoꞌe, za ꞌai Badiꞌaꞌa ihozadu, zamarotiteꞌohe. Eꞌanoꞌo mene miriho ziniꞌuma. 10 Hubehune zaꞌe Makedonia habaꞌa niduꞌa zamaḡano Iesu mone raꞌeteꞌe azaḡa niduꞌa zamareꞌohe. Rehano nego nabudi, eme bare umizihi! Bare bare ꞌougeꞌenoꞌi!

11 Ebu ꞌadiꞌe, emeḡeꞌa zae teite radiunuteꞌe madaḡano, ihozidoteꞌe ḡoeꞌa rehano, bare ziꞌohe. Zamaze rinedeꞌenaꞌa, imuimuꞌuhi radiuꞌenoꞌi! Ebu evoreze hina zae zae gau daꞌo zamare haḡaeꞌenoꞌi! Vaze ago dudizeꞌenoꞌi! 12 ꞌOugine, Iesu mone mene raꞌeteꞌe azaḡaniꞌa zae radone horonadu, gubaziꞌuma. Zuni zae inarao gaueꞌenoꞌi, zaeꞌa ogomu, dabua, radone ḡauḡa niduꞌa meifine! ꞌOugine, zaꞌe vaze ꞌahoganiꞌa mene fereziꞌuma.

13 Nego nabudi, eme uraꞌe zaeꞌa ederoga, Iesu ni mae ḡihineꞌeteꞌe azaḡaniꞌa rudaroteꞌe mazao naginiꞌa fureraꞌumaꞌe. Badiꞌa aḡuꞌa azaḡa rudaꞌuma teige, zaꞌe zamaze ago vetuḡa ranoꞌi! Ze ꞌane rune vazeḡaꞌe mene bare ḡabodiꞌuma raꞌohe. 14 Eme, ḡoere ꞌadiꞌe huga raꞌohe. Iesu ani rudaro, ebu bare ḡabodiro. Eꞌanoꞌo Iesu ni mae ḡihinadu, rudaroteꞌe azaḡaꞌe, Iesuꞌa bare ovaiꞌuma madaḡano, Badiꞌaꞌa Iesu teite bare zamaziꞌuma. 15 Emeḡeꞌa ꞌada ziꞌeteꞌe ḡoeꞌaꞌe, Zuhiꞌa Boro Iesuꞌa reiroteꞌe ḡoeꞌa. Eme, ize ḡaboga radiuꞌeteꞌe azaḡaꞌe ize radiu onamo, Zuhiꞌa Boroꞌa bare ovaineꞌe, rudaroteꞌe azaḡaꞌe ibite ḡaboziꞌuma. Eꞌe enoganobuꞌu emeḡe zamafiꞌuma. 16 Zuhiꞌa Boro aneꞌa rune azaḡa iḡunoi raenaꞌa ḡihau huaune, tuḡure viga ḡihiꞌaniꞌa huaꞌuma, ebu kibi hodoga igiꞌuma. Eꞌe zamaḡano, Zuhiꞌa Boro aneꞌa adureonoꞌo ovaiꞌuma. Ebu Keriso mazao fiadu rudaroteꞌe azaḡaniꞌa gezo ḡabode iḡuniꞌuma. 17 Eꞌe enogano, eme, ize ḡaboga radiuꞌeteꞌe azaḡaꞌe, Badiꞌaꞌa zeḡe teite idaḡa mae ḡihifiꞌuma, ebu magube zamaḡa diuḡiꞌuma, adureo Zuhiꞌa Boro teite hidoga veize. Ebu emeꞌe Zuhiꞌa Boro teite radiu tuḡutuḡu radiꞌuma. 18 Zaꞌe, eḡeꞌa ꞌada teateꞌe ḡoeꞌa hina zae bare inaratitoꞌi!