1 Nego nabudi, Zuhiꞌa Boro Iesuꞌa bare onaiꞌuma madaḡaꞌe ꞌahama mene miriho ziniꞌuma, 2 mazaḡa za edeḡa tauḡi, Zuhiꞌa Boroꞌa bare onaiꞌuma madaḡaꞌe. Ḡonoreꞌa ohere onaiteꞌe teige onaiꞌuma, ebu vaze niduꞌa zaguzagaꞌuma. 3 Vaze vazeꞌa raenaꞌa, “Eme uniho manoḡa maha, ebu aduga ꞌahoga oꞌoꞌa.” rae reꞌoreꞌeꞌeteꞌe zamaḡano, sauꞌa boroꞌa tabatabaze feuradu, zaguzaguziꞌuma. Aꞌe roḡae ahiꞌetaniꞌa ene furenoga radu, gigiꞌaniꞌa tabatabane feurohuꞌeteꞌe teige fureraꞌuma. Ebu zeꞌe eꞌe aduḡa boroꞌa fureruꞌeteꞌe mode feranoga mene idaḡa.

4 Rehano nego nabudi, zaꞌe mene uzaboo radiuꞌeteꞌe azaḡa. Eꞌanoꞌo Iesuꞌa bare ovaine, ḡonoreꞌa zaguzaguzeꞌeteꞌe teige, mene zaguzaguziꞌuma. 5 Zaꞌe niduꞌa madai zu agaḡa zamaḡano radiuꞌeteꞌe azaḡa. Emetaꞌe ohere zu uzabo zamaḡano mene radiuꞌeteꞌe azaḡa. 6 Eꞌanoꞌo Iesuꞌe mene bare onaiꞌuma rae zamareꞌeteꞌe azaḡa teige, mene reꞌoreꞌe radiꞌuma! Ebu tohutohe radiꞌuma, zu haḡaife daꞌo faifaine duguniꞌuma. 7 Mazaḡa reꞌoreꞌe radiuꞌeteꞌe azaḡaꞌe uzabo zamaḡano reꞌoreꞌeꞌohe, ebu gage baboruꞌeteꞌe azaḡaꞌe uzabo zamaḡano gage baboruꞌohe.

8 Rehano emeꞌe madai agaḡano radiuꞌe ꞌahine, haḡaife daꞌo faifaine duguniꞌuma. Eꞌe haḡaiḡaꞌe eme ꞌahige haḡaiꞌuma: Badiꞌa mazao fiꞌuma, ebu Badiꞌa zu vaze zamariꞌuma. Aꞌe uti vazeḡaniꞌa ahiri biriḡa hina ahiꞌa ꞌueꞌeteꞌe heuḡa. Ebu eme Iesuꞌa bare onaadu ḡabofiꞌuma rae zamare gigaruꞌeꞌuma. Aꞌe uti vazeḡaniꞌa utio vadini biriḡa hina vadiga ꞌueꞌeteꞌe heuḡa. 9 Mazaḡa Badiꞌaꞌa emeḡe meꞌofirotaꞌaꞌe, mene maḡunofeadu, emeḡe sauꞌa naeḡa rififine, rehano Zuhiꞌa Boro Iesu Keriso tuḡunadu, emeḡe sauꞌa naeḡa mae vaḡinadu, ḡabofifine. 10 Aneꞌa onaiteꞌe madaḡano, emeꞌe ruga ga ḡaboga rehano, ane teite ḡabone tuḡutuḡu radoga veize, ani emeḡe veize rudaro. 11 Eꞌanoꞌo zae zaeꞌa eḡe ḡoere ꞌadi hina inaratitoꞌi, ebu Badiꞌa mazao fie gigarafine danatitoꞌi! Eꞌe haḡaiḡaꞌe zaeꞌa haḡae onaeha. Zaeꞌa ꞌouge daꞌo haḡaeꞌenoꞌi!

12 Nego nabudi, eme umizeꞌohe. Zae boꞌaḡano, Zuhiꞌa Boro ibi moneo gau boro haḡaiꞌenaꞌa ibitoziniꞌeteꞌe ebu iraduguzeꞌeteꞌe azaḡa gubazoꞌi! 13 Zeḡeꞌa zae veize gaueꞌeteꞌe haḡaiḡa uꞌano zamaze niduꞌa hina gubazoꞌi, ebu zamarone boro zeḡe mazao toꞌi! Zae zae niduꞌa uniho manoḡa zamaḡano radoꞌi! 14 Nego nabudi, eme umizeꞌohe. Gauoga mene urateꞌeteꞌe tubuḡa azaḡaꞌe zeḡe hadi gauḡa veize iraduguzoꞌi! Zamaḡa rereḡa azaḡaꞌe inarazoꞌi! Zoreḡa azaḡaꞌe danazoꞌi! Vaze niduꞌa mazao zamaze rinedoꞌi! 15 ꞌAhoganiꞌa ꞌahoga mazao sauꞌa haḡaoꞌidene, sausaunateꞌe vazeḡa ninaꞌa, eꞌe naeḡa ago haḡaoꞌi, rae noꞌi! Rehano iḡaiḡa nabugota zuni vaze niduꞌa mazao haḡai manoḡa daꞌo haḡaeꞌenoꞌi! 16-18 Zaꞌe Keriso moneo radiuꞌeteꞌe azaḡa, eꞌanoꞌo Badiꞌaꞌa zae mazaonoꞌo urateꞌeteꞌe haḡaiḡaꞌe ahiꞌe; Mada niduꞌa matuꞌe radiuꞌenoꞌi! Iḡaiḡa kurauꞌenoꞌi! Naginiꞌa fureranoꞌidene, sauꞌa manoḡa rehano, Badiꞌa mazao manoḡa tauḡi roꞌi! 19 Vine Zaḡoḡaniꞌa zae mazao gaueꞌeteꞌe ibiḡa ago ꞌuoꞌi! 20 Vine Zaḡoḡaniꞌa ziniꞌeteꞌe ḡoeꞌaꞌe huga ꞌoꞌoꞌa radu ago reꞌoreꞌone modoꞌi! 21 ꞌUguḡa ḡoeꞌa egoꞌidene, faine ḡianoꞌi! Ebu manoḡa ḡauḡaꞌe moꞌi, 22 u sauꞌa ḡauḡaꞌe ago moꞌi!

23 Eme ꞌahige kuratihi: Zama roḡeḡa rifeꞌeteꞌe Badiꞌaḡa, aneꞌa ane teige deheze huneꞌenaꞌa matuoziniꞌuma, ebu zaeꞌa haḡai sauꞌa mene haḡaoga veize, Badiꞌaꞌa vineze zu ahirize dananeꞌenoꞌi! Onamo, Zuhiꞌa Boro Iesu Kerisoꞌa bare onaiꞌuma. 24 Zae meꞌofiroteꞌe Badiꞌaḡa, ani ḡoereꞌe hugeita. Eꞌanoꞌo aneꞌa haḡao ziniꞌuma.

25 Nego nabudi, emeḡe veize kurauꞌenoꞌi!

26 Ebu zaꞌe, nego nabudi niduꞌa teite zama manoḡa teite mae ḡihitetoꞌi! 27 Zuhiꞌa Boro niḡano ziꞌohe. Fefa ꞌadiꞌe nego nabudi niduꞌa veize meꞌodoꞌi, zeḡe egoga veize!

28 Emeḡe Zuhiꞌa Boro Iesu Keriso ane manoḡaniꞌa zae mazao radiuꞌenoꞌi!